Abaıdyń «Aıttym sálem, Qalamqas» ánin áýelete shyrqaǵan akterler toby kórermen qaýymdy teatrdyń eki qanatyna tizilgen kórkem dúnıelerdi tamashalaýǵa shaqyrdy.
Saltanatty keshte teatr dırektory Ashat Maemırov búginde mýzeı qorynda úsh júz myńnan asa qundy jádigerdiń bar ekendigin jetkizdi. Teatr basshylyǵy mýzeıdiń alǵashqy janashyry Zeınep Moldabaevaǵa arnaıy Alǵys hat tabys etip, ómirden ótken sahna sańlaqtaryna tıesili buıymdardyń etek-jeńin jınap, kóziniń qarashyǵyndaı qamqorlyq jasap, júıelep júrgen mýzeı jetekshisi Nargız Tamabekqyzyna shapan jaýyp, qurmet kórsetti.
Mýzeıdegi eń kóne kostıým «Amangeldi» fılmindegi Elýbaı О́mirzaqov kıgen eki shapanǵa toqsanǵa jýyq jyldyń júzi bolypty. Al sahna sańlaǵy Serke Qojamqulovtyń grımerlik bólmesindegi sary shapany, oryndyq, aınasy, t.b. buıymdary jáne de shamasy ótken ǵasyrdyń 60-jyldary bolýy kerek, Q.Badyrov, Á.Mámbetov, t.b. teatr tarlandary áńgime-dúken quryp otyrǵan kreslo ótken kúnderdiń habarshysyndaı menmundalaıdy.
Mýzeı eksponattarymen kelýshilerdi tanystyrǵan Qazaqstannyń halyq ártisi Asanáli Áshimov sahna tarlandarynyń ıisi sińip, kıesi juqqan kıimderi men buıymdaryna zer sala qarap, «Árqaısymyz úshin mańyzy joǵary osynaý qadirli buıymdarǵa men beıjaı qaraı almaımyn» dedi tebirenisti únimen. Al Qazaqstannyń halyq ártisi Sábıt Orazbaev «Bul jádigerlerdiń elimizdiń tarıhynda alar orny erekshe, bizdiń baǵa jetpes altyn qorymyz» dep mýzeı sóresinde sap túzegen ár jyldardaǵy spektaklder afıshasyna kórermenderdiń nazaryn aýdardy. Sonymen birge Á.Mámbetov qyzmet etken jyldardy eske túsirip, talantty rejısserdiń teatrdyń baǵyna bitken erekshe tulǵa ekendigin aıtyp, shaǵyn estelikterimen bólisti. Mýzeı jetekshisi N.Tamabekqyzy teatrlandyrylǵan kórinis barysynda Sábıra Maıqanova, Nurmuhan Jantórın, Sháken Aımanov, Hadısha Bókeeva, Sholpan Jandarbekova, t.b. sahna sańlaqtarynyń spektaklderde kıgen kostıýmderin tanystyrdy.
Elvıra SERIKQYZY,
«Egemen Qazaqstan»
ALMATY
