ÝEFA resmı saıtynyń taratqan málimetine sensek, týrnırdiń ánurany jáne resmı doby ózgeredi. «Eýropa lıgasynyń negizgi elementteri sanalatyn logotıp pen onyń túsi ózgerissiz qalady, biraq vızýaldy órnekter batyl jáne anyq sıpattarǵa ıe boldy. Fýtbolshylar men jankúıerler arasyndaǵy baılanysty beıneleıtin qýat tolqyny syzylǵan syzyqtar men ushaqtardyń qanaty arqyly búkil Eýropa boıynsha klýbtardyń saıahatyna kóz jetkizýge bolady», dep jazady resmı saıt.
ÝEFA atalǵan ózgerister týrnırdiń abyroıy men mańyzdylyǵyn arttyra túsedi dep esepteıdi.
Alyptar aıqasy 21 shildede ótedi
Búkilálemdik boks sýper serııasynyń aýyr salmaqtaǵy WBC jáne WBO álem chempıony ýkraınalyq Aleksandr Ýsık (14-0, 11 KO) pen reseılik boksshy Murat Gassıev (26-0, 19 KO) arasynda ótetin jekpe-jektiń ótetin kúni belgili boldy.
Bul týraly reseılik boksshynyń jattyqtyrýshysy Abel Sanches málimdedi. Sheteldik basylymdarǵa bergen suhbatynda ol keıinge shegerilgen jekpe-jek 21 shildede ótetinin aıtqan. «Bizge boks keshin uıymdastyrýshy tarap jekpe-jektiń 21 shilde kúni ótetinin aıtqanymen, naqty qaı elde uıymdastyrylatynyn aıtqan joq. Bul bir túsiniksiz jaǵdaı bolyp tur», deıdi ol.
Aıta keteıik, buǵan deıin Gassıev-Ýsık jekpe-jegi 11 mamyrda Saýd Arabııasynda ótedi dep josparlanǵan bolatyn. Alaıda kezdesýge daıyndyq barysynda ýkraınalyq boksshynyń jaraqat alyp qalýyna baılanysty kezdesý merzimin keıinge shegergen-di.
Lempard Chempıonshıp komandasyn jattyqtyrady
Anglııa quramasy men «Chelsı» komandasynyń burynǵy jartylaı qorǵaýshysy Frenk Lempard «Derbı Kaýntı» klýbynyń bas jattyqtyrýshysy bolyp taǵaıyndaldy.
Chempıonshıptiń 2017/18 jylǵy maýsymynda «Derbı Kaýntı» 6-oryn ıelenip, premer-lıga úshin beriletin joldamaǵa qol jetkizgen-di. Alaıda pleı-off kezeńinde «Fýlhem» komandasynan jeńilip, joǵary topqa shyǵa almady.
Aıta keteıik, Lempardtyń ózi fýtbolshy karerasyn 2017 jyldyń aqpan aıynda aıaqtaǵan edi. Jattyqtyrýshy retinde tájirıbesi joq fýtbolshynyń jattyqtyrýshy atanǵanyna barlyq jankúıerler tańdanysyn bildirip jatyr.
Daıyndaǵan
Álı BITО́RE,
«Egemen Qazaqstan»
