Osydan alty jyl buryn zamanaýı bilim berý úlgisinde alǵashqy shákirtterin qabyldap, oqytýdy bastaǵan bilim oshaǵy halyqaralyq standartqa saı bolý úshin kásibı turǵyda qyzmet etip keledi. Buǵan deıin Halyqaralyq mektepter keńesiniń sarapshylary birneshe ret kelip, mekteptegi bilim berý júıesin Halyqaralyq mektepter keńesiniń 7 standarty, ıaǵnı «Mektepti basqarý erejeleri», «Oqytý jáne oqý», «Basqarý jáne kóshbasshylyq», «Qyzmetker», «Oqytý men oqýǵa qoljetimdilik», «Mektep mádenıeti jáne oqý barysyndaǵy seriktestik», «Resýrspen qamtamasyz etý» boıynsha baqylaý jáne baǵalaý júrgizdi. Atalǵan uıymnyń sońǵy sheshimin qabyldaý sapary osy jyldyń 7-13 sáýir aralyǵynda ótken bolatyn. Nátıjesinde mektep óziniń uıym anyqtaǵan standarttarǵa sáıkestigin dáleldep, halyqaralyq dárejedegi bilim berýge qabiletti ekenin moıyndatty.
Aıta keteıik, Halyqaralyq mektepter keńesi - mektepterdi akkredıtasııalaý jáne oqytýdyń ozyq ádisterin ázirleýmen aınalysatyn halyqaralyq bilim berý júıesindegi uıym. Onyń quramy dúnıejúziniń 116 elindegi 738 mektep pen 583 kolledjdi qamtıdy. Atalmysh qaýymdastyqtyń akkredıtasııasyn alý halyqaralyq bilim berýdegi kóptegen is-sharalarǵa, túlekter úshin aldyńǵy qatarly oqý oryndaryna, muǵalimderdiń túrli kásibı baıqaýlarǵa, konferensııalarǵa erkin qatysýyna, túrli bilim resýrstaryna, halyqaralyq uıymdarmen seriktestikke jol ashady. Sonymen qatar bilim berý prosesinde atalmysh uıym árdaıym qoldaý men keńes berip otyrady.
