Buǵan deıin Dáýlet Bolatuly salyp bergen bul sport kesheninde san márte respýblıkalyq, oblystyq jarystar ótkizilip kelgen. Al bul jolǵy jasy nebári on, on eki jastaǵy balalardyń dúbirdi dodasy tuńǵysh ret ótkizilip otyr. Sebebi Kúnshyǵys elinde balalardy tórt jasynan sportqa baýlıdy eken. Biz olardan kembiz be? Aýdanda sport keshenin salǵan kezde er Dáýlet sony kózdese kerek.
Osy týrnırdi ótkizýge belsene aralasqan, dúbirli dodanyń shyǵynyn kóterýge atsalysqan oblystyq grek-rım, erkin jáne áıelder kúresi federasııasynyń prezıdenti Marat Muzaparov atalmysh sport túrlerimen qazir myńdaǵan balalardyń jattyǵyp júrgenin, kúni erteń olardyń arasynan Dáýlet sııaqty sańlaqtardyń shyǵatynyn aıtty.
«Aqsuńqar jemin shashyp jeıdi» degendeı, qashanda turǵyndarǵa jomart qolyn sozyp, qaıyrymdylyq sharalaryn ótkizetin er Dáýlet KSRO-nyń eńbek sińirgen sport sheberi Esenǵalı Eńsebaevtyń jubaıyna páter kiltin tabys etti. Qatty tolqyǵan ana Dáýletke, otbasyna amandyq, saýlyq tiledi.
Jarma aýdanynyń ákimi Nurlan Sydyqov qazaq eliniń maqtanyshy, dańqty balýan Dáýlet Bolatulyna, onyń jubaıy Qazaqstan gandbol federasııasynyń prezıdenti, Azııa gandbol federasııasynyń múshesi Gúlnar Ysmaǵulqyzyna «Jarma aýdanyna sińirgen erekshe eńbegi úshin» tósbelgisin tapsyrdy. Al batyrdyń anasy, ardaqty ustaz Márzııa apaıǵa «Asyl ana» tósbelgisimen marapattady.
Saltanatty sharadan soń týrnır bastaldy. Bul joly ashyq birinshilikke Almaty qalasy, Almaty, Pavlodar, Ońtústik Qazaqstan oblystarynan, oblystyń aýdandarynan eki júzge tarta balalar qatysty. 26 kılo salmaqtaǵy asyqtyń alshysyndaı shymyr bala jarmalyq Nurjan Áshimjanovtyń beldesýi kópshilikke unady. Qorqyp, úrkýdi bilmeıtin Nurjan qarsylas shaq keltirmedi. Qarsylastaryn birinshi kezeńde aıqyn basymdyqpen jeńdi. Aqtyq saıysta shymkenttik Sultan Maratulyn kilemde qapy qaldyrǵany sol edi, birneshe ret salto jasap, jınalǵandardy tánti etti.
– Qazir 11 jastamyn. Senesiz be, grek-rım kúresimen jattyǵa bastaǵanyma besinshi jyl. Bastapqyda ata-anam áli balasyń, deneńe zaqym keltirip alasyń dep kúrespen shuǵyldanýyma qarsy bolǵan. Armanym – osy keshendi salyp bergen Dáýlet kókem sııaqty jaýyryny jer ıiskemegen chempıon bolý, – deıdi kózinen ot ushqyndaǵan Nurjan. Bul salmaqta eki úshinshi oryndy Almaty oblysynyń túlegi Súleımen Álıev pen Úrjar aýdanynan kelgen Erlan Ernur ıelendi.
34, 39, 46, 54 kılo salmaqta Almaty oblysynyń balýany Temirǵalı Erasyl, jarmalyqtar Erdos Jumaǵulov, Dıas Hadjımurat, semeılik Erqanat Muqııat chempıon atandy. Kelesi kúni 36, 42, 50 jáne 50 kılodan joǵary salmaqtaǵy balalar kilemge shyǵyp tamasha óner kórsetti. Jarys aıaqtalǵan soń halyqaralyq dárejedegi bas tóreshi, jarysqa basshylyq jasaǵan Manarbek Bódenov pen bas hatshy Maqsat Ashımanov júldegerlerdi marapattady. Birinshi oryn alǵandarǵa – 30, ekinshi oryn – 20, al eki úshinshi orynǵa ıe bolǵandar árqaısysy 15 myń teńge men Alǵys hattardy ıelendi.
Ońdasyn ELÝBAI, jýrnalıst
Shyǵys Qazaqstan oblysy,
Jarma aýdany
Sýretti túsirgen avtor
