Keńes barysynda Shymkentten tikeleı baılanysqa shyqqan Ońtústik Qazaqstan oblysynyń ákimi Janseıit Túımebaev óńirde sıfrlandyrý baǵytynda atqarylyp jatqan jumystar jaıynda esep bergen bolatyn. "Qazirgi tańda aýrýhanalarda, emhanalarda kezekke turý burynǵydaı emes, úıden kezekke turý máselesi, naqty málimetter alý máselesi sıfrlandyrý arqyly júzege asýda. Sondaı-aq búkil aýrýhanalar men emhanalarda kelesi jyldyń ortasyna deıin tolyq kompıýtermen qamtamasyz etýdi josparlap otyrmyz", - dedi oblys basshysy.
Buǵan Prezıdent: "Osynyń barlyǵy barlyq oblystarǵa, ásirese, Ońtústik Qazaqstan oblysyna qajet. Bul oblys basqa salalardan qalyp qaldy degen sóz emes. Oblystyń halqy tyǵyz qonystanǵan. Ar jaǵyndaǵy ózbek aǵaıyndarmen baılanysymyz jaqsaryp keledi. Ońtústik Qazaqstanda básekelestik te ósip kele jatyr. Olardyń saýda-sattyqqa, óz jumysyna degen yqylasy bizden góri artyq ekeni belgili. Egerde daıyndalmasańdar, qalyp qalasyńdar. Barlyq bızneske sol aǵaıyndar keletin bolady",- dep eskertti. Sonymen qatar Elbasy Ońtústik Qazaqstan oblysynda para berýdiń órship turǵandyǵyna alańdaýshylyǵyn bildirdi.
"Eshqandaı renish bolmaýy kerek. Ásirese, jańa óziń aıtyp otyrǵan jumysqa qabyldaýǵa qatysty. Mende neshe túrli habarlar bar. Mektepke, edendi jýýǵa qabyldaý úshin para berý kerek. Mektepke muǵalim bolyp ornalasý úshin para berý kerek. Basqa oblystarda ondaı joq. Tek qana senderde bar", - dedi Memleket basshysy. QR Prezıdenti jer satý, bıznesti damytý, aýrýhanalar men mektepke jumysqa alý máseleleri sıfrlandyrylatyn bolsa, mundaı problemanyń joıylatyndyǵyn basa aıtty.
