Egıpet ulttyq qurama komandasy fýtboldan Álem chempıonatyna úshinshi ret qatyspaq

Er kezegi úshke deıin

Egıpet ulttyq qurama komandasy Álem chempıonatyna osymen úshinshi márte qatysady. Osyǵan deıingi dodalarda mysyrlyq aıaqdopshylar toptyq kezeńnen ári asa almaı qalǵan-dy. Perǵaýyndardyń alǵashqy joryǵy sonaý 1934 jyly bastaldy. Italııa jerinde ótken dop dodasynda 13-oryndy alyp edi. Odan keıin kóp ýaqyt Mysyr quramasy irikteýden óte almaı, biraz irkilip júrdi. Al ekinshi márte chempıonatqa olar 1990 jyly ǵana qaıta oraldy. Bir qyzyǵy 90-jylǵy chempıonat ta Italııa jerinde ótken. 2 oıyndy teń oınap, bir matchta jeńilip, Egıpet toptan ári asa almady. 

Al 2000 jyldardyń sońyna qaraı Mysyr fýtboly qaıta jandanǵandaı kórindi. Aǵylshynnyń «Tottenheminde» oınaıtyn Iohan Mıdo men Býndeslıgada táp-táýir shabýylshy bolǵan Muhammed Zıdandardyń kezinde Mysyr halqy zor úmit kútti. Biraq komanda ishindegi alaýyzdyq ushpaqqa shyǵarmady. 

Bapkerge artylǵan senim

Egıpet quramasy ótken jyly qarasha aıynda birneshe myqty match ótkizdi. Irikteý týrnıriniń 5-týrynda Egıpet Aleksandrııa qalasynda Kongony qabyldady. Osy matchta Muhamed Salah dýbl avtory atandy. Al onyń negizgi ýaqytqa qosylǵan mınýtta soqqan penaltıi Egıpetti Álem chempıonatyna alyp shyqty. 

Odan keıin mysyrlyqtar Ganany 2:0 esebimen jeńdi. Sol oıynda mańyzdy goldy taǵy da «Lıverpýl» shabýylshysy Muhamed Salah soqty. Degenmen, mysyrlyq jankúıerler Egıpet quramasynyń osynshama jetistikke jetkenine Salahpen qatar bas bapker Ektor Kýperdi de qatar aıtady. 
Argentınalyq bapker óz tájirı­be­sinde birshama jetistikke jetken. Ispanııanyń «Valensııa» komandasymen 2000 jyldardyń basynda klýbtyq deńgeıde zor tabysqa jetti. «Valensııa» Chempıondar lıgasynyń fınalyna jyl­ma-jyl shyǵyp, kári qurlyq fýtbolynda ústemdik qurdy. Odan keıin Kýper Italııanyń «Interimen» bapkerlik qyz­mettiń shyńyna shyqty. Grýzııa ulttyq qu­ramasynyń bapkeri qyzmetin de abyroımen atqardy. Al 2015 jyldan bastap Kýper Egıpet eliniń qurama komandasyna bas bapker bolyp keldi. Mine, sodan beri perǵaýyndar jeńistiń dámin seze bastady. Mysaly, 2017 jyly Salah bastaǵan jigitter Ektor Kýperdiń basqarýymen Af­rıka ulttar kýbogynyń chempıony atandy. Bylaısha aıtqanda, qara qur­lyq­ta qazir Egıpet eń myqty ujym. 

Salahtyń saýlyǵyn tileıdi

Álem chempıonatynda Egıpet «A» tobynda óner kórsetedi. Qarsylastary alań ıesi Reseı, shabýyly joıqyn Ýrýgvaı jáne musylman baýyrlary Saýd Arabııasy quramasy. Alǵashqy oıyn 15 maýsym kúni Ýrýgvaıǵa qarsy ótedi. Bul match argentınalyq Ektor Kýperge naǵyz syn bolǵaly tur. Odan keıingi 2 oıynda my­syrlyqtar 6 upaı alýdy josparlap otyr. Sebebi 19 maýsym kúni Mysyr Reseımen, al 25 maýsym kúni Saýd Ara­bııasymen ushyrasady. Chempıondar lıgasynyń fınalynda jaraqat alǵan Mu­hamed Salah Ýrýgvaımen ótken oıyn­ǵa qatyspaıdy degen aqparat bar. Al odan keıingi 2 matchqa surmergen shyǵyp qalýy ábden yqtımal. Sondyqtan da, búkil Egıpet jankúıerleri qazirgi kúni Sa­lahtyń saýlyǵyn tilep, duǵa aıtýda. To­pyraǵyn túrtseń tarıhy sóılep beretin, babamyz Beıbarys basqarǵan Mysyr eli­niń quramasyna jankúıer bolamyz dep otyrǵan otandastarymyz da joq emes.

Ermuhamed MÁÝLEN,
«Egemen Qazaqstan»