Elbasy Nursultan Nazarbaevtyń bastamasymen qolǵa alynǵan osy ıgi sharaǵa oraı, Almaty qalasy О́ńirlik kommýnıkasııalar qyzmetiniń alańynda «100 jańa oqýlyq – Rýhanı jańǵyrýdyń qunarly qaınary» taqyrybynda baspasóz máslıhaty ótti.
Bul jıynǵa Ulttyq aýdarma bıýrosynyń joba jetekshisi Nazgúl Qojabek, ál-Farabı atyndaǵy Qazaq Ulttyq ýnıversıtetiniń ekonomıka kafedrasynyń meńgerýshisi Gúlnar Sadyhanova, «Dáýir» polıgrafııa-baspa kesheniniń atqarýshy dırektory Eset Qojamuratov, Narhoz ýnıversıteti Ekonomıka jáne basqarý mektebiniń dekany Samajan О́mirzaqov qatysty.
- «Ulttyq aýdarma bıýrosy osy 100 oqýlyqty qazaq tiline tárjimalaýmen ǵana shektelmeıdi. 12 sáýirde Astanada ótken úlken jıynda Elbasy Nursultan Nazarbaev «oqýlyqtar elektrondy formatta jáne beıneleksııa túrinde jarııalansyn» degen naqty tapsyrmalar bergen bolatyn. Qazir sol baǵytta jumystar júrgizilýde. Jaqyn arada oqýlyqtardyń PDF nusqasy saıtta jarııalanady. Sonymen qatar, beıneleksııalar túsirilip jatyr. Ulttyq aýdarma bıýrosynyń kitap.kz jáne openU.kz degen eki jobasy bar ekeni barshaǵa málim. Aıtýly qos joba kitaptardy eki formatta jarııalaý úshin platforma bolmaq.
Sonymen qatar, Memleket basshysy tarapynan termınologııalyq jáne túsindirme sózdikterdi jańartý jóninde de tapsyrma berildi. Ol jumys ta qolǵa alynyp, qazirge kezde jobasy ázirlene bastady. Ulttyq aýdarma bıýrosy aýdarylǵan kitaptardy redaksııalaý barysynda termınologııa jaǵynan da kóp sharýa atqarýda. Osy jumystardyń barlyǵynyń nátıjesin aldaǵy ýaqytta jarııalaımyz», – deıdi Ulttyq aýdarma bıýrosynyń joba jetekshisi Nazgúl Qojabek.
Brıfıng barysynda sóz alǵan basqa da mamandar osy baǵytta atqarylyp jatqan jumystar jaıynda qysqasha baıandap, aldaǵy ýaqyttaǵy josparlarymen de bólisti.
Ǵalym SÚLEIMEN,
«Egemen Qazaqstan»
ALMATY
