«Inter» Chempıondar lıgasyna qaıta oraldy

Negizi chempıonatty tamasha bastaǵan «Inter» belortaǵa kelgende turalap qaldy. Kerek emes jerde upaı joǵaltyp, aýtsaıderlermen teń oınap, ábden berekesi qashty. Biraq bas bapker Lýchano Spalettı jaǵdaıdy qalpyna keltirdi. 37-týrda «Inter» óz alańynda «Sassýoloǵa» jeńilip, jaǵdaıdy ýshyqtyryp aldy. Tipti kóptegen fanattar keler jyly Eýropa lıgasynda oınaıtyn boldyq dep kóńilderi túsip te ketti. Biraq...

Biraq negizgi básekeles «La­sıo» kútpegen jerden opyq jedi. «A» serııasyndaǵy ornynan aıy­rylyp qalǵan aýtsaıder «Kra­tonemen» 2:2 teń túsip, 2 upaıǵa zárý bolyp qaldy. Mılandyq klýbtyń úmit oty qaıta jandy. Kúntizbeniń de kestesi aldyn ala boljanyp jasalǵandaı, sońǵy týrda «Inter» men «La­sıo» kezdesetin boldy. Rım ko­man­dasy óz alańynda jeńilip qal­maı, teń túskenniń ózin­de úzdik tórttikten túspeıtin. Tipti, oıyn­nyń 9-mınýtynda gol soǵyp, esepte alǵa shyqty. Jıyr­ma mınýttan soń Dambrozıo tarazy basyn teńestirip tastady. Degenmen, Andersonnyń golynan soń alań ıeleri qaıtadan jeńip jatty. Argentına quramasynan oryn ala almaı júrgen Maýro Ikardı penaltıden gol soǵyp, esepti qaıta teńestirdi. 79-mınýtta Senad Lýlıch qyzyl qaǵaz alyp, «Lasıony» jar shetine taqady. Jyǵylǵanǵa judyryq bolǵandaı 81-mınýtta Matıas Vesıno buryshtamadan gol soǵyp, «Interge» jeńis syılady. Osy goldyń arqasynda qos komandanyń upaıy teńesip, jeke oıyndar kórsetkishi bo­ıynsha «Inter» 4-orynǵa shyqty. Sebebi «Interdiń» alańynda ótken alǵashqy aınalymnyń oıyny 0:0 aıaqtalyp edi. 

Osyndaı dramaǵa toly match «Inter» fanattarynyń eńsesin kóterip tastady. Araǵa alty jyl salyp «Inter» Chempıondar lıgasyna qaıta oraldy. Sonymen qatar Italııanyń taǵy bir dańqty klýby «Parma» «A» serııasyna ótti. Olar osydan 

3 jyl buryn bankrot bolyp, «D» serııasyna túsip qalǵan bolatyn. Daǵdarystan jol tapqan «Parma» qytaılyq ınvestordyń arqasynda qaıta kóterildi. Klýbtyń vıse-prezıdenti Ernan Krespo kelesi jylǵa joıqyn jos­parlar quryp otyr. 

«Parma» demekshi, osy klýb­tyń sapynda aty shyqqan Djan­lýıdjı Býffon sońǵy týrda «Iýventýspen» qosh aıtysyp, stadıonǵa jınalǵan qalyń kó­rer­menniń júregin eljiretti. «Ve­ronamen» ótken match­tyń 63-mı­nýtynda Býffon alań­daǵy ornyn áriptesine bosatyp berip, endi «Iýventýs» qaqpa­synyń kilti mende emes degendi bildirdi. Týrındik jankúıerler aty ańyzǵa aınalǵan qaqpashyny tik turyp shy­ǵa­ryp saldy. Ita­lııalyq jýr­nalısterdiń ja­zýyna qarasaq, kóz jasyna erik berip, Býffonmen birge jy­la­ǵan jankúıerde esep bol­mapty.

Aıtpaqshy dál osyndaı oqı­ǵaǵa shamalas jaǵdaı Ispanııa La-lıgasynda da oryn aldy. «Barselona» – «Real Sosedad» arasyndaǵy oıynnyń 82-mınýtynda Andreas Inesta alańdaǵy ornyn Pako Alkaserge bosatyp berdi. Ataqty jartylaı qor­ǵaý­shy «Barselona» sapyn­daǵy soń­ǵy oıynyn ótkizdi. «Noý Kamp» trıbýnalary da An­dreasty qı­mas­tyqpen shyǵa­ryp saldy. Aı­ta keteıik, Ines­tanyń sońǵy mat­chyna Arab túbeginde júrgen jan-joldasy Havı de kelip tamasha­lady. Álem fýtbolynyń tarı­hynda Havı men Inesta tan­demi altyn áriptermen jazylary sózsiz. Pıreneı túbeginiń «men» degen baspasózi bul ekeýi­niń «Barselonamen» qosh aıtys­qa­nyn Ispan fýtbolynyń bir dáýi­ri aıaqtalǵanymen teńdestiripti. 

Jaqynda ǵana Eýropa lıgasyn jeńgen Fernando Torres te fýtbolmen qoshtasyp, «At­le­tıko» jankúıerlerine alǵysyn bildirdi. Alǵyr shabýylshynyń qosh­tasýy da birshama jankúıer­diń kóńilin bosatyp ketti.

Ermuhamed MÁÝLEN,
«Egemen Qazaqstan»