Osy oraıda jasóspirimder arasynda quqyq buzýshylyqtyń aldyn alý, olardyń quqyqtyq saýattylyǵyn arttyrý, salaýatty ómir saltyn nasıhattaý men qoǵamdyq oryndardaǵy qaýipsizdik máselelerine oraı Almaty polıseıleri №73 mektep-gımnazııasy bazasynda «Jasóspirim jáne zań» alǵashqy vebınaryn ótkizdi. Almaty qalasynyń Bilim basqarmasy men JPQ jasóspirimder isi boıynsha polısııa qyzmetiniń uıymdastyrýymen ótken onlaın-sharaǵa «Nur Otan» partııasynyń, densaýlyq salasy men úkimettik emes uıymdardyń ókilderi shaqyrylǵan.
«Sandyq Qazaqstan» baǵdarlamasy aıasynda alǵashqy ret ótkizilip otyrǵan bul shara jasóspirimderdiń quqyqtary men mindetterine degen jaýapkershiligin arttyrýǵa baǵyttalyp otyr. Jańa sıpatta ótken sharaǵa jasóspirimder ǵana emes, ustazdar men polısııa qyzmetkerleri de qyzyǵýshylyq bildirýde. Búginde mektep oqýshylary men stýdentterdiń aqparat pen kommýnıkasııalyq júıelerge degen yntasy joǵary. Osy oraıda olardy durys baǵytqa qaraı burý qajettiligi týyndaıdy. Jasóspirimderdiń ınternet keńistiginde adasyp ketýiniń aldyn alýda aqparattyq tártipti saqtaý qajettiligin túsindirý qajet. Almaty qalasynyń jasóspirimder isi boıynsha polısııa qyzmeti men bilim basqarmasynyń sharasy aıasynda úkimettik emes uıymdarmen, qoǵamdyq birlestikter jáne jastar qozǵalysymen birlesip, ınternet jáne áleýmettik jelilerdiń keri yqpalyn azaıtýǵa baılanysty saraptamalar júrgizýmen qatar, osy baǵyttaǵy birlesken is-sharalar jıi uıymdastyrylýda.
Elvıra SERIKQYZY,
«Egemen Qazaqstan»
ALMATY
