Memleket basshysynyń bıylǵy halyqqa Joldaýynda kásipkerlik jańa ekonomıkanyń qozǵaýshy kúshi ekendigi atap aıtylyp, sala qyzmetkerlerinen jańashyldyqty ıgerý men endirýge qabiletti top qalyptastyrý mindettelgen edi. Osyǵan oraı óńirlerde atalǵan salany damytý jóninde biryńǵaı bıýdjettik baǵdarlama engizý tapsyrylǵan. Jetisý jerinde jyl ótken saıyn shaǵyn jáne orta kásipkerlikti damytý maqsatyndaǵy jumys jalǵasyn tapsa, 2009 jyly 235,3 myń adam jumyspen qamtylyp, óndirilgen ónim men qyzmet kórsetýdiń ádisteri jaqsara tústi. Shaǵyn jáne orta kásipkerlik jobalardy nesıelendirý maqsatynda “Damý” qorynan 1,5 mlrd., oblystyq bıýdjetten 550,0 mln. teńge bólinip, qarjylar qundy jobalardy júzege asyrýǵa baǵyttaldy. О́tken jyly oblystyq bıýdjetke túsken tólemder 12,4 mlrd. teńgeni qurap, jospar asyra oryndaldy.
Kúmisjan BAIJAN, Almaty oblysy.
3 203 000 000 Eýrazııalyq tabıǵı resýrstar korporasııasy — ENRC-tiń quramyna enetin “Eýrazııalyq energetıkalyq korporasııasy” AQ ótken jyly osynshama kılovatt-saǵat elektr qýatyn óndirdi. Mundaı óndiristik nátıjeler korporasııanyń kómir óndirý baǵytynda da kórinip, ol 4 mıllıon 636 myń tonnany qurady. Jalpy, oblystaǵy Aqsý qalasynda ornalasqan “Eýrazııalyq energetıkalyq korporasııasy” AQ óziniń quramyna Aqsý elektr stansasy, “Shyǵys” kómir kenishi jáne óndiristiń jóndeý bólimshesi sııaqty 3 qurylymdyq júıeni biriktiredi. О́ndiriste bul kúnderi 6702 adam jumys jasaıdy. Qazir korporasııa ınvestısııalyq baǵdarlama negizinde 1996 jyly paıdalanýdan shyqqan №2 energoblokty qalpyna keltirý boıynsha jóndeý jumystaryn júrgizýde. Energoblok iske qosylǵan soń, elektr stansasynyń qýaty 325 MVt-ǵa deıin kóbeıedi.
Farıda BYQAI, Pavlodar.
140 000 000 “Bolashaq” shaǵyn aýdanynda jaqynda ashylǵan bir aýysymda 150 syrqat qabyldaıtyn 3-shi qalalyq emhananyń fılıaly oblystyq bıýdjetke osynshama qarjyǵa tústi. Onyń qurylysyn “Aqtóbe-Sáýlet” JShS júrgizdi. Osy emdeý-profılaktıkalyq mekemesi “Bolashaq”, sondaı-aq 11 jáne 12 shaǵyn aýdandar turǵyndaryna medısınalyq qyzmet kórsetedi. Emhanada hırýrgııalyq, ınfeksııalyq aýrýlar, fızıoterapııa, dárigerge deıingi tekserý, egý jáne emdeý bólmeleri, zerthana, jyljymaly flıýrografııa bar. Emhananyń balalar bólimshesi balalar densaýlyǵyn qorǵaý ortalyǵynyń rólin atqarady. Halyqqa medısınalyq qyzmet kórsetý mekemesi eresekter men balalar úshin qajetti osy zamanǵy dıagnostıkalyq qondyrǵylarmen, bıohımııalyq jáne gematologııalyq zerthanalarmen jaraqtandyrylǵan. Sheteldik ozyq tehnologııalarmen jumys isteıtin mamandar arnaıy kýrstardan ótip, kásibı biliktiligin jetildirip keldi.
Satybaldy SÁÝIRBAI, Aqtóbe.
