Foto: Nazgúl TALǴATQYZY
- Búgin mine, oqýshylardyń dástúrli túrde jazǵy demalys oryndary ashylyp jatyr. «Nur Otan» partııasy jańa áleýmettik aıasynda óńirimizde IT synyptaryn ashý, mektep oqýlary janynda ashanalar jáne úsh tuǵyrly til – aǵylshyn tilin úırený baǵyttary boıynsha júıeli jumys júretin bolady. Qazaqstan úshin úsh tuǵyrly til – eldiń básekege qabilettilikke umtylýdaǵy mańyzdy qadam. О́ıtkeni, birneshe tilde erkin sóıleı de, jaza da biletin adam óz elinde de, shetelde de básekege qabiletti tulǵaǵa aınalady. Búgingi demalys lagerinde jaz boıy 400-ge jýyq oqýshy 4 aýysymda ári demalyp, ári aǵylshyn tilinde sóıleý daǵdysyn jetildiretin bolady, - deıdi «Nur Otan» partııasy Batys Qazaqstan oblystyq fılıalynyń Saıası jumys bóliminiń konsýltanty Arhat Islamǵalı.
Bıyl Batys Qazaqstan oblysynda tuńǵysh ret qolǵa alynyp otyrǵan til úırený lageri 4 aýysymnan turady. Mamyr aıynyń 28-inen bastalǵan alǵashqy aýysym 6 maýsymǵa deıin sozylmaq. «Dostyq qushaǵynda» dep atalǵan bul topta múmkindigi shekteýli 78 bala demalyspen birge til úırenýdi de bastap ketipti.
- Lagerde ádettegi tárbıeshilerden bólek, aǵylshyn tilin jetik meńgergen volonterler qyzmet etedi. Olar aǵylshyn tiliniń sabaqtaryn oıyn túrinde ótkizedi, - deıdi «Nur Otan» partııasy Batys Qazaqstan oblystyq fılıalynyń baspasóz hatshysy Nazgúl Qojanbaeva.
Lagerde 11-20 maýsym aralyǵynda ótetin ekinshi aýysym «Jas erýdıtter» dep atalady. Oǵan jaratylystaný-matematıka baǵytyndaǵy barlyǵy 105 oqýshy qatysady. Al gýmanıtarlyq baǵytta bilim alyp júrgen 105 úzdik oqýshy qatysatyn úshinshi aýysym 25 maýsymnan 1 shildege deıin sozylady. Aıta ketetin jaıt, bul topta Reseı Federasııasynda turatyn qandastarymyzdyń otbasynan 17 oqýshy demalady. Eń sońǵy, tórtinshi aýysymda patronattyq tárbıedegi balalar ata-anasymen birge – 70 bala, 25 ata-ana demalady dep kútilýde.
Qazbek QUTTYMURATULY
«Egemen Qazaqstan»
