Aýqymy jyl saıyn artyp kele jatqan dodaǵa bıyl qaraǵandylyqtar men elimizdiń basqa da oblystarynan kelgen qonaqtar ǵana emes, Belarýsten, Qyrǵyzstan men Ýkraınadan kelgen jelaıaqtar da qatysty. Kenshiler qalasynyń ortalyǵyndaǵy Táýelsizdik alańynda bastalǵan marafonǵa qatysýshylardy Qaraǵandy oblysynyń ákimi Erlan Qoshanov quttyqtap, sát-sapar tiledi.
Tilek bildirýshiler ártúrli qashyqtyqtaǵy tórt aralyqqa júgirdi. «Balapan» dep atalǵan alǵashqy eki shaqyrymdyq qashyqtyq 8 ben 14 jas aralyǵyndaǵy balalarǵa arnalǵan. Al qalǵan 7 shaqyrymdyq «Dostyq», 15 shaqyrymdyq «Spýtnık» jáne 21 shaqyrymdyq «Armanǵa jol» dıstansııalarynda eresekter júgirdi.
Tańerteńgi saǵat 8-de aldymen balalardyń eki shaqyrymdyq báıgesi bastaldy. Qyzdar arasyndaǵy jarysta birinshi bolyp Vıktorııa Sharova, odan keıin Vıktorııa Shımpf pen Natalıa Labeskaıa keldi. Al uldar arasyndaǵy básekede máre syzyǵyn aldymen birinen soń biri jetken Stepan Spasskıı, Dáýlet Berikbol jáne Vladlen Ivanov qıdy. Jeńimpaz, júldeger balalarǵa 30-50 myń teńge aralyǵynda aqshalaı syılyqtar úlestirildi.
Al Belarýsten kelgen sportshy Vladıslav Prıamov 21 shaqyrymnan astam qashyqtyqty 1 saǵat 6 mınýtta júgirip ótip, jartylaı marafonnyń bas báıgisi bir mıllıon teńgeni enshiledi.
– Jeńil atletıkamen jıyrma jyldan beri shuǵyldanyp kelemin, kásibı sportshymyn, – deıdi V.Prıamov. – Buryn dene shynyqtyrý pániniń muǵalimi boldym. Qazir Mınskide áýesqoı jelaıaqtardy jattyqtyramyn. Osy marafon týraly qaraǵandylyq belgili sportshy, oblystyq jeńil atletıka federasııasynyń prezıdenti Dmıtrıı Karpovtan estidim. Bıyl ol meni Qaraǵandyǵa arnaıy shaqyrdy. Munda júgirý baǵytyndaǵy joldar men kóshelerdiń bári jaqsy ári taza eken. Básekelester de osal bolǵan joq.
Al áıelder arasynda negizgi júlde Qyrǵyzstannan kelgen Vıktorııa Polıýdınaǵa buıyrdy. Ol da kásibı sportshy, marafonnan halyqaralyq dárejedegi sport sheberi eken.
– Marafon bárimiz úshin úlken mereke boldy. Bul jartylaı marafon men úshin bıyl Djakartada ótetin Azııa oıyndary aldynda óz-ózimdi synap alýyma jaqsy boldy, – deıdi ol.
«Armanǵa jol» jartylaı marafonyn biraz el qazirdiń ózinde Qaraǵandynyń sporttyq brendi dep ataı bastaǵan. Uıymdastyrýshylar bul jarystyń áýesqoılar úshin ǵana emes, kásibı jeńil atletter úshin de tartymdy bolýyna kúsh salýda.
Qaırat ÁBILDA,
«Egemen Qazaqstan»
QARAǴANDY
