Informatıka jáne aqparattyq-kommýnıkasııalyq tehnologııalardy oqytý arqyly oqýshylardyń shyǵarmashylyq qabiletterin damytý maqsatyndaǵy IT mektepter men synyptarda sabaqtar ınformatıka páni muǵalimi nemese IT mamandarynyń Love to Code jáne jańa basqa da baǵdarlamalarmen jumys jasaýdy úıretýi arqyly júzege asyrylady.
Ázirge bul bastamalar mektepterde fakýltatıvti pán retinde engizilip, 3-6 aılyq kýrs retinde júrgiziledi de oqytý úrdisi modýldik júıe boıynsha júzege asady. Qazirgi tańda Mańǵystaý oblysy boıynsha jalpy bilim beretin 134 mekteptiń barlyǵy ınternet jelisine qosylǵan, onyń ishinde 127 mektep, ıaǵnı 94,7% keńjolaqty ınternet jelisimen qamtamasyz etilgen. Sondaı-aq mańǵystaýlyq mektepter 75,3% Wi-Fi jelisimen qamtylǵan. Quzyrly oryndardyń málimdeýine sáıkes, 2018 jyly óńirdegi 33 mektepte IT synyptary ashylady.
Mamyrdyń sońǵy kúnderi bilim salasynan jaqsy jańalyq jetti. 21 mamyr kúni NSOS kompanııasynyń demeýshiligimen jekelengen pánderdi tereńdetip oqytatyn mamandandyrylǵan Fort-Shevchenko mektep-ınternatynda, 22 mamyrda «ER SAI Kaspıan Kontraktor» JShS qoldaýymen Quryq orta mektep gımnazııasynda, 23 mamyrda mektepti 2010 jylǵy bitirýshi túlekter kómegimen Qyzyltóbe lıseıinde IT synyptary ashyldy. Endi jańa oqý jylyna deıin Aqtaý qalasyndaǵy mamandandyrylǵan ekonomıkalyq lıseıdiń bazasynda IT mektebi ashylady dep josparlanǵan.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
