Kompanııa basshylary elektrondy úkimetti damytý barysyn, «Sıfrly Qazaqstan» baǵdarlamasy aıasynda qolǵa alynǵan jobalar jaıyn sóz etti. Aksıonerlik qoǵamnyń basqarma tóraǵasy Áset Turysovtyń aıtýynsha, aldaǵy ýaqytta mekenjaı anyqtamasy, jyljymaıtyn múliktiń bar nemese joq ekendigi týraly anyqtamany, zańdy tulǵalarǵa jáne jeke tulǵalarǵa qatysty basqa da anyqtamalardy SMS-habarlama arqyly alýǵa bolady. Bul qyzmet túrlerin qoldaný úshin mobıldi azamattar bazasynda tirkelý qajet. Iаǵnı telefonyńyzdyń nómiri egov.kz portalynyń profıline bekitilýge tıis. Alynǵan anyqtamany telefonǵa saqtap qoıýǵa nemese e-mail arqyly joldaýǵa bolady. Aksıonerlik qoǵam jýyq arada basqa da qyzmet túrlerin kóbeıtýdi josparlaýda.
Sonymen birge kompanııa egov.kz portalynyń redızaınyn jasaýdy qarastyryp otyr. Portaldyń qazirgi dızaıny 2012 jyly jasalǵan, qazirgi zamanaýı talaptarǵa saı emes. Qoldanýshymen keri baılanys ornatý úshin portaldyń beta-nusqasy ázirlengen. Azamattar onda ózderiniń usynys-pikirlerin qaldyra alady, deıdi Á.Turysov. Josparǵa sáıkes, Ulttyq kýálandyrýshy ortalyqtyń (pki.gov.kz) da saıty qaıta jasalmaq.
«Ulttyq aqparattyq tehnologııalar» AQ e-gov.kz portalyn iske qosqannan bergi 8 jylda ony paıdalanýshylar sany 650 esege kóbeıipti. Al atalǵan ýaqyt aralyǵynda elektrondy úkimettiń qoldanystaǵy 235 qyzmeti men servısi boıynsha azamattarǵa 200 mıllıonǵa jýyq qyzmet kórsetilgen. Bul degenimiz qaǵazbastylyqtan arylyp, qajetti qujattardy elektrondy túrde alýdyń qoljetimdi bola túskendigin kórsetedi.
Buǵan deıin «100 naqty qadam» Ult josparynyń 94, 96-qadamdaryn iske asyrý boıynsha «Ashyq úkimet» portaly iske qosylǵan bolatyn. Onda 2828 ashyq derek jıyntyǵy, 25 492 normatıvtik-quqyqtyq akti, 26 357 bıýdjettik baǵdarlama, 7 408 aýdıt, qarjylyq baqylaý, 63 memlekettik organdardyń bıýdjettik esepteriniń elektrondyq nusqasy qamtylǵan. Buǵan qosa, «Ashyq dıalog» alańy qurylyp, oǵan sońǵy 5 jylda 221 myńnan asa ótinish kelip túsipti. Olardyń 88 paıyzyna memlekettik organdarmen birlese otyryp naqty jaýaptar berilgen.
Erkejan AITQAZY,
«Egemen Qazaqstan»
