«Kemel kásipker» chempıonaty Stýdentterdi kásipkerlik oılaýǵa, bıznesti júrgizý barysynda kezdesetin kedergilerdi sheshýge úıretýge baǵyttalǵan. Saıys ártúrli iskerlik oıyn túrlerinen quralǵan.
Qatysýshylarǵa ekonomıkalyq daǵdarysqa ushyraǵan kompanııalardy qutqarý jóninde bıznes-keısti sheshý týraly tapsyrma berildi. Stýdentter komandalarǵa birigip, kompanııa keńesshileri retinde jabylý aldyndaǵy bıznes nysandaryn qalaı qutqarý kerektigi jónindegi pikirlerin ortaǵa saldy.
«Kemel kásipker» chempıonatynda barlyǵy 200-ge tarta stýdent baq synady. Jarys qortyndysyna saı, Aqtóbe polıtehnıkalyq kolledjiniń «Avtomattandyrý jáne basqarý» mamandyǵynyń 2-3 kýrs stýdentterinen quralǵan VaBank jáne Q.Jubanov atyndaǵy Aqtóbe memlekettik ýnıversıtetiniń «Kólik tehnıkalary» mamandyǵynyń 1-kýrs stýdentteriniń KazTech komandalary jeńiske jetti. Jeńimpazdar jas kásipkerlerge arnalǵan Summer Boot Camp jazǵy lagerine joldama aldy.
«Chempıonat jastardyń ózin-ózi baǵalaýlaryna oń áserin tıgizgenin senimmen aıta alamyn. Jurt aldyna shyǵyp, erkin sóıleý, óz ıdeıalaryńdy qorǵaı bilý bul jarystan alǵan paıdamnyń bir bóligi ǵana. Biz basqa mamandyqta oqyǵanymyzben, naryq zamanynda kásipkerlik bilim artyq bolmaıdy»,-deıdi Aqtóbe polıtehnıkalyq kolledjiniń stýdenti Turar О́ksigenov.
Temir Qusaıyn,
«Egemen Qazaqstan»
Aqtóbe
