«Men Mbappeniń transfer narqyn aıtqanymdy qalaısyzdar ma? Eger sizder maǵan mıllıard eýro usynsańyzdar da men ony satpaımyn», dep málimdegen ol Sky Sports basylymyna. Mbappe PSJ klýbyna ótken jyldyń jaz aıynda «Monako» sapynan aýysyp kelgen edi.
Aıta keteıik, Parıj komandasy jas fýtbolshyny bir jyl jalǵa, keıinnen 180 mln eýroǵa satyp alý kelisimshartymen alǵan edi. Ol bir maýsym ishinde PSJ sapynda 21 gol soǵyp úlgerdi.
Shvesııa ataǵyn qorǵap qaldy
Hokkeıden Danııada ótken álem chempıonatynyń fınalynda Shvesııa quramasy Shveısarııaǵa qarsy oınap, býllıt serııasynda jeńiske jeti.
Eki qurama arasyndaǵy fınaldyq teketirestiń negizgi ýaqyty 2:2 esebimen teń aıaqtaldy. Shveısarııa quramasy sapynan shaıbany Nıno Nıderraıtera (17-mınýt) men Tımo Maıera (24-mınýt) soqsa, shvesııalyqtardan Gýstav Nıýkvıst (18-mınýt) jáne Mıka Zıbanedjad (35-mınýt) eki golmen qarymta qaıtardy. Al býllıt serııasynda Shvesııa quramasynyń hokkeıshileri mergendik tanytyp, 2:1 esebimen basym tústi. Osylaısha, Shvesııa byltyrǵy álem chempıony ataǵyn saqtap qaldy.
Úshinshi oryndy Kanada quramasyn 1:4 esebimen jeńgen AQSh hokkeıshileri ıelendi.
Nadal óz rekordyn jańartty
Ispanııalyq tennısshi Rafael Nadal Rımde (Italııa) ótken «Masters» týrnıriniń fınalynda jeńiske jetip, atalǵan jarystyń segiz dúrkin chempıony atandy.
Osylaısha, Nadal «Masters» serııasyndaǵy 32-shi júldesine qol jetkizip, óz rekordyn jańartty. Endi ol ekinshi orynda kele jatqan Rodjer Federerden eki júldege ozyp ketti.
Sonymen qatar bul ıspanııalyq tennısshiniń karerasyndaǵy 78-shi júldesi. 1968 jyldan beri jekeleı saıystaǵy júldeler sany boıynsha tórtinshi orynǵa kóterildi. Nadaldiń aldynda Ivan Lendl (94), Rodjer Federer (97) jáne Djımmı Konnors (109) bar.
Aıta keteıik, Nadal Rımdegi jeńisi úshin 1000 reıtıngtik upaı alyp, álemniń birinshi raketkasy atandy.
Daıyndaǵan Álı BITО́RE,
«Egemen Qazaqstan»
