Menıngıt meńdep tur ma?

Sońǵy kezdegi menıngıt qaýpi qazaqstandyqtardyń aıtarlyqtaı alańdaý­shy­lyǵyn týǵyzdy. Osyǵan oraı ótken aptada Densaýlyq saq­taý mınıstriniń orynbasary Lázzat Aqtaeva Almaty qalasynyń medısınalyq nysandaryn aralap, dúrligýge negiz joqtyǵyn, barlyq mekemeler shtattyq rejimde jumys istep turǵandyǵyn, dári-dármek qorynyń jet­kilikti ekendigin, eń bas­tysy, aýrýdyń aldyn alý sharalarynan tys qalmaý kerektigin jetkizgen bolatyn. Al Qoǵamdyq densaýlyq saqtaý komıtetiniń tóraǵasy Jandarbek Bekshınniń má­limdeýinshe, bıyl elimizde menıngokokk juqpasyna shaldyqqan 62 jaǵdaı tir­kelgen eken.

Onyń ishinde 8 jaǵdaı ólimmen aıaqtalǵan. Marqum bolǵandardyń ekeýi Almaty oblysynyń, ekeýi Ońtústik Qazaqstan oblysynyń turǵyndary. J.Bekshınniń aıtýynsha, aýrýdyń ólimmen aıaqta­lýy­na naýqastardyń menın­gıt ábden meńdegenshe elemeı, dárigerlerge qaral­maı júrip alýy sebep bol­ǵan. Máselen, Qazaq kólik jáne kommýnıkasııa akade­mııasynyń stýdenti 3-4 kún boıy aýyrsa da, dárigerge tek­serilmeı jataqhanada jata bergen. Al tekserilgen kezde kesh bolǵan, aýrý as­qynyp ketken. Qaterli juq­panyń taralý oqıǵasy negi­zinen Al­maty qalasy men Shyǵys Qa­zaqstan, Ońtústik Qazaqstan jáne Almaty oblystarynda, son­daı-aq Astana qalasynda da baıqaldy. Almaty qalasynyń ózinde 29 adamda atalǵan aýrý anyqtaldy. Naýqastarmen baılanysta bolǵan 2200 adam dárigerlerdiń qadaǵalaýyna alyndy. Olardyń ishinde 2 tasymaldaýshy men 3 aýrýǵa shaldyqqan adam anyq­taldy. Al 2017 jyly Qa­zaq­standa menıngokokk juq­pa­synan 11 adam kóz jum­ǵan bolatyn. Byltyr bul juq­paǵa shaldyqqandardyń deni Ońtústik Qazaqstan obly­synyń turǵyndary edi.

Bas memlekettik sanıtar J.Bekshın sońǵy kez­degi menıngıttiń taralýyn aýrýdyń belgileri bilin­beı, biraq juqpaly dert­ti taratýshylardyń sany art­­­qan­dyǵymen já­ne aýa ra­ıy­nyń qubyl­ma­ly­ly­ǵymen baılanystyrady. Kúni keshe Astana qala­synda balalar ınfeksııasy aýrýhanasynda menıngokokk juqpasy dıagnozymen emdelip jatqan bala týraly aqparat ta jurt­shylyq kókeıindegi kú­dikti ulǵaıta túskendeı. Úsh jastaǵy bala birshama ýaqytyn Almaty qalasynda ótkizip, Astanaǵa 24 mamyrda kelgen eken.

Qalalyq balalar ınfeksııasy aýrýhanasy bas dárigeriniń emdeý isi jónindegi orynbasary Olga Pýshkarevanyń aıtýynsha, balanyń jaǵdaıy aýyr, biraq turaqty. Búldirshindi aman alyp qalýǵa ata-anasynyń der kezinde kómekke júginýi men dárigerlerdiń dıagnozdy tez anyqtaýy múmkindik berdi. Bala jeke jatqyzylǵanymen, dárigerler shtattyq rejimde jumystaryn jalǵastyrdy. Iаǵnı tumshalanyp, saqtyq sharalaryn kúsheıtýdiń qa­jettiligi joq. О́ıtkeni bul juq­panyń qozdyrǵyshy syrt­qy ortada turaqsyz bolyp keledi.

Astana qalalyq qoǵam­dyq densaýlyq saq­taý de­partamentiniń epıd­emııa­lyq qadaǵalaý bóliminiń bas mamany Aqmaral Meıirmanova elordada jyl basynan beri balalar arasyndaǵy menıngokokk juqpasy birinshi ret tirkelgenin aıtady. Al eresekter arasynda 4 jaǵdaı tirkelip, barlyǵy qulantaza jazylǵan. Qalalyq balalar ınfeksııasy aýrýhanasynyń balalar juqpaly aýrýlary kafedrasynyń dosenti Anna Brınster dıagnozdyń asqynbaı turyp qoıylýynyń arqasynda eshqandaı máse­le týmaǵanyn jetkizdi. Son­dyqtan alǵashqyda tumaý, bas aýrý, álsizdik sııaqty je­ńil­deý belgiler baıqalsa-aq dárigerge júginý qajet.

Dýman ANASh,

«Egemen Qazaqstan»