Úshinshi bolyp JSDP tirkeldi

Keshe Ortalyq saılaý komıssııasy Jalpyulttyq sosıal-demokratııalyq partııasynyń (JSDP) Qazaqstan Respýblıkasy Parlamenti Májilisiniń depýtattyǵyna 54 kandıdat engizilgen partııalyq tizimin tirkedi. JSDP-nyń tirkelgen par­tııa­lyq tizimindegi kandıdattardyń quramynda bes ulttyń ókili bar. Olardyń 25 paıyzyn áıelder qu­raıdy. Tizimge engizilgen kandı­dat­tardyń 40 paıyzy jasy 55-ke deıingiler. Al eń jas úmitkerdiń jasy – 25-te. Bilimderine kelsek, kandıdattardyń 96 paıyzy jo­ǵa­ry bilimdi. Olardyń úshten birine jýyǵynyń mamandyqtary zań­ger jáne ekonomıst bolyp keledi. Úmitkerlerdiń 25 paıyzdan astamy túrli halyq sharýa­shy­lyǵy salalarynyń mamandary. Jalpyulttyq sosıal-demo­kra­tııalyq partııasynan usy­nyl­ǵan kandıdattardyń jartysynan kóbi partııalyq qurylymdardyń nemese basqa da qoǵamdyq uıym­dar­dyń qyzmetkerleri bolyp ta­bylady. Atap aıtqanda, 18 paıy­zy kommersııalyq uıymdarda, 7,5 paıyzy ǵylym, mádenıet jáne bilim salalarynda jumys isteıdi. Ortalyq saılaý komıssııa­sy­nyń tóraǵasy Qýandyq Tur­ǵan­qulovtyń habardar etýinshe, 9 jeltoqsan kúngi jaǵdaı boıynsha máslıhattar depýtattarynyń saı­laýyna barlyǵy 4500 kandıdat usynylǵan. Olardyń ishinde oblystyq, Astana men Almaty qalalyq máslıhattarǵa usy­nyl­ǵan 407, aýdandyq máslıhattarǵa – 3392, qalalyq máslıhattarǵa – 701 kandıdat bar. Keshegi kúnge deıin máslıhattar depýtat­ty­ǵyna 63 kandıdat tirkelgen. Álısultan QULANBAI.