Bir aıta keterligi, barlyq bilim berý uıymdaryn biriktiretin respýblıkalyq dástúrli sherý bir ýaqytta elimizdiń barlyq óńirlerinde ótti.
Shara «Máńgilik El» jalpyulttyq ıdeıasyn iske asyrý aıasynda balalar men stýdentterdiń sherýlik jáne festıvaldik júrip ótýin qoldaý jáne damytý maqsatynda uıymdastyrylǵan. Jıynǵa Astana qalasynyń tórt ákimshilik aýdanynyń oqýshylary men qosymsha bilim berý, sondaı-aq orta bilim berý mekemeleriniń pedagogtary, joǵary jáne orta arnaýly oqý oryndarynyń stýdentteri qatysty.
Saltanatty jıyndy ashqan Bilim jáne ǵylym vıse-mınıstri Talǵat Eshenqulov jınalǵandardy Halyqaralyq balalardy qorǵaý kúnimen quttyqtap, óziniń ıgi tilegimen bólisti.
«Balalar men jastardyń mýzykalyq orkestrleri men ansamblderiniń sherýi byltyrdan bastap elimizdiń barlyq óńirinde turaqty túrde ótkizilip keledi. Byltyrǵy jyly sherýge 100 myńnan astam balalar men jasóspirimder qatysqan bolsa, bıylǵy sharaǵa respýblıkanyń barlyq bilim ordalary men JOO-dan 527 myńnan asa bala belsendilik tanytty. Elimizdiń mádenı ómirindegi aıtýly shara barlyq oblystarda birdeı ýaqytta ótedi. Sherýge jalpy sany 5 myńnan astam bilim ordalary qatysady. Olardyń ishinde Astana qalasy boıynsha 7 myńnan astam bala bar» - dedi vıse-mınıstr.
Merekege oraı uıymdastyrylǵan mýzykalyq sherý Astana qalalyq ákimdiginiń aldynda bastalyp, Abaı dańǵyly men Kenesary kóshelerin boılaı, ortalyq alańda aıaqtaldy. Shara barysynda barabanshylar otrıady, úrmeli orkestrler men ansamblder, majoretkalar, cherlıderler, hor jáne bı ujymdary óz ónerlerin ortaǵa saldy.
Aýqymdy sharaǵa qatysý úshin ár mektep úzdik oqýshylardy tańdap alyp, bir aıǵa jýyq daıyndaldy. Sherý balalar men jastardyń mýzykalyq mádenıetiniń deńgeıin arttyrý, patrıottyq sezimin qalyptastyrý, respýblıkanyń oqý oryndarynyń bedelin kóterý jáne jarnamalaýda úlken ról atqarady. Sherýge qatysýshylardyń biri mektep oqýshysy Qarabaeva Kamıla búgingi shara ózine úlken merekelik kóńil kúı syılap, jańa dostar tabýǵa kómekteskenin aıtty.
Sherýdi daıyndaýǵa oqýshylar, stýdentter, mektep muǵalimderi, kolledjder men JOO-nyń oqytýshylary, ata-analar men mádenıet jáne sport ókilderi belsene atsalysty. Sondaı-aq, sherý elimizdiń mádenı ómirindegi aıtýly oqıǵalardyń birine aınaldy. Keremet mýzykalyq repertýar, alýan túrli aspaptar, san túrli ónerdi biriktirgen baǵdarlamalar men kózdiń jaýyn alatyn biryńǵaı ásem kıimdermen bezendirilgen sherý balalar merekesiniń kórkin keltirdi.
Mádına JÁLELQYZY,
«Egemen Qazaqstan»
