Aıta ketý kerek, «Oral óńiri» gazeti kishkentaı oqyrmandarymen júıeli baılanys ornatqan. Basylymda balalar shyǵarmashylyǵyna arnalǵan «Aınalaıyn» beti turaqty jarııalanady. Al kishkentaı qalamgerlerdiń shyǵarmashylyǵyna arnalǵan baıqaý 2002 jyldan beri ótip keledi. «Mektepte oqyp júrgen kezinde osy baıqaýǵa qatysyp, júldeger bolǵan birneshe jas búginde jýrnalıstıka salasynda qyzmet etip, áriptes bolyp júrmiz» deıdi «Oral óńiri» gazetiniń bas redaktory Baýyrjan Ǵubaıdýllın.
Bul jolǵy baıqaý 1-6 synyp aralyǵyndaǵy oqýshylar arasynda uıymdastyrylypty. Jeńimpaz atanǵan kip-kishkentaı qalamgerler «Jaıyq Press» ǵımaratyna arnaıy shaqyrylyp, syılyqtary saltanatty jaǵdaıda tapsyryldy. Bir qýanyshty jaǵdaı, bul jolǵy júldegerler buryn «orystanǵan óńir» sanalatyn Zelenov, Bórli, Shyńǵyrlaý aýdandarynan shyǵypty.
Osy sharaǵa arnaıy kelgen aqyn, Qazaqstan Respýblıkasynyń eńbek sińirgen qaıratkeri, «Qurmet» ordeniniń ıegeri Aqushtap Baqtygereeva jas qalamgerlerdi quttyqtap, aq tilegin aıtty:
- Biz sózdi uǵyp, shyǵarma túsinetin baldyrǵandarǵa zárýmiz ǵoı. Ádebıetke beı-jaı qaramaı, kitap-gazet oqýǵa yntaly búldirshinderdi kórgenime qýanyp otyrmyn. Men de sender sekildi aýylda týyp-óstim. Alǵashqy óleńderim de aýylǵa arnaldy. Mine, arý Almatyny, ásem Astanany tastap, Aq Jaıyqqa qaıtyp oralǵanym da osy týǵan jerge degen mahabbattyń arqasy. Senderdiń kishkentaı aýyldaryń – týǵan jerdiń bólshegi. Týyp-ósken jerlerińdi súıińder. Qazaqtyń tilin súıińder. О́zge tildi meńgerip, álemdi sharlańdar. О́ıtkeni, sender – egemen eldiń baqytty urpaǵysyńdar! - dedi Aqushtap Baqtygereeva.
Búginde túrli ádebı baıqaý, músháıra jarystary kóp ótedi. Biraq eń kishkentaı talapkerler arasynda ótken saıystyń jóni bólek. Balany kishkene kúninen ádebıetke, oqý-jazýǵa beıimdeý – jas órendi shyǵarmashylyqqa baýlıdy. Bul jerde oqýshylaryn ádebıetke ıkemdep, talabyn ushtap, qyzyqtyra bilgen ustazdarynyń da jóni bir bólek ekeni sózsiz.
«Bala tili – bal» dep jatamyz. Shynymen de sábı sanasy shynaıy ǵoı. Osy baıqaýǵa Shyńǵyrlaý aýdanynyń Aqtaý aýylynan qatysqan 2 synyp oqýshysy Raıhan Tasemen kórshi bala – úsh jasar Meıirhannyń qylyǵyn jazypty. Qystyń kúni dalaǵa shyǵyp oınaǵan Meıirhan qardan Aıaz ata jasaıdy. Sosyn «oıynshyǵyn» úıge alyp kirse, onysy erip ketipti. Erke bala qıǵylyq salyp, taǵy qar aldyrady. Úıde otyryp jasaǵan Aıaz ata da kópke uzamaıdy. «Meniń Aıaz atam nege erip kete beredi?» dep ań-tań boldy Meıirhan» dep jazady kishkentaı Raıhan. Baıqaýda júldeger bolǵan ár oqýshynyń shyǵarmasynan, salǵan sýretinen osyndaı shynaıylyq, ezý tartqyzar tazalyq sezilip turdy.
Sonymen, «Oral óńiri» gazetiniń ǵasyrlyq toıyna arnalǵan balalar shyǵarmashylyǵy baıqaýynyń júldesin óńirdiń Zelenov aýdanyndaǵy О́rken mektep balabaqsha kesheni oqýshysy Raýken Zaıdýllın, Shyńǵyrlaý aýdany Aqtaý aýyly mektebi oqýshylary Raıhan Tasemen men Sherhan Qaıdarǵalı, Bórli aýdany Grıgorev mektep-balabaqsha kesheniniń 4-synyp oqýshylary Gúlaıhan Ǵanıeva, Erkebulan Sharıbdanov, Aıkórkem Qanapııa jeńip aldy. Olardyń árqaısysyna arnaıy dıplom, aqshalaı syılyq, sporttyq buıymdar jáne kitaptar topamasy syıǵa berildi.
- Jas bala on jasyna deıin kitap, gazet-jýrnal oqýǵa daǵdylansa, qalǵan ómirinde jaqsylyqqa úıir, shyǵarmashyl, bilimqumar, qylmystan aýlaq bolyp ósetinin nemis ǵalymdary dálelegen. Biz de osy baıqaý arqyly sábılerimizdi shyǵarmashylyqqa baýlyp, óner-bilimge, ádebıetke qumar tolqyn ósirgimiz keledi, - deıdi baıqaýdyń ıdeıa avtory Baýyrjan Ǵubaıdýllın.
Qazbek QUTTYMURATULY,
«Egemen Qazaqstan»
Batys Qazaqstan oblysy
Sýretti túsirgen Temirbolat TOQMÁMBETOV
