Aqmola oblysynda da túnde soltústikten, sotústik-batystan kúshti jel soǵady, kóptegen aýdandarda jeldiń jyldamdyǵy sekýndyna 15-20 metrge, ekpini 23-28 m/s-qa jetedi. Al kúndiz jeldiń jyldamdyǵy 15-20 m/s aınalasynda bolady.
Daýyldyń soǵý yqtımaldylyǵy - 90-95%.
Eske sala keteıik, búgin Astanada daýyl soǵyp, birneshe adam zardap shekken bolatyn.
Tabıǵattyń tosyn minezi saldarynan Astana áýejaıynda «Eır Astana» áýekompanııasynyń ishinde 106 adamy bar Shymkent - Astana baǵytyndaǵy ushaǵy ushyp-qoný jolaǵynan shyǵyp ketti.
Túrkistan kóshesindegi qurylys alańynda kran qulady, Beıbitshilik jáne kelisim saraıy ǵımaraty shynylary syndy, Arnasaı kóshesindegi 127-turǵyn úıdiń, № 24 orta mekteptiń, Úrker shaǵyn aýdanyndaǵy №91 balabaqsha shatyry kókke ushty.
Sondaı-aq daýyl saldarynan «Dýman» qonaq úıiniń holyndaǵy vıtrajdy terezeler shaǵyldy. Turǵyn úıler men ǵımarattardyń syrtqy qaptamalary, sonyń ishinde kirpishter kókke ushty. Jol jıegindegi betondy dińgekter qulady. Qalanyń ár aýdanyndaǵy turaqtarda kóptegen avtokólikke zaqym keldi.
