– Ol 6 metr qashyqtyqtan atqanda dál tıgizip, asyqtardy sheńberdiń syrtyna shashyp jiberedi. Biraq sheńberdiń ishinen atqanda shamaly qatelikter jiberip aldy. Oqasy joq, jattyǵýlarda onyń ádisterin jetildiremiz, sonda Danılge teń keler eshkim bolmaıdy, – dep asyq atýdan oblystaǵy aǵa jattyqtyrýshy Kárishal Kákeshev jelpinip qoıdy.
Danıl Fedorov aýdanyndaǵy Vladykın aýylyndaǵy shaǵyn jınaqty ortalaý mektebiniń altynshy synybyn bitirdi. Sonda deneshynyqtyrý páninen beretin Asqar Dosanov aǵaıy aýyl balalaryna asyq atýdan úıirme júrgizedi. Ol Danıldiń kishkentaı kezinen eptiligin baıqap, ony aýdandyq, oblystyq jarystarǵa apara bastaıdy.
– Danıl respýblıkada asyq atý ulttyq sportynan ótetin jarystar tarıhynda sheberligimen kózge túsken ulty qazaq emes alǵashqy oıynshy. Qostanaılyq uldar komandasy osy joly Danıldiń arqasynda úshinshi orynǵa ilikti. Onyń ózine asyq atý oıyny óte unaıdy, jattyǵýdan qalmaı uqypty qatysady. Asyqty shıyryp atqanda ekiniń birin jolda qaldyrady. О́ner men sport ult tańdamaıdy, – deıdi Kárishal Kákeshev.
Halqymyzdyń asyq atý ulttyq oıyny IýNESKO-nyń materıaldyq emes mádenı qundylyqtar tizimine kirgennen keıin oblys aýdandary men qalalaryndaǵy mektepterde úıirmelerde kóbeıdi. Qazir aýyldarda, aýdandarda asyqtan jarystar jıi ótedi, onyń tanymaldyǵy keńeıip keledi. Respýblıkalyq chempıonatta Rýdnyı qalasyndaǵy №15 orta mektepten jasaqtalǵan qyzdar komandasy birinshi oryndy jeńip aldy. Olardyń barlyǵy da asyq atýdyń bilgir jattyqtyrýshylarynyń biri Ǵalınur Bektepovtiń shákirtteri.
Mine, bir kezderi qazaq mektebi bolmaǵan kenshiler qalasynda qazir ulttyq sport oıyndary osylaı qanatyn keń jaıyp keledi.
Názıra JÁRIMBET,
«Egemen Qazaqstan»
QOSTANAI
