Sońǵy kezderi elimizdiń ár aımaǵynda beleń alǵan lańkestik oqıǵa eriksiz jaǵa ustatatyn boldy. Kúni keshe Almatynyń janyndaǵy Boraldaıda bolǵan oqıǵa qaı-qaısymyzdan da saqtyq pen qyraǵylyqty qajet etetindigin kórsetti. Beıbit ómirdiń berekesin ketirgisi kelgen qylmyskerlerdiń bul áreketine ana retinde laǵynet aıtamyn. Olardy da ana ómirge ákelip, aq sút berip, erteńinen úmit kútti ǵoı, átteń...
Dinı ekstremıstik árekettermen erteńine senimmen qaraǵan musylman qaýymynyń arasyna iritki salǵysy kelgen jeksuryndarǵa qandaı shara qoldansa da artyq emes. О́ıtkeni, olar búgingi beıbit tirshiligimizdiń irgesin sógýge tyrysyp jatyr.
Almaty oblysynyń Ile aýdanyndaǵy Boraldaı eldi mekeninde bolǵan oqıǵany sonyń bir naqty aıǵaǵy dep túsinemin.
Allanyń jaratýymen bul ómirge qonaq bolyp keldik. Allanyń biz úshin qandaı keremet ǵalamdy jaratqanyna tańǵalmaýyń múmkin emes. Osyndaı sezimnen keıin barlyq maqtaýlar men madaqtaýlardyń tek qana Allaǵa laıyq ekenin túsinesiń. Biraq, kóbimiz Táńir bergen sansyz nyǵmetke toıymsyzdyqpen qarap, masaıatyn sátterimiz bolady-aý degen oı keledi. Maskúnemde, toǵysharda aqyl-es bolady dep kim aıta alady. Ondaılarǵa eshkimniń kóńili tolǵanyn kórgen emespin. Ondaı adam óziniń bilgenin jasaıdy. Al uıatsyzdyq pen ımansyzdyq ústemdik qurǵan jerde janymyzdyń, tánimizdiń, jalpy ómirdiń tynyshtyǵy buzylady. Dál osyndaı essizderdiń tirligi urpaqqa da, qoǵamǵa da úlken kesel keltirip jatyr.
Balanyń durys tárbıe alýyna otbasyndaǵy áke-sheshe mindetti. Qunarly jerge otyrǵyzylǵan, kútimi jaqsy aǵash kúni erteń máýeli jemis beredi. Bala da osyndaı. Aınalamyzǵa bir qaraǵanda bári ádemi, sulýlyǵynda shek joq, keremet. Osy sulýlyqty bireýlerdiń túsinbeıtini qınaıdy. Ata-anaǵa qamqor bolatyn balalarymyzdy qaıdaǵy bireýler óziniń aram pıǵylyna paıdalanyp, jeti atada joq jıirkenishti áreketke barǵyzyp otyr.
Iá, biz almaǵan qamal joq. Qandaı qıyndyqty da halqymyz adaldyǵy men ádilettiligi, kózsiz batyrlyǵy arqasynda jeńip, talaı ótkelden ótip, beıbitsúıgishtigin dáleldedi. Ony álem halqy biledi, moıyndady. Búgin Abaıdy, Jambyldy, Shákárim, taǵy basqa danalarymyzdy kim tanymaıdy. Abaıdyń asyl murasyna zer salsaq, qazirgi ómirde bolyp jatqan jáne ultymyzdyń aldyndaǵy bar dúnıeniń sheshimin aıtyp, jol siltep turǵan joq pa. Kóp balaly ana retinde kórshi aýyldaǵy qantógis qolyma eriksiz qalam aldyrdy. Oıymdy ashyq aıtýǵa úndedi.
Sanaly ǵumyr keship, salıqaly iz qaldyrý úshin kókiregimiz nurly bolýy kerek. Otbasynda bala-shaǵamen birge oılanyp, olardyń ómirde adaspaıtyn joldy tańdaýyna baǵyt-baǵdar siltesek, olar áldekimderdiń azǵyrýyna barmas edi. Sonda ǵana qoǵamǵa eli men jerin súıetin urpaq daıyndaı alamyz. Esimizdi jınaıyq, baıandy ǵumyr keshkimiz kelse, ulttyq sanamyzdy, salt-dástúrimizdi, babadan qalǵan tekti joldy saqtaıyq, aǵaıyn. Tynyshtyǵymyz ben baqytty ómir úshin qyraǵy bolaıyq qashanda.
Altyn NURǴISAEVA, kóp balaly ana.
Almaty oblysy, Ile aýdany, Jetigen aýyly.
