Jarystyń shymyldyq ashar kúni dzıýdoshylarymyz úshin sátti bastalǵanymen, básekeniń qalǵan kúnderi otandastarymyz tuǵyr bıigine kóterile almady. Dodanyń alǵashqy kúni Ulttyq qurama sapynan tatamıge shyqqan tórt balýanymyz úsh medal oljalady. 60 kıloda beldesken Rıo Olımpıadasynyń kúmis júldegeri Eldos Smetov pen Ǵusman Qyrǵyzbaev fınalǵa deıin qarsylas shaq keltirmeı, ekeýi fınalda jolyqty.
Eldos Smetov jarys jolyndaǵy alǵashqy beldesýin japonııalyq Iýma Oshımany qosymsha ýaqytta (golden skor) vazarı upaıymen, ekinshi aınalymda reseılik Robert Mshvıdobadzeni ýaqytynan buryn taza jeńip, jartylaı fınalǵa joldama aldy. Jartylaı fınalda Brazılııa dzıýdoshysy Pelım Felıpeni ıppon upaıymen utyp, fınalǵa shyqty.
Al Ǵusman Qyrǵyzbaev fınalǵa deıin jeńilissiz úsh kezdesý ótkizdi. Alǵashqy beldesýinde soltústikkoreıalyq Pae Dong Jongpen kezdesip ıpponmen jeńse, ekinshi beldesýinde álem jáne Azııa chempıony mońǵolııalyq Ganbad Boldbaatardan basym tústi. Jartylaı fınalda taǵy bir mońǵolııalyq balýan Amartývshın Dashdavaany ýaqytynan buryn ıppon upaıymen qapy qaldyryp, sheshýshi kezeńge joldama alǵan-dy.
Eki qazaq oǵlany kezdesken fınaldyq saıysta Eldos Smetovtiń baǵy janyp, Gran-prı jeńimpazy atandy. Ǵusman Qyrǵyzbaev bolsa kúmis medaldy qanjyǵalady. Al 66 kılo salmaqta jarys jolyna shyqqan Eldos Jumaqanov el qorjynyna qola medal saldy. Ol bes kezdesý ótkizip, tek bireýinde, jartylaı fınaldyq joldama úshin kúreste germanııalyq Sebastıan Seıdlge ese jiberdi. Al jubanysh fınalynda Abdýlla Abdýjalılovty vazarı upaıymen jeńip, qola júldeni jeńip aldy. 66 kıloda beldesken taǵy bir balýanymyz Erlan Serikjanov jartylaı fınalda Rıo Olımpıadasynyń kúmis júldegeri mońǵolııalyq An Ba Ýldan jeńilip qaldy.
Gran-prı jarysynyń úshinshi kúninde tatamı tórine Qazaqstan quramasynan Bekádil Shaımerdenov (73 kg), Jansaı Smaǵulov (73 kg), Dıdar Hamza (81 kg) jáne Azız Qalqamanuly (81 kg) kóterildi. Bul dzıýdoshylar arasynan Jansaı Smaǵulov qana jubanysh beldesýine deıin jetti. Medalǵa joldama berer synda Smaǵulov reseılik balýannan aılasyn asyra almady. Al qalǵan balýandarymyz ekinshi beldesýden ári asqan joq.
Sońǵy jarys kúninde 90, 100 jáne +100 kılo salmaqtaǵy balýandarymyz júlde úshin beldesip kórdi. Jyl basynda Týnıste ótken Gran-prı jarysynda top jarǵan Islam Bozbaev (90 kg) bul joly ekinshi aınalymda jeńildi. Birinshi aınalymda Iran balýanyn jeńgenimen, ekinshi aınalymda túrikmenstandyq balýanǵa ese jiberdi. Sonymen qatar 100 kıloda synǵa túsken Vıktor Demıanenko da ekinshi aınalymnan asa almady.
+100 kılo salmaqta beldesken Sanjar Jabborov pen Erasyl Qajybaev birinshi aınalymnan súrinbeı ótkenimen, ekinshi kezeńde qarsylastaryna ese jiberip qoıdy. Jabborov koreı balýanynan jeńilse, Kajybaev Iran balýanynan utyldy.
Qazaqstan quramasy jalpy komandalyq esep boıynsha 49 eldiń ishinde bir altyn, bir kúmis jáne bir qola medal enshiledi. Medal sany boıynsha bes altyn oljalaǵan Japonııa quramasynyń balýandary kósh bastady.
