Sahna – kıeli oryn. Abaılamasań, kıesi urady. Búgingi kúni sahnanyń kıesine ushyrap júrgender qanshama... Tipti kún sanap olardyń qatary kóbeıýde desek, jańyla qoımaspyz. Olardy kórip, kezindegi ata-babalarymyzdan ulyqtalyp kele jatqan ulttyq ónerimizdiń sarqyty bolǵan jastarǵa sana bersin deısiń! Kezindegi «áý demeıtin qazaq joq» dep keńinen etek jaıǵan sóz, búginde «aýzy bardyń bári ánshi» degen zamanaýı naqylmen jalǵasyn tapty.
«Operaǵa barǵanda estradaǵa janym ashıdy», dep Talǵat Temenov aıtqandaı, búgingi estradanyń hal-jaıy máz emes. О́ıtkeni sany kóp, sapasy joq óner ıeleri qumyrsqadaı qujynap júr. Olar ónerimen daralanyp jatsa ıgi ǵoı, Batysqa eliktep, óziniń ata-babalary qaldyrǵan ónerdi dáriptep júrgendeı alańsyz júrgenderin kórmeısiń be!?
Kók jáshiktiń tórinen kórinip, dúıim jurtqa ónerin tanytý – úlken jaýapkershilik. Tabıǵı daýsymen tamsantyp, ónerimen órshelenip, daryndylyǵymen daralanyp kózge tússe eldiń alǵysyn alady. Al jaǵymsyz jaǵynan kózge tússe eldiń qarǵysyn alady. Buryn daýsy barlar ánshi edi. Qazir aýzy bardyń bári ánshi. Degenmen de taırańdap tanaýyn kókke kóterip júrgen ánshisymaqtar, kezindegi án ónerin áýeletken Bıbigúl, Roza, Mádına apalarymyzdyń deńgeıine jetpeıtinin esten shyǵarmaǵan jón!
Baıqasańyz estrada óneri túrli ánshiler men túrli toptarmen jańarýda. Shynymen de, ár kún saıyn jańa túr, jańa stıl, jańa top. Quddy shetelde júrgendeısiń! Obrazdary múlde ózgeshe! Qarapaıym ǵana qaratory qyz-jigitterimizdi adam tanymastaı ózgertetindeı Batystyń qudirettiligi nede eken? Túsinbeımin! Aıtpaǵandy aıtyp ákireńdeıdi, mán-maǵynasyz sózimen máńgúrt etedi, qısynsyz qylyǵymen qytyǵyńa tıedi, uzyn sózdiń qysqasy, sahnadaǵy saıqymazaqtarǵa san jetpeıdi búginde.
Jańashyldyqqa jany qumar jastaryń ónerinen buryn keskin-kelbetine erekshe kirpııazdyqpen qarap, kóńil bóletini de shyndyq. Bárinen buryn kıgen kıim úlgisimen qazaq ultynyń namysyna nuqsan keltirýde. Sanany ýlap tizbektelgen suraqtar óte kóp, al jaýap... О́zderinen surasań, «muny tek jastar túsinedi», «zaman aǵymynan qalyp ketkensiń», «zamanyna qaraı adamy» degen syndy syltaýlardy alǵa tartyp suraqtan jaltarady. Al osylardy úlgi tutyp kele jatqan jasóspirimderdiń sany artyp kele jatqandyǵyn kórseń, basyńdy tómen salbyratyp, kirerge tesik tappaısyń! Eń ókinishtisi de osy... Kezindegi M.Jumabaev sengen jastar qandaı edi? Al búgingi jastar qandaı? Arasy jer men kókteı. «Jar basyndaǵy jantaqty janynan bezgen nar jeıdi» demekshi, jannan bezsek te, ardan bezbeý keregin esten shyǵarmasa eken jastar.
«О́nerge árkimniń de bar talasy» dep Abaı atamyz aıtpaqshy, ónerdiń de óneri bar. Sahnada saırap, bilgenin isteý ónerge jatpaıdy. Bálkim, bul jaı ǵana elikteýshilikten týǵan nárse shyǵar. О́zgege elikteýden ne utamyz? Elikteý – essizdiń isi. Oılanaıyq! Kıeli sahnanyń kıesine ushyramaıyq!
Zere MAHAMBETÁLIEVA
Qyzylorda oblysy,
Aral aýdany,
Qamystybas aýyly
