Semınarǵa qatysýshylar kitaphanadaǵy IT-ortalyqtyń jumysymen tanysyp, jańa tehnologııanyń sońǵy múmkindikterin saralady. Qazir aqparattyq tehnologııanyń zamany. Kitaphanashylardyń jumysy baıaǵydaı oqýǵa alǵan kitaptardy tizimge alyp, qol qoıdyryp alýmen bitpeıdi.
Zaman kóshine ilesip, qarqynnan qalmaý úshin jańasha jumys jasaý júıesi usynylyp otyr. IT-ortalyqta kovorkıng, áńgimelesý, demalys aımaǵy, jekelegen jumys jasaýǵa arnalǵan oryndar, 2 konferens-zal, 3D stýdııa jáne tehnolaboratorııalar jumys jasaıdy. Rabotty tehnıkaǵa arnalǵan arnaıy oryndar da bar. Jınalǵandar aldynda sóz alǵan «Nur Otan» partııasy oblystyq fılıaly tóraǵasynyń birinshi orynbasary Ibadýlla Quttyqojaev:
– Jalpy IT-parkter «Sıfrly Qazaqstan» baǵdarlamasyn júzege asyrý aıasynda ashylyp jatyr. Qazir IT-mamandarǵa suranys artyp otyrǵandyqtan, bul park jumysynyń bir maqsaty Qyzylordaǵa IT-mamandardy shoǵyrlandyrý bolyp otyr. Olardy sıfrlandyrý jónindegi naqty jobalarǵa jumyldyryp, jumys jasaýǵa múmkindik beremiz, – dedi.
Semınarda oblystyq partııa fılıaly tóraǵasynyń birinshi orynbasary Elbasynyń partııa qyzmetin jańǵyrtý jónindegi tapsyrmasy boıynsha qolǵa alynǵan jańa partııalyq jobalardy tanystyrdy.
– Bıyldan bastap partııanyń bastamasymen «Rýhanı jańǵyrý» baǵdarlamasy aıasynda «Qazaqstannyń kitaphanalary» atty jańa joba qolǵa alyndy, – dedi ol. – Joba aıasynda elimizdegi kitaphanalar zamanaýı bilim ortalyǵy retinde qaıta qurylyp, kitap qorynyń elektrondy nusqalary daıyndalatyn bolady.
Ibadýlla Quttyqojaev aqparattyq tehnologııalar arqyly barlyq mektepterdegi jáne ýnıversıtetterdegi kitaphanalardy biryńǵaı onlaın kitaphanaǵa qosý, ınternetke qol jetkizý, qazirgi zamanǵy kitaptardy oqý men satý úshin ashyq keńistikter jasalyp jatqandyǵyn aıtty.
Budan soń Á.Tájibaev atyndaǵy oblystyq ámbebap-ǵylymı kitaphanasynyń dırektory Nurjamal Myrzamuratova sóz alyp, biryńǵaı onlaın-kitaphana júıesin qalyptastyrý, kitap qorlaryn elektrondy formatqa kóshirý baǵytynda oblysta qolǵa alynǵan jumystardy atap ótti.
Kitap qorlaryn elektrondy formatqa kóshirý qundy jádigerlerdi saqtap qalýmen qatar, búgingi zaman oqyrmandary úshin óte yńǵaıly. Jańa tehnologııanyń tıimdi jaqtaryn oı eleginen ótkizgen semınarǵa qatysýshylar ózderin tolǵandyrǵan suraqtarǵa meıilinshe jaýap aldy.
Baqtııar TAIJAN,
«Egemen Qazaqstan»
Qyzylorda oblysy
