Jıynǵa Ulttyq Olımpıada komıtetiniń (UOK) bas dırektory Nurlan Nógerbek, Elbasy kitaphanasy dırektorynyń orynbasary Ámirhan Rahymjanov jáne Serik Sápıev, Vasılıı Levıt, Denıs Ten, Gýzel Manıýrova, Qaırat Erálıev pen Abzal Ájǵalıev sııaqty dańqty olımpıadashylar qatysty.
Sharanyń ashylý saltanatynda sóz alǵan Nurlan Nógerbek ekspozısııany kórgen óskeleń urpaq elimizdiń sporttyq tarıhymen jáne chempıondarymyzdyń jigerli jeńisimen qanattanatyny sózsiz deıdi. «Osydan birer kún buryn Memleket basshysy respýblıkadaǵy sporttyq bastamany qoldaý maqsatymen vıdeo úndeý joldady. Ol sportpen shuǵyldaný tek qana fızıkalyq kúsh pen densaýlyqty jaqsartyp qoımaı, erik-jigerdi jaqsartyp, tabysqa jetelep, joǵary moraldyq jáne rýhanı baılyqty arttyratynyna nazar aýdardy. Men bul ekspozısııanyń óskeleń urpaqqa óte qyzyqty bolaryna kúmán keltirmeımin. Elimizdiń sporttyq tarıhymen jáne chempıondarymyzdyń jigerli jeńisimen tanysqan soń balalardyń qanattanatyny sózsiz», dedi UOK bas dırektory N.Nógerbek.
Ekspozısııaǵa qoıylǵan sporttyq buıymdar kelýshilerge Olımpıadalyq qozǵalysty damytýǵa arnalǵan Memleket basshysynyń bastamalaryn, qazaqstandyqtardyń salamatty ómir súrý saltyn qoldaný erejelerin túsindiredi. Sondaı-aq materıaldyń biraz bóligi Ulttyq Olımpıada komıtetiniń qurylý tarıhy, onyń Halyqaralyq Olımpıada komıteti (HOK) tarapynan moıyndalýy jáne qazaqstandyq sportshylardyń Olımpııa oıyndaryndaǵy jeńisine arnalǵan. Ekspozısııany tamashalaýshylar HOK prezıdentteriniń Elbasyna tartý etken syılyqtaryn, UOK-niń qurylǵanyna 25 jyl tolýyna oraı tartý etilgen syılyqtar men chempıondarymyzdyń muraǵatyndaǵy jeke zattardy tamashalaı alady.
Sonymen qatar shara aıasynda Sochı Olımpıadasynyń qola júldegeri Denıs Ten «Silk Road» baǵdarlamasyna kıgen kıim úlgisin ekspozısııaǵa tartý etti. «Qazaqstannyń Olımpıadalyq qozǵalysy» ekspozısııasynyń ashylý saltanatyna qatysqanyma qýanyshtymyn. Sharaǵa óz úlesimdi qosý úshin sporttyq kıimimdi tabys ettim», deıdi Denıs Ten.
Atalǵan ekspozısııanyń basty ereksheligi – ınteraktıvti aımaq. Ekspozısııany tamashalaýǵa kelgen árbir kórermen ziltemir kóterý arqyly ózin sportshy retinde synaı alady. Sondaı-aq olımpıadashylardyń músinderimen sýretke túsip, tuǵyrda turý arqyly ózin chempıon retinde sezinýge de múmkindikteri bar.
