Forýmnyń uıymdastyrýshylary Almaty qalasy ákimi apparatynyń «Qoǵamdyq kelisim» KMM jáne Almaty qalasy etnomádenı birlestikter janyndaǵy jastar qanaty bolyp tabylady.
Forýmda «Bolashaqqa baǵdar: rýhanı jańǵarý» baǵdarlamalyq maqalasy aıasynda sandyq jýrnalıstıkanyń múmkindikteri talqylandy. Forýmdy ashqan «Qazaqstan uıǵyr jastar odaǵynyń» tóraǵasy, QHA múshesi R.A.Kaıryev jańa tehnologııalar kezeńiniń múmkindikteri turǵysynda birqatar mysaldardy ortaǵa saldy. Sandyq júıege kóshýde jastardyń úlesi zor, dep atap kórsetti. Almaty qalasy QHA tóraǵasynyń orynbasary K.VMamsýrov elimizdiń sandyq júıege kóshýdegi jobalarynda jastarǵa úlken jaýapkershilik júkteletinin aıta kele, aldyńǵy býyn jańa tehnologııalardyń jetistikterin jastardan úırenedi degen pikirin bildirdi.
Al ál-Farabı atyndaǵy QazUÝ IýNESKO, halyqaralyq jýrnalıstıka jáne qoǵamdyq medıa kafedrasynyń meńgerýshisi, professor N.T.Shyńǵysova jýrnalıstıkanyń qoǵamdy saýyqtyrýdaǵy, elimizdiń bedelin kóterýdegi róliniń joǵary ekendigine toqtalyp, búgingi tańda qaýipti mamandyqtar qataryna engendigi týraly aıta kele aqparattyq qaýipsizdik, jýrnalıstiń quqyǵy, sandyq formatqa kóshýdegi jańa múmkindikteri týrasynda oıyn ortaǵa saldy.
Al Dostyq úıiniń dırektory J.K.Shaımuhanbetova QHA jastar belsendiligi týrasynda sóz qozǵap, «Jarasym joly» jastar qozǵalysynyń jumysyna toqtalyp, sandyq júıege kóshýdegi jastardyń bastamalaryna sát-sapar tiledi.
Almaty qalasy boıynsha «Jańǵyrý joly» jastar qozǵalysynyń tóraǵasy, saıasatker I.B.Kýraev «Memleketti sıfrlandyrý: múmkindikteri men bolashaǵy» taqyrybynda baıandama jasap, qazaqstandyq jastar jańa zamannyń úılestirýshisi dep atap kórsetti. Iаǵnı, sandyq júıege kóshýde elimizdiń alys aımaqtary men ortalyqtaryn baılanystyrýdaǵy negizgi kópir bolyp tabylatyn jastar qaýymy jyldam, zerek, qaǵilezdik basymdyqtaryna ıe bolý arqyly elimizdiń osy baǵyttaǵy úderisteriniń belsendi qatysýshylary bolyp tabylatyndyǵyn jetkizdi.
QKHP uıymdastyrý partııa sektorynyń meńgerýshisi A.S.Áýelbekov «Qazaqstan Respýblıkasyndaǵy sıfrlyq tehnologııalardyń damýy» taqyrybyndaǵy baıandamasynda elektrondy úkimettiń múmkindikteri, sandyq júıedegi jańashyldyqtar týrasynda derekter keltirdi.
Almaty qalasy ákimi apparatynyń "Qoǵamdyq kelisim" KMM dırektory J.Sh.Murynova «Jańǵyrý joly», «Jarasym» jastar qozǵalysynyń kez kelgen jobalaryna qoldaý bildiretindigin aıtyp, jastardyń jaýapkershiligi joǵary dep atap kórsetti.
Forým aıasynda R.A.Kaıryev jas jýrnalısterge arnalǵan «Zharasym magazine» jańa elektrondy jýrnalyn tanystyrdy. Uıymdastyrýshylardyń pikirinshe, jańa jýrnaldyń múmkindikteri zor. Qazaq tilin meńgerýde de, latyn qarpin ıgerýdegi dáneker basylym bolyp tabylady. Jýrnal paıdalanýshylarǵa tegin ári qoljetimdi bolyp tabylady. Osy turǵyda pikir bildirgen qatysýshylar «Zharasym magazine» jýrnalynda qazaqstandaǵy etnos ókilderi jastarynyń belsendiligi týrasynda jáne barshamyzǵa ortaq qazaq tilin ıgerýge baılanysty maqalalar osy jýrnalda jıi jarııalanyp turýy tıis degen pikirlerin bildirdi.
Elvıra SERIKQYZY,
«Egemen Qazaqstan»
ALMATY
