Respýblıkalyq deńgeıde alǵash ret uıymdastyrylǵan jarystyń ashylý saltanatynda «Dınamo» dene shynyqtyrý sport qoǵamy tóraǵasynyń orynbasary Asqar Omarqulov, qazaq kúresi federasııasy prezıdentiniń birinshi orynbasary, «Qazaqstan barysy» týrnırin uıymdastyrýshy Arman Shoraev, oblys ákiminiń orynbasary Anton Fedıaev sporttyq sharanyń negizgi maqsaty kúshtik qurylymdar arasynda qazaq kúresin jandandyrý, jastarǵa úlgi etý, salamatty ómir saltyn nasıhattaý bolyp tabylatynyn aıtyp, qatysýshylarǵa sáttilik tiledi.
Baıraqty básekege elimizdiń barlyq óńirlerinen, Almaty, Astana qalalarynan 48 balýan saıdyń tasyndaı iriktelip, eki kún boıy boz kilemniń shańyn qaqty. 80, 90 jáne 90 kılodan joǵary salmaqtar boıynsha nebir aıla-tásilder qoldanyp, birde jeńip, birde jaýyryny jer ıiskegen kúsh ıelerin qoldaýshy jankúıerler qatary qalyń boldy.
Jarys qorytyndysynda soltústikqazaqstandyq Batyrhan Qaıyrbek (80 kg.), jambyldyq Begimhan Ádilbekov (90 kg.) jeńimpaz atandy. 90 kılodan joǵary salmaqta Almaty oblysynyń namysyn qorǵaǵan Aleksandr Kasachev te qarsylas shaq keltirmedi. Oǵan bas júlde – Ishki ister mınıstri Qalmuhanbet Qasymov atyndaǵy kýbok saltanatty túrde tapsyryldy. Jalpykomandalyq esepte bozkilem ıeleri top jardy. Ekinshi, úshinshi oryndardy Mańǵystaý oblysy men Ulttyq gvardııa komandalary mise tutty.
Shara barysynda ulttyq sporttyń damýyna zor úles qosyp júrgen Petropavl qalasynyń qurmetti azamaty Baýyrjan Quljanov «Dınamo» qoǵamynyń altyn medalimen marapattaldy. Sóz arasynda sport ardageriniń qazaq kúresinen óńirdiń tuńǵysh sport sheberi ekenin, qazaq kúresi qoǵamynyń qurmetti prezıdenti ekenin aıta ketken jón. Onyń arada 44 jyl ótkennen keıin temirlandyq (OQO) Ulas Momynulymen qaýyshýy erekshe áserli boldy. Qos sańlaq 1974 jyly Qajymuqan Muńaıtpasov atyndaǵy halyqaralyq týrnırdiń aqtyq básekesinde beldesip, Baýkeńniń mereıi ústem bolǵan eken.
О́mir ESQALI,
«Egemen Qazaqstan»
Soltústik Qazaqstan oblysy
