Keshe Memleket basshysy Nursultan Nazarbaev Astana qalasynda «Tulpar-Talgo» jolaýshylar vagondaryn shyǵaratyn alǵashqy zaýyttyń saltanatty ashylý rásimine qatysty, dep habarlady Qazaqstan Respýblıkasy Prezıdentiniń baspasóz qyzmeti.
Memleket basshysy vagondardyń aspaly jabdyqtaý montajdyq ýchaskesinde bolyp, ishki jabdyqtar men ıntererdi qurastyrý ýchaskesine arnalǵan óndiristik úderistermen, qosymsha tirkeý jáne statıstıkalyq synaq sehymen tanysty, sondaı-aq bir jolaýshy vagonyn kórip shyqty. «Qazaqstan temir joly» UK» AQ prezıdenti A.Mamın Nursultan Nazarbaevqa zaýyttyń negizgi tehnıkalyq sıpattary, jolaýshylar qozǵalysynyń jyldamdyǵyn shekteý men damytý jospary týraly baıandady.
Zaýytty aralaý kezinde Memleket basshysy zaýyttaǵy statıstıkalyq stendtik synaqtar ótkizý sehyn iske qosty.
Nursultan Nazarbaev zaýyttyń jumysshylarymen áńgimelesti.
– Indýstrııalyq baǵdarlamany iske asyrý elimizdiń taıaý jyldardaǵy basym mindetteri bolyp tabylady. «Tulpar-Talgo» zaýyty – Táýelsizdik kúnine tamasha syılyq. 2015 jyly jergilikti ónim Qazaqstan boıynsha paıdalanylatyn bolady. Bizdiń kólik júıesi jumysynyń tıimdiligi edáýir artady, – dedi Memleket basshysy.
Jańa zaýyt qurylysynyń jobasy ıspanııalyq seriktestermen birlesip júzege asyrylǵan. Onyń jobalyq qýaty – jylyna 150 jolaýshy vagonyn shyǵarý. Jobanyń quny: 8,8 mlrd. teńge. Zaýytta 18, 12, 10 oryndyq vagondar, sondaı-aq múgedek jolaýshylar úshin 6 oryndyq vagondar shyǵarylatyn bolady. Vagonnyń ortashy quny – 780 myń eýro. Vagondar Qazaqstannyń klımattyq jaǵdaıyna beıimdelip jasalady, olardyń konstrýksııalyq jyldamdyǵy saǵatyna 350 shaqyrymdy quraıdy.
Tehnologııalyq úderiske qozǵalmaly bólshekterin qurastyrý, aýa jáne elektrmen jabdyqtaý júıesin qosý, kýpe elementterin daıyndaý, qorabyn dánekerleý jáne syrlaý, jabdyqtardyń jekelegen túrlerin daıyndaý jáne montajdaý jatady. Tehnıkalyq qadaǵalaýdy eýrostandarttardyń talaptarynyń oryndalýyna baqylaý jasaıtyn ıspan taraby júzege asyrady. Sondaı-aq zaýyttyń jumysshylary Ispanııanyń zaýyttarynda oqyp kelgen. Atalǵan jobany iske asyrý jolaýshylar vagondaryna tapshylyq máselesin sheshýge, poıyzdar qozǵalysyndaǵy qaýipsizdik deńgeıi men jolaýshylar qolaılylyǵyn arttyrýǵa, qazaqstandyq temir jol kóliginiń básekege qabilettiligin ulǵaıtýǵa múmkindikter týǵyzady. Sondaı-aq jańa jolaýshylar vagondaryn qurastyrý kezinde jekelegen túıini men bólshekterin daıyndaýǵa arnalǵan tapsyrystardy ornalastyrý esebinen birqatar ónerkásip kásiporyndary óndirisiniń kólemi ulǵaıtylatyn bolady.
-----------------------------------------
Sýretterdi túsirgender S.BONDARENKO, B.OTARBAEV.
