«Urpaqtar sabaqtastyǵy» atalymynda Mamlıýt aýdanynan kelgen Sháýkerovter jeńimpaz atandy. Ýálıhanov aýdanynyń namysyn qorǵaǵan Qasymbekovter ıbaly toǵyz bala tárbıelep, 17 nemere, 2 shóbereniń qyzyǵyn kórip otyr. «Ustaz bolý – júrek qalaýy» atalymy boıynsha jeńistiń eń bıik tuǵyryna kóterilgen Dúısenbınderdiń pedagogıkalyq jumys ótili 200 jylǵa taıaý. Ata-ananyń jolyn qýǵan ul-qyzdary Novoıshımka mektebinde eńbek etedi. Osylaısha alty atalym sarapqa salynyp, júldeli oryndar óz ıelerin tapty.
Jalpy, baıqaýdyń qorytyndysynda ekinshi orynǵa ıe bolǵan Shegolevter týǵan aýylyna byltyr 18 mıllıon, bıyl 6 mıllıon teńgeniń qarjylyq qoldaýyn jasapty. Olarmen teń óner kórsetken Muhamedııarovtardy bastap kelgen otaǵasy Bolat pen otanasy Mafrýza alty ulyn uıaǵa qondyrǵan. Bári de shetinen ónerpaz. Uldarynyń biri halyqaralyq «Shabyt» baıqaýynyń laýreaty. Búginde Kókshetaýdaǵy Birjan sal atyndaǵy óner kolledjine jetekshilik etedi.
Birinshi oryndy Ektovtar men Isaqovtar áýleti bólisti. Petropavldyq Ektovtardyń sport salasyndaǵy tabystary aýyz toltyryp aıtarlyqtaı. Aleksandr 1998 jyldan beri jeńil atletıkadan aǵa jattyqtyrýshy bolyp isteıdi. Osy aralyqta 4 halyqaralyq dárejedegi sport sheberin, 8 sport sheberin daıyndap shyǵarǵan. Áıeli Nına da jattyqtyrýshy. Uldary álemdik jarystarda olja salyp júr.
Isaqovtar 2004 jyly О́zbek- stannan Jambyl aýdanyna qonys aýdaryp, sodan beri úlgili otbasy retinde aýyldastarynyń qurmet-qoshemetine bólengen. Saparhan qazaq tili pániniń muǵalimi bolsa, Saıra shaǵyn ortalyqta tárbıeshi. Áýlet jetimder úıinen asyrap alǵan Artem, Katıa, Grıgorıı, Marııa degen jetkinshektermen tolyǵypty. Olardy ózimizdiń kindigimizden órbigen tórt baladan kem kórmeımiz. Úıde qazaq tilinde sóılesemiz, deıdi Saıra.
О́mir ESQALI,
«Egemen Qazaqstan»
Soltústik Qazaqstan oblysy
