«Mereıli otbasy-20218» baıqaýynyń sońǵy marapattaý satysyna jınalǵandardy oblys ákimi Arhımed Muhambetov quttyqtady. «Qoǵamda jaqsy qasıettiń barlyǵy da otbasynda qalyptasady. «Mereıli otbasy» baıqaýynyń osyǵan deıingi jeńimpazdary bolǵan otbasylar kópke úlgi jáne ulttyq baılyǵymyz bolyp tabylady» dedi Arhımed Begejanuly.
Dástúrli ulttyq baıqaýdyń 3 atalymmen ótetini belgili. «О́negeli otbasy» atalymy boıynsha Qostanaı qalasynan Qarjaýovtar otbasy jeńimpaz atandy. Olarǵa 150 myń teńgeniń sertıfıkaty tabys etildi. Qadyr men Maıra Qarjaýovty ánshi retinde búkil oblys tanıdy. Búginde olardyń otbasynda mýzykanttar men ánshilerdiń úshinshi urpaǵy ósip keledi. Qadyr men Maıranyń óz uly men qyzy ónerli, al nemereleri de qazir sahnaǵa shyǵa bastady.
«Parasatty otbasy» atalymy boıynsha 150 myń teńgeniń sertıfıkaty Taran aýdanynyń turǵyndary Aleksandr men Lıýbov Semgınder otbasyna berildi. Temirjolshylar otbasy dınastııa bolýmen qatar, sportshylyǵymen de kópke úlgi.
Al «Mereıli otbasy» atalymynyń júldesi Arqalyq qalasynyń turǵyny Oreken aqsaqal men Kúljıan apaı Almatovtardyń úlken otbasyna laıyq dep tabyldy. Oreken aǵa men Kúljıan apaı 8 bala tárbıelep ósirdi. Qazir olardan nemere, shóbereler súıip otyrdy. Balalarynyń barlyǵy joǵary bilimdi, ár mamandyq ıesi. Otbasyna oblys ákimi Arhımed Muhambetov 300 myń teńgeniń sertıfıkatyn tabys etti. Endi Almatovtar otbasy respýblıkalyq «Mereıli otbasy -2018» baıqaýyna Qostanaı oblysynyń atynan qatysatyn bolady.
Názıra JÁRIMBET,
«Egemen Qazaqstan»
Qostanaı
