Atalmysh konferensııa bıznestiń aýqymyn keńeıtý úshin iskerlik mashyqty jetildirýge jáne qarjylaı qoldaýǵa muqtaj bıznespen aınalysyp júrgen qyz-kelinshekterge, atqarýshy dırektorlarǵa, eki jyldan beri óz isin turaqty damytyp jatqan shaǵyn jáne orta bıznes ókilderine arnalǵan.
«Bıznestegi áıelder» baǵdarlamasy Eýropalyq Qaıta qurý jáne damytý bankiniń jáne de QR úkimeti qarjylandyrýymen 2015 jyldan bastap Qazaqstanda qyzmet etip keledi.
WECON konferensııasy – áıelderdiń jasyna qaramaı, barlyq ekonomıkalyq múmkindikterin ashýǵa, bıznes barysyndaǵy qajetti bilim men daǵdylardy damytýǵa, kásipkerliktiń aýqymyna qaramastan oǵan qoldaý kórsetýdi kózdeıdi.
Sonymen Qaraǵandy, Shymkent, О́skemen, Aqtóbe, Atyraý jáne Qostanaı syndy Qazaqstannyń eń iri qalalarynda ótken bul is-sharaǵa bıyl 300-den asa adam qatysty.
Konferensııa qatysýshylary "Bıznesti kóp tabys kózine aınaldyratyndaı qalaı damytý qajet?", "Jetekshi bıznes-keńesshilerdi jáne tájirıbeli tálimgerlerdi qaıdan tabýǵa bolady?" degen saýaldar tóńireginde mashyqtandy.
Sondaı-aq, isker qyz-kelinshekter sabaqtas salalardaǵy múddeles áriptesterimen tanysyp, tájirıbe almasyp, tabysty áıelderdiń mysalyn estip, shabyt aldy.
Almatyda ótken baspasóz májilisinde konferensııanyń qorytyndysyn shyǵaramyz. Májilis aıasynda kásipker áıelder arasyndaǵy otandyq bıznes-ındýstrııanyń jaǵdaıy, elimizdiń túrli óńirlerindegi kásipkerliktiń erekshelikteri talqylanyp, shaǵyn jáne orta bıznesti qoldaýǵa arnalǵan tásilderge sholý jasaldy.
Aınash ESALI,
«Egemen Qazaqstan»
