Kún tártibinde qurylys nysanyn salýdyń merzimi, sapasy, qaýipsizdik máselesi qaraldy. Búginge deıin turǵyndardan kelip túsken shaǵymdardyń deni ǵımarattyń syrtqy kelbeti men obektiniń berilý merzimine baǵyttalǵan.
Birinshi kezekte esep bergen qurylysshylar jańadan salynǵan ǵımarattyń keıbir jerlerin qatty jel ushyryp ketetindigin aıtty. Iаǵnı 22-26 mamyr aralyǵynda qalalyq monıtorıng ortalyǵyna turǵyndardan 212 shaǵym tirkelgen, 68-i - ǵımarattyń jabyndysy men syrtqy qasbeti zaqymdalǵany týraly shaǵym túsken. Jıynda «Olımp-palas» TK merdigeri túsinikteme berdi, úıdi 2017 jyldyń shildesinde paıdalanýǵa bergen. Qatty jelden keıin jylytqysh quraldary jartylaı qıraǵan. «Haıvıll» TK 2015 jyly paıdalanýǵa berilgen, munda plıtalar men jylytqyshtar qıraǵan.
«Mıllenıým park» TK 2014 jyly paıdalanýǵa berilgen, ǵımarattyń syrtqy qaptamasy qırasa, «Saranda» TK (2013 jyl) metaldan jasalǵan shatyr jabyndysy jelge ushqan. Merdigerler jelden qıraǵan ǵımarattardy 15 maýsymǵa deıin retke keltirýge ýáde berdi. Ákimniń tapsyrmasy boıynsha jaýapty memorgandar turǵyn úıdi qabyldap alý boıynsha arnaıy tekserý júrgizedi. «Zań boıynsha ákimdik qabyldamaýy tıis, biraq biz tehnıkalyq jáne avtorlyq qadaǵalaýdyń qaıda qarap otyrǵanyn anyqtaımyz.
«Olımp palas» TK boıynsha avtorlyq jáne tehnıkalyq baıqaýdy kim ótkizdi? Olar attestatynan aıryldy ma? Osylaısha biz árqaısysymen fakti boıynsha tekserýimiz tıis. Eger óreskel buzýshylyqtar birneshe ret qaıtalansa - lısenzııasynan, attestatynan aıyryp, sotqa berý kerek. Bizde olardy teksere alatyn prokýratýra, ondaǵan memlekettik organdar bar jáne bul jumysty aıaqsyz qaldyrmaımyz», - dedi Á. Isekeshev. Ákim sondaı-aq jaýapsyz bıznesmenderdiń naryqtan ketýi kerektigin de aıtty.
«Qarańyzdar, turǵyn úıdi kim qabyldap alady - bári de jekemenshik kompanııalar: tapsyrys berýshi, bas merdiger - jekemenshik kompanııa, tehnıkalyq qadaǵalaý - qazir jeke kompanııa, avtorlyq qadaǵalaý da - jekemenshik kompanııa. Zań boıynsha ákimdik turǵyn úıdi qabyldap alýǵa quqy joq, barlyq jaýapkershilik bızneske júktelgen. Biz qazir osy baǵytta UKP birlesip jumys isteýdemiz, túrli mehanızmder arqyly sıtýasııaǵa yqpal etý týraly kelisim jasaldy, ıaǵnı zań arqyly baqylaýdy kúsheıtý, uıymnyń ózin retteýi - jaýapsyz merdigerlerdiń naryqtan ketýine alyp kelýi tıis. Tekserip, anyqtaý qajet. Sebebi, árbir úıdiń artynda júzdegen otbasynyń taǵdyry tur», - dedi Á. Isekeshev. Jıyn barysynda barlyq PIK-terge júıeli túrde úıdiń tehnıkalyq jaǵdaıyn tekserip turýyn, ony apattyq jaǵdaıǵa deıin jetkizbeýin tapsyrdy. 1 jeltoqsanǵa deıin 486 PIK-tiń úılerge qyzmet kórsetý sapasy tekseriledi.
«Qyzmet kórsetetin barlyq PIK mekemelerine aıtylǵan eskertýlerdi eskerip, úıdiń syrtyn qaptaıtyn plıtkalarly qaıta qalpyna keltirýdi tapsyramyn. Qurylys normasy men erejesine (QNjE) sáıkes, erejede turǵyn úı qory retteýi kerek. Bizde qazir qala boıynsha ǵımaratty apattyq jaǵdaıǵa deıin aparǵan faktiler bar. Aýdan ákimdikteri men qalalyq orta sapa basqarmasy muny baqylaýyna alady. Aıtylǵan retsizdikter merziminde qalpyna keltirilmegen jaǵdaıda tekserý júrgizilip, materıaldar sot organdaryna jiberiledi. Sonymen qatar, qarjy kózderin maqsatty túrde paıdalanǵany týraly aýdıt jasaýda buzý faktileri bolǵanyn qaraý úshin IID, memlekettik kirister departamentine joldanady», - dep túıindedi Á. Isekeshev.
Al tekseristen ótpegen PIK-termen barlyq kelisimshart buzylady.
