О́tken aptanyń aıaǵynda qazaq sportshysy Neva jaǵalaýyna qaıta attandy. «M-1» uıymynyń tolyqqandy chempıony ataný úshin ol búgin, ıaǵnı 24 mamyrda ýkraınalyq Aleksandr Doskalchýkpen kúsh synasady. Qarsylasy jaıynda aıtar bolsaq, 28 jastaǵy Chernovsy qalasynyń týmasy pankratıonnan Eýropa chempıony jáne álem chempıonatynyń kúmis júldegeri. Aralas jekpe-jekke aýysqaly beri ol birqatar halyqaralyq týrnırlerde top jardy. Osy kúnge deıin 8 ret aıqasqan Doskalchýk 7 márte jeńis toıyn toılady. 2017 jyldyń qyrkúıeginde reseılik Vadım Malygındi «qylqyndyrý» ádisimen utyp, 56,7 keli salmaq dárejesi boıynsha «M-1» uıymynyń chempıondyq belbeýin ıelendi.
Almaty qalasynyń dál irgesinde ornalasqan Besaǵash aýylynyń turǵyny Arman Áshimov djıý-djıtsýdan elimizdiń birneshe dúrkin chempıony. Ol 26 jasta. K-1 jáne kıkbokstan ótken birqatar halyqaralyq týrnırlerdiń jeńimpazy. Jekpe-jekten álem chempıony. Sporttyń bul túri boıynsha 10 kezdesý ótkizip, 8 ret jeńiske jetti.
Byltyrǵy jyldyń jazynda «M-1» uıymynyń mamandarynyń nazaryna iligip, olar Armanǵa Ingýshetııada jalaýy jelbiregen jarysta kúsh synasý jóninde usynys bildirdi. Qazaqtyń qaısar uly sol kúnge deıin qarsy kelgenderdiń barlyǵyn qoǵadaı japyryp júrgen daǵystandyq Gadjımurat Álıevti uryp jyǵyp, kópshiliktiń qoshemetine bólendi. Sodan keıin taǵy eki márte aıqas alańyna shyqqan Áshimov bul básekelerdi de merziminen buryn aıaqtady. Mine, endi Sankt-Peterbýrgte chempıondyq belbeý úshin talasady.
Ǵalym SÚLEIMEN,
«Egemen Qazaqstan»
