Jobanyń maqsaty - qoǵamnyń nazaryn ákeniń róli men ákeniń óskeleń urpaqty tárbıeleýde qosatyn úlesi máselelerine aýdarý.
- Memleket basshysy qazaqstandyq otbasylardyń ál-aýqatyn jaqsartýǵa jáne qoldaýǵa úlken kóńil bóledi. Osy maqsatta kóptegen memlekettik baǵdarlamalar men zańdar qabyldandy, otbasylyq-demografııalyq saıasat jónindegi Ulttyq komıssııa quryldy. Balalardy tárbıeleýdegi ákelerdiń rólin baǵalaý óte qıyn. Oblystyń barlyq aýdandarynda úlgili ákelerdiń mártebesin asyrý maqsatynda Ákeler alleıasyn salýdy josparlap otyrmyz, - dep málimdedi Berdibek Saparbaev.
Oblys ákimi sondaı-aq, Qazaqstan Respýblıkasy Prezıdentiniń janyndaǵy áıelder isteri jáne otbasylyq-demografııalyq saıasat jónindegi ulttyq komıssııasyna Aqtóbe qalasynda Aqtóbe oblysynyń 2018 jyl Bala jyly dep atalýyna oraı respýblıkalyq Ákeler forýmyn ótkizý jónindegi bastamasyn qoldaǵany úshin alǵys aıtty.
Forým jumysyna barlyq óńirlerden delegattar, Ulttyq komıssııanyń basshylyǵy men músheleri, QR Parlamenti depýtattary, ortalyq memlekettik jáne jergilikti atqarýshy organdardyń basshylary, qoǵam qaıratkerleri, úkimettik emes uıymdardyń ókilderi, sondaı-aq úlgili áýlet basshylary qatysýda. Forým bastalǵanǵa deıin olar shyǵarmashylyq akademııasynda robototehnıka, aqparattyq-kommýnıkasııalyq tehnologııalar, qoldanbaly óner boıynsha balalar jumystarynyń kórmesimen tanysty.
Forým moderatory, Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary Lázzat Súleımen óziniń quttyqtaý sózinde Prezıdenttiń Jarlyǵymen qabyldanǵan QR 2030 jylǵa deıingi Otbasy jáne genderlik saıasat Tujyrymdamasynda bala tárbıesindegi ata-analardyń jaýapkershiligin arttyrý jáne ákeler ınstıtýtyn damytý jóninde tapsyrma qoıylǵanyn atap ótti.
- Búginde ákeniń otbasy tárbıesindegi rólin arttyrý, qoǵam nazaryn balalardyń patrıotızm sezimin qalyptastyrýdaǵy áke rólin kúsheıtý máselelerine aýdarý, «Rýhanı jańǵyrý» baǵdarlamasy sheńberinde bilimge umtyldyrý - bizdiń jumysymyzdyń basymdyǵy bolyp tabylady, - dep atap ótti L.Súleımen.
Qatysýshylar ákeler ınstıtýtynyń qoǵamdy rýhanı jańǵyrtýdaǵy rólin, jumysty balalardy jaýapty tárbıeleýmen úılestirýdi, áke tárbıesiniń ádisterin, Qazaqstanda ákelerdiń qoǵamdyq qozǵalysy damýynyń búgini men keleshegin jáne basqa da ózekti taqyryptardy talqylady.
Respýblıkalyq forýmnyń qorytyndysy boıynsha ákeler qozǵalysyn damytý jónindegi birlesken jumysty kúsheıtý týraly qarar qabyldandy, onda «Ákeler keńesi» QB tulǵasyndaǵy azamattyq qoǵam mańyzdy ról atqarýy tıis. Forým nátıjeleriniń biri atalmysh qoǵamdyq birlestiktiń bólimshelerin elimizdiń barlyq óńirlerinde ashylýy bolady dep kútilýde.
Budan basqa, úzdik úlgili ákelerge Ulttyq komıssııa atynan alǵys hattar tabys etildi.
Aıta keteık, sol kúni Aqtóbede respýblıkalyq balalar sherýiniń, «Baqytty bala» halyqaralyq festıval-baıqaýynyń ashylý saltanaty ótti. Bul qoǵamdy rýhanı jańǵyrtýǵa baǵyttalǵan áleýmettik mańyzy bar jobalardy iske asyrýdyń laıyqty úlgisi boldy.
Temir Qusaıyn,
«Egemen Qazaqstan»
Aqtóbe
