Oıyn bastalmaı turyp fınaldyń favorıti «Real» sanaldy. Ol túsinikti de. Madrıdtiń komandasy sońǵy eki fınaldy jeńip, osy týrnırde ataǵy dúrkiredi. Buryn-sońdy bul týrnırdi qatarynan jeńgen komanda joq edi. Endi mine, ıspan klýby taǵy bir rekord aldynda tur. Zınedın Zıdan bapker retinde, «Real» ujym retinde Chempıondar lıgasyn qatarynan 3 ret jeńýi múmkin. Biraq qarsylas ta qarap qalmasy anyq.
«Lıverpýldiń» basymdylyǵy bolsa, ol – shabýyl. Kúlli álem fýtbolyna aty tanylǵan dýaly aýyz mamandar brıtan klýbynyń shabýylyn birinshi kezekte alǵa tartady. Salah-Fırmıno-Mane úshtigi qarsylas bitkendi japyryp jeńdi. Úsheýi osy fınalǵa deıin 29 gol soǵypty. Biraq bul komandanyń bir osal tusy – qorǵanys. Chempıondar lıgasynda oınaǵan matchtarynyń birshamasynda gol jibergen. Aǵylshyn premer-lıgasy jaıly tipti aıtpaı-aq qoıalyq. Ol jaqta «Lıverpýl» oınaǵan eki oıynnyń birinde gol jiberip otyrdy.
«Realdyń» mıllıondaǵan jankúıerleri bıyl Chempıondar lıgasyn jeńbesek, «dosqa kúlki, dushpanǵa taba bolamyz» dep otyr. Dushpan degeni – «Barselona» ǵoı. Katalondyq klýb bıyl Ispan la-lıgasy men kýbogyn qatar utty. Bul eki saıysta da joly bolmaǵan koroldik klýb endi Eýropanyń basty týrnırinde olja alýy tıis. Bul jaǵdaı «Real» oıynshylary men bapkerine degen zor motıvasııa ekeni anyq. Bar nazar bıyl 5 ret Chempıondar lıgasynyń fınalyna shyǵyp otyrǵan Krıshtıaný Ronaldýǵa aýyp tur. Kóptegen rekordtardy jańartqan portýgal oıynshysy Kıevte ótetin oıynda baryn salýy kerek. Jalpy, Ronaldý fınalda óner kórsetý sany boıynsha tek Paolo Maldınıden (6 fınalǵa shyqqan) ǵana qalyp tur. О́tken jylǵy fınalda «Iýventýs» qaqpasyna 2 gol soqqan Ronaldý bul jarystyń tarıhynda 3 fınalda gol soqqan alǵashqy fýtbolshy retinde tirkelgen.
1981 jyly Parıjde bolǵan Chempıondar kýbogynyń fınalynda «Lıverpýl» «Realdy» 1:0 esebimen jeńip, úshinshi márte kýbokty ıelenip edi. Mine, sodan beri «Real» ózi óner kórsetken fınaldarda jeńilmeı keledi. Al sol Chempıondar kýbogy jarysynyń jolynda qos ujym 5 márte kezdesipti. Onyń úsheýinde «qyzyldar» jeńip, ekeýin «aqtar» utqan. Bul ujymdar sońǵy ret Chempıondar lıgasynyń 2014-2015-jylǵy maýsymynyń toptyq kezeńinde ushyrasty. Ol kezde eki oıynda da «Real» basym boldy.
«Realdyń» tájirıbesi mol ekeni baıqalyp tur, onyń kóptegen fýtbolshylary Chempıondar lıgasynyń tórt fınalynda óner kórsetken. Al «Lıverpýl» sapyndaǵy eshbir fýtbolshy buryn-sońdy fınalda oınamaǵan. Biraq brıtandyq klýb eýrokýbokterdegi tarıhynda 20-ret aqtyq synǵa shyǵyp otyr. Bas bapkeri Iýrgen Klopp 2011-2012-jylǵy Chempıondar lıgasynda «Realdy» jeńip, fınalǵa shyqqan. Alaıda ózderiniń ejelgi qarsylasy «Bavarııaǵa» jol berdi. Eger fınalda «Real» utatyn bolsa, onda Zınedın Zıdan bapker retinde aǵylshyn mamany Bob Peıslı men ıtalııalyq Karlo Anchelottı sekildi osy jarysty 3 ret utqandardyń qataryna enedi. Biraq Zınedın Zıdan bıyl da kýbok ıegeri atanar bolsa, 3 ret qatarynan jeńiske jetken alǵashqy bapker bolyp tirkeledi.
Mundaı qyzyqty málimetter, oıyn aldyndaǵy sholýlar, árıne jeterlik. Biraq barlyǵyn da alańdaǵy oıyn sheshedi. Qos ujym da qarap qalmasy anyq. Shabýyly kúshti «Lıverpýl» men tájirıbesi tolysqan «Realdyń» qaı-qaısysy da kýbok ıegeri atanýǵa ábden laıyq ujymdar.
Ermuhamed MÁÝLEN,
«Egemen Qazaqstan»
