«Nur Otan» jańǵyrýdyń qozǵaýshy kúshi bolýy tıis

Jıynǵa Saıası keńestiń músheleri – Úkimet, Parlament jáne Prezıdent Ákimshiligi basshylary, Memlekettik hatshy, «Nur Otan» partııasynyń Májilistegi fraksııasynyń depýtattary, ortalyq jáne jer­gilikti atqarýshy organ­dar­dyń basshylary jáne beıne­konferensııa baılanysy re­jiminde elimizdiń barlyq óńiriniń ókilderi – oblys ákim­deri, oblystyq más­lıhat­tardyń hatshylary, partııa­nyń ob­lystyq fılıaldary tóra­ǵa­lary­nyń birinshi orynbasarlary qatysty. Saıası keńestiń oty­­rysynda partııany júıeli jań­­ǵyrtý jáne «Prezıdenttiń bes áleýmettik bastamasynyń» jú­­zege asyrylýyna qoǵamdyq baqy­laý jasaý isin uıymdastyrý máseleleri qaraldy.

Memleket basshysy, partııa Tóraǵasy Nursultan Nazarbaev ózi­niń kirispe sózinde partııa Saıa­sı keńesiniń ótken jyldyń qara­sha aıyndaǵy otyrysynda ber­gen tapsyrmalaryn eske salyp ótti. Atap aıtqanda, Elba­sy partııalyq kadrlarmen jumys­ty kúsheıtý, jergilikti ókildik etýshi organdardy qalyp­tas­ty­rý­da partııanyń rólin arttyrý, jal­pyulttyq kún tártibin qalyp­tas­tyrýǵa bel­sendi qatysý, par­tııalyq tehno­logııalardy je­til­dirý, analı­tıkalyq áleýetti kúsheı­tý jáne partııalyq bilim berý sapasyn art­tyrýdy kózdeı­tin jobalardy júzege asyrý máselelerin tap­syr­ǵan bolatyn.

Oǵan qosa, Saıası keńestiń buǵan deıingi otyrysynda partııa músheleriniń san emes, sapalyq quramyna basymdyq berý, partııa jumysyn jetildirýde jańa saıası tehnologııalardy qoldaný, jas­tarmen belsendi jumys júrgizý, «Jas Otan» jastar qanatyna eli­­mizdegi barlyq jastar uıym­dary­nyń basyn biriktirýge uıytqy bolýdy júkteıtin mindetter qoıylǵan edi.

Mine, osy mindetterdiń, jos­­par­lanǵan jumystardyń nátı­jesi men elimizdegi ár­bir azamat­tyń turmystyq ahýalyn jaq­sartýǵa arnalǵan «Pre­zıdenttiń bes áleýmettik basta­masynyń» oryn­dalýy boıynsha esep beretin sát jaz maýsymynyń alǵashqy kú­nine sáıkes keldi.

Elbasy bul jumystardy oryn­daý úshin zańnamalyq baza jetil­dirilgendigin jáne par­tııa­nyń Parlamenttegi fraksııa­sy­nyń osy maqsatta aýqymdy ju­mys atqarǵandyǵyn da atap ótti.

Sapany halyqqa kórsetilgen naqty kómek aıqyndaıdy

Jalpy Prezıdenttiń tapsyrmasy boıynsha «Nur Otan» partııasy Qazaqstan halqy Assam­bleıa­symen birlese otyryp joǵa­ryda atalǵan mindetterdiń jú­zege asyrylýyna qoǵamdyq baqy­laý­dy kúsheıtýdi qolǵa alǵan bolatyn.

Osy oraıdy Partııa Tóra­ǵa­­synyń birinshi orynbasary Máýlen Áshimbaev óz baıandama­synda Elbasynyń partııany júıeli jańǵyrtý jónindegi tap­syrmasy boıynsha sońǵy aılarda qandaı sharalar atqa­rylǵanyn jetkizdi.

M.Áshimbaevtyń aıtýyn­sha, Elbasy tapsyrmasyna saı, «Nur Otan» partııasynyń áleýeti arqyly «Sıfrly Qazaq­­stan», «Rý­hanı jańǵyrý» baǵdar­­lama­lary el arasynda keńi­nen na­sı­hat­talyp, shaǵyn jáne orta bız­nesti damytýǵa erek­she kóńil bólinip keledi. Sondaı-aq jańa saıa­sı tehnologııalardy engizý arqy­ly negizgi jumys­tar­dyń ádis-tá­silderi ózgergen. Máselen, endi partııa jumysyn baǵalaýda uıym tarapynan ótki­zilgen is-sharalardyń jáne oǵan qaty­sýshylardyń sany emes, halyqqa kórsetilgen naqty kómekter esepke alynýda.

Partııa tarapynan aqparattyq, kommýnıkasııalyq tetikter keńi­nen qoldanylýy nátıjesinde «Nur Otannyń» áleýmettik jeli­lerdegi aqparattarynyń taralymy men oǵan jazylýshylar sany, sáıkesinshe oqylymy da arta túsken.

M.Áshimbaev úsh jyldyń ishinde partııanyń bastamasymen elimizde bir myńdaı IT synyptary ashylatynyn, onda jylyna 150 myń oqýshy baǵdarlama jasaý men robot tehnıkasy boıynsha tereńdetilgen bilim alatynyn da atap ótti. Osy joba aıa­synda bıyldyń ózinde 280 synyp ashý kózdelgen. Búginge deıin Aqtóbe, Qaraǵandy, Qosta­naı, Pavlodar, Mańǵystaý oblys­tary men Astana jáne Alma­ty qalalarynda 59 synyp ashyl­ǵan. Bul jo­ba­­larǵa «Týǵan jer» baǵ­dar­la­masy sheńberinde kásipkerler de­meýshilik kórsetken.

Sonymen qatar IT kompanııalary men óńirlerdegi oqý oryndarynyń janynan IT salasyna jylyna 35 myń maman daıar­laıtyn ortalyqtar ashylmaq. Bundaı ortalyqtarǵa aldymen jumyssyz jáne ózin ózi qamtyǵan jastar tartylmaq.

«Nur Otan» partııasy shaǵyn jáne orta bıznesti damytý baǵy­tynda da birneshe jobany qolǵa alǵan.

– Jalpy, búgingi kúnniń ózekti ári halyqqa tikeleı qatysty máse­lelerin qoǵamdyq baqylaýǵa alý, josparlardyń oryndalýyn qada­ǵalaý elimizdegi eń iri saıası uıym­nyń kún tártibinen túspeıdi. Bul – Partııa Tóraǵasynyń tapsyrmasy men talaby, – dedi Máýlen Áshimbaev.

Biregeı joba Astanadan bastalady

Kelesi kezekte sóz alǵan As­tana qalasynyń ákimi, «Nur Otan» partııasynyń Astana qala­lyq fılıalynyń tóraǵasy Áset Isekeshev partııalyq tap­syr­ma­lardyń oryndalý barysy týra­ly aıta kelip, júıeli jań­ǵyrý­dyń astanalyqtardy tutas qamtı­tynyn atap ótti.

– Astana halqyn jumyspen qamtý isi de udaıy basty nazarymyzda. Qazirgi tańda qalamyzda tu­raqty jumysy bar 500 myń turǵyn bolsa, onyń 300 myńy shaǵyn jáne orta bıznes salasynda jumys isteıdi. Bizdiń ese­bimiz boıynsha, shamamen 2023 jy­ly turaqty jumysy bar as­ta­na­lyqtar sany 650 myńǵa jete­di. Bul – taǵy 150 myń ju­mys orny qurylady degen sóz. Osy­nyń bárin eskere otyryp, sura­nys­qa ıe mamandyqtardy oqyta­tyn arnaıy kýrstar ashtyq. Memle­kettik tapsyrystar tizbeginen kó­nergen mamandyqtar alynyp qala sharýashylyǵyna qajetti maman­dyqtar tizimi jasaldy. Sol ar­qyly jyl sońyna deıin 30 myń adam daıyndalsa, onyń 17 myńy memlekettik tapsyrys boıynsha oqytylmaq, – dedi Á.Isekeshev.

Qala ákiminiń baıandaýynsha, buǵan deıin mektep oqýshylary 7 sy­nyptan bastap oqıtyn baǵdar­lamalaý negizderin endi birinshi sy­nyptan bastap oqytý qolǵa alynady. О́ıtkeni osy maqsattaǵy qanatqaqty joba óz tıimdiligin kórsetken. Sondyqtan da endi kom­­pıýterlik saýattylyqty art­ty­rýǵa negizdelgen joba As­ta­na­daǵy 35 mektepte bastalmaq. Qanat­qaqty jobada astanalyq bala­lardyń tanymdyq oıyndar baǵ­darlamasy men qazaqsha mýlt­­­fılmder jasaýǵa qyzyǵý­shy­­lyǵy joǵary bolǵandyǵy baı­qal­ǵan.

Sonymen qatar aldaǵy oqý jy­lyna deıin elorda mektepteri to­lyq kompıýterlendirilip, symsyz ınternet jelisi júrgizilmek jáne robot-tehnıkalyq jab­dyq­tarmen qamtylýy 100 paıyzǵa jetkizilmek.

Astana qalasynda Elbasy tap­syrmalaryn, «Nur Otan» par­tııasynyń josparly mindetterin oryndaý maqsatynda júıeli ju­mys­tar qolǵa alynǵan. Atap aıtqan­da, «Prezıdenttiń bes áleý­met­tik bastamasynda» kórsetil­gen stýdent jastardy jataqha­na­larmen qamtý jobasy boıynsha Astanada alǵash ret memleket-jekemenshik áriptestigi negizinde taǵy bir qanatqaqty joba qolǵa alynbaqshy. Naqtyraq aıtqanda, 11 memlekettik kolledjdiń stý­dent­­terin turaqty úı-jaımen qamta­masyz etý úshin qala boıyn­sha buǵan deıin salynǵan ǵıma­rattar paıdalanylady. Osy bas­tama arqyly 2000 oryndyq ja­taq­hana qajettiligi óz sheshimin ta­bady. Sondaı-aq bul ádis sha­ǵyn jáne orta bızneske de qolaı­ly áser etip, jańa jumys oryn­dary­nyń ashylýyna sebepker bolady.

Sıfrlandyrý baǵ­dar­la­ma­syna sáıkes Astanada bıylǵy jyldyń qyrkúıek aıyna deıin smart-bilim, smart-medısına jáne E-PIK (páter ıeleri koo­peratıvi) jobalaryn júzege asyrý aıaqtalady.

Astana ákimi elordalyq árbir turǵynnyń sıfrly tólqujatpen qamtamasyz etiletindigine da toq­taldy. Bul júıe járdemaqy alýdy, memlekettik qyzmetterdiń ıgi­ligin kórýdi túrli tólemder júr­gizýdi ońtaılandyrmaq.

– 2017 jyly Astana qalasy boıynsha dárigerlik kezekke 2 mln adam elektrondy ádispen tirkeldi. Sondaı-aq buryn bes kúnge sozylatyn balany balabaqshaǵa tirkeý rásimi qazir bes mınýtta-aq júzege asyrylady, – dedi Á.Isekeshev.

Bul málimetter Elbasynyń kóńi­linen shyǵyp, Memleket bas­shy­sy atalǵan jospardyń tolyq­taı oryndalýyna tilektestik bildirdi.

Sıfrlandyrý – kásipkerlikke úlken qoldaý

Saıası keńestiń keńeıtilgen otyrysynda Qyzylorda oblys­tyq kásipkerler palatasynyń dırektory Ǵalymbek Jaqsylyqov elimizdegi kásipkerlik qyzmetti jetildirýge udaıy erekshe kóńil bólip otyrǵan Elbasyna el kásipkerleri atynan alǵysyn bil­dirdi. Osy oraıda, Memleket basshysy jýyrda qol qoıǵan kásip­kerlik qyzmetti retteýge qatysty zańǵa saı jergilikti jerde kásibin endi ashyp, jańa qalyptasa bas­taǵan kásipkerler úshin tekserý­ler men aıyppuldardyń ornyna profılaktıkalyq baqy­laý engizilip, jospardan tys tekse­rý­lerdiń merzimin 30 kúnnen 10 kúnge deıin qysqartý, birqatar salyq tólemderiniń mólsherlemesin azaıtý kózdelgeni belgili. Bul shaǵyn jáne orta bıznesti qoldaýǵa baǵyttalǵan ıgi qadamdardyń biri ǵana.

– Bıylǵy Joldaýyńyzda 2018 jyly sıfrly dáýir óner­kásibin qalyptastyrýǵa arnalǵan ın­dýstrııalandyrýdyń úshinshi bes jyldyǵyn ázirleý kerektigin aıttyńyz. Bul is kásipkerlikke úlken serpin bereri sózsiz. Qazir bizge tehnıkalyq sharttardy alý, sáýlet jáne jer máseleleri bo­ıynsha ruqsat berý qujattaryn rásimdeý boıynsha ashyqtyq qajet. Qoldanystaǵy zań­namalarda jer ýchaskesin alý merzimi eki aı dep kórsetilgen. Is júzinde ol jarty jylǵa deıin sozylyp ketedi. О́ıtkeni jer bólýge qatysty memlekettik mekemeler óte kóp, sosyn organdardyń arasynda ózara aqparattyq baılanys joq. Máselen Qyzylorda qalasynyń barlyq áleýmettik mańyzy bar ınjenerlik jelileri týraly aqparatpen qamtylǵan elektrondyq karta daıarlandy. Onyń negizinde bızneske barlyq ınjenerlik jelige qosylýǵa ruq­satty bir jerden alýǵa múmkindik beretin geoaqparattyq onlaın servıs júıesi quryldy. Buryn kásip­kerler tehnıkalyq shartty alý úshin qalanyń tórt jerin­de ornalasqan tórt mekemege baratyn. Oǵan tórt aıdaı ýa­qyt ketetin. Qazir arnaıy servıs arqyly úsh kúnde alady. Ýa­qyt pen qarajat aıtarlyqtaı únem­deledi, dedi Ǵ.Jaqsylyqov.

Kásipkerler palatasynyń ókili Syr óńirinde jer telimderin paıdalanýǵa ruqsat berý máse­lesine baılanysty da biraz sharýa atqarylǵanyn aıta kele, salany sıfrlandyrý shaǵyn jáne orta bıznes ókilderine úlken qoldaý bolǵanyna toqtaldy. Tek ýákiletti mekemelerdiń ózara qaty­nasyn retteýdiń arqasynda jer ýchaskesin berý merzimi 148 kúnnen 70 kúnge, al partııalyq usynys­tardan soń 29 kúnge deıin qysqartylǵan.

Memleket basshysy «Atame­ken» ulttyq kásipkerler pala­ta­synyń basshylyǵyna kásipker­lerge kórsetilip jatqan jeńil­dik­ter men halyqqa usynylǵan orta ıgilikterdi el arasynda keńi­nen nasıhattaý týraly tapsyrma berdi.

Al «YBYRAI jas programmıs­ter lıgasy» qoǵamdyq qorynyń jetekshisi Ázıza Shójeeva «Nur Otan» partııasy qolǵa alǵan baǵ­darlamalaý negizderin bala­larǵa mektep jasynan úıretý jobasynyń tıimdiligin, par­tııa­nyń Pavlodar oblystyq fılıa­ly tóraǵasynyń birinshi orynbasary Ilıa Terenchenko, ál-Farabı atyndaǵy Qazaq Ulttyq ýnıversıtetiniń áleýmettik damý jónindegi prorektory Sholpan Jamanbalaeva, «Jas Otan» jas­tar qanaty Jambyl oblystyq fılıalynyń tóraǵasy Ýálıhan Bolatbekter «Nur Otan» partııasy júktegen mindetterdiń oryndalýy jaıynda baıandady.

Jańa ıpoteka muqtaj jandarǵa baǵyttalýy tıis

Adamı kapıtaldy damytýdyń jańa deńgeıine kóterilýge, ha­lyq­tyń tabysyn arttyrýǵa jáne ómir sapasyn jaqsartýǵa mol múm­kindik beretin «Prezıdenttiń bes áleýmettik bastamasynyń» oryndalý barysy jaıynda Premer-Mınıstrdiń orynbasary Erbolat Dosaev keńinen baıan­dady.

– Bastamalardy júzege asyrý úshin Úkimet Jol kartasyn be­kit­ti. Atal­ǵan Jol kartasy aıasynda 35 is-shara qarastyrylǵan. О́tken naý­ryz-mamyr aılarynda sonyń 20-sy iske asyryldy. Sonyń ishin­de bastamalardy júzege asy­rýdyń zańnamalyq negizi qalyp­tasty. Mundaı ózara is-qımyl, «Nur Otan» partııasynyń júıe­li baqylaýy ár bastamanyń tıim­diligin arttyra túsedi. Aldaǵy ýa­qytta bul baǵyttaǵy jumys odan ary kúsheıtilip, Elbasy tap­syrmasynyń sapaly oryndalýyna barlyq kúsh-jigerimizdi jumsaıtyn bolamyz, – dedi Er­bolat Dosaev.

Premer-Mınıstrdiń orynbasary osydan soń bes bastamanyń árqaısysyna jeke-jeke toqta­lyp, negizgi jumystardyń barysy men oryndalý merzimin baıandady.

Atap aıtqanda, Ulttyq bank «7 – 20 – 25» baǵdarlamasy boıyn­sha ıpotekalyq nesıeleýdiń tujy­rym­damasyn bekitti. Bul júıe tek jańa páterler alýǵa ǵana ar­nalǵan. Bankter atalǵan baǵ­darlama boıynsha aldaǵy shil­de aıynda nesıeleýdi bas­taı­dy. Qaryz teńgemen beriledi jáne qo­symsha komıssııa men ózge de alymd­ar joq. Atalǵan baǵdar­lama boıynsha páterler baǵasy Astana, Almaty, Atyraý, Aqtaý qa­la­l­arynda 25 mln teńgeden, al ózge qalalarda 15 mln teńgeden asyrylmaıdy.

– Biz páterlerdi baspanasy joq jastar alǵanyn qalaımyz. Bul baǵdarlama birde bir baspanasy joq jandarǵa arnalyp otyr. Sondyqtan da osy baǵyttaǵy jumystar kimge jáne ne úshin jasalyp jatqanyn barsha qoǵamǵa túsindirý qajet. Tıisti esepteý­ler jasaldy, otbasynyń eki mú­shesi jumys istegen kezde esh­qandaı aýyrtpalyq bolmaıdy. Ipo­tekalyq nesıeniń ústemesi 7 pa­ıyzdan aspaıdy, – dedi Elbasy.

Elbasy osy rette oblys ákim­deri men atqarýshy organ basshy­laryna baǵdarlamany naqty iske asyrýdy, aımaqtarda bólingen qarajat shashaýyn shyǵarmaı paıdalanylýdy jáne eldiń ıgiligine sapaly qyzmet kórsetýdi atap tapsyrdy.

E.Dosaevtyń málimdeýinshe, tabys salyǵynyń tómendeýine baılanysty týyndaıtyn jer­gilikti bıýdjetterdiń tapshylyǵy respýblıkalyq bıýdjet esebinen óteledi. Bıyldan bastap JOO-daǵy tehnıkalyq mamandyqtarǵa bólinetin grant sany kóbeıtilgen, sondaı-aq stýdentterdi jataq­hanamen qamtýdyń ońtaıly tetigi jasalǵan. Úkimettiń esebinshe, elimizde 2019 jyly 5 myń oryn­dyq, al 2020 jyly qosymsha 15 myń oryndyq jataqhanalar paıdalanýǵa berilmek. Sondaı-aq shaǵyn jáne orta bıznesti damytýǵa arnalǵan shaǵyn nesıe kólemi de artyp, osy maqsatqa 63 mlrd teńge qarastyrylǵan, onyń basym bóligi aýyldyq eldi meken turǵyndaryna beriledi. Al Saryarqa gaz qubyry jelisiniń alǵashqy kezeńin 2019 jyldyń sońyna deıin aıaqtaý kózdelgen.

О́z kezeginde «Prezıdenttiń bes áleýmettik bastamasynyń» júzege asyrylýyn baqylaý jónindegi Qoǵamdyq keńestiń tóraǵasy, Senat depýtaty Ba­qyt­jan Jumaǵulov Keńestiń qoǵam­dyq monıtorıng jáne baqylaý júrgizýdi úılestirý, halyqqa keńinen aqparat berý, bastamalardy júzege asyrý kezindegi máse­lelerdi anyqtaý, olardy sheshý jóninde usynystar daıarlaý, sapaly oryndalýyna atsalysý isin tıimdi atqarýǵa ázir ekenin atap ótti.

Al Almaty oblystyq «Og­nı Alataý» gazetiniń bas redak­tory Atsalım Idıgov «Prezı­denttiń Bes áleýmettik bastama­syn» halyq zor úmitpen qabyl­daǵan­dyǵyn jáne «Nur Otan» partııa­sy Qazaqstan hal­qy Assam­bleıa­symen, barlyq azamat­tyq qoǵam­ ınstıtýttarymen birge bes áleý­met­tik bastamany iske asy­rýǵa baqy­laý júr­gizý bo­ıynsha júıeli jumys­ty bastap ketkenine toqtaldy.

Barlyǵy da halyqtyń ıgiligi úshin

Basqosýdyń kún tártibindegi máselelerge baılanysty baıandamalardy tyńdaǵan Elbasy memlekettik baǵdarlamalardy júzege asyrý jáne olardyń oryndalýyna baqylaý jasaý isindegi «Nur Otan» partııasynyń mańyzdy rólin atap ótti.

Qazaqstan Prezıdenti álemdik damýdyń jáne ekonomıkalyq úderisterdiń joǵary qarqynyna toqtalyp, jańa syn-qaterlerge beıimdelý qajettigin aıtty.

– Biz júzege asyrýdy jos­parlap otyrǵan jumystardyń bári básekege qabiletti bolýymyz úshin qajet. Ekonomıkanyń úshinshi jańǵyrýy, «100 naqty qadam» Ult jospary bizdiń tarapymyzdan atqarylýǵa tıis nárseniń bárin tolyq aıqyndap berdi, – dedi Nursultan Nazarbaev.

Memleket basshysy «Sıfrly Qazaqstan» baǵdarlamasyn já­­ne partııanyń sıfrlandyrý sa­la­syndaǵy jobalaryn oryn­daýdyń mańyzdylyǵyna nazar aýdardy.

Qazaqstan Prezıdenti Astana ekonomıkalyq forýmynyń qory­tyndysy boıynsha shyǵarylǵan sheshimder jóninde keńinen áńgi­meledi.

– Jahandyq damýdan qalyp qoımaý úshin basqarýdyń sapaly bolýy talap etiledi. Bul – mem­lekettik qyzmetti jetildirý degen sóz. Biz memlekettik qyz­met­ke qabyldaý úderisiniń ashyq­­tyǵyn qamtamasyz etý jáne merı­to­kratııa qaǵıdatyn ilgeri­letý má­selelerin sheshtik. Bul qadam­nyń oryndalýyn partııa qa­daǵalaýy kerek, – dedi Nursultan Nazarbaev.

Sonymen qatar Memleket bas­­shysy ınvestısııa tartý jáne básekege qabiletti eldi qalyp­tastyrý qajettigin atap ótti.

– Investısııalar zań ús­temdigi qamtamasyz etilgen, keli­simsharttary saqtalatyn, bilim­di memlekettik qyzmetshiler ju­mys isteıtin elge ǵana keledi. Al qazirgi jaǵdaıdaǵy básekege qabi­lettilik – sıfrlandyrýdy damytý, – dedi Qazaqstan Prezıdenti.

Sonymen qatar Nursultan Nazarbaev sybaılas jemqor­lyq­tyń aldyn alý jáne oǵan qarsy kúres júrgizý isinde sıfr­lan­dyrýdyń tıimdi ekenin aıtty.

Memleket basshysy agro­ónerkásip keshenin damytý, ónim­diliktiń ósimin qamtamasyz etý jáne aýyl sharýashylyǵy eksportyn arttyrý máselelerine toqtaldy.

Sońynda Qazaqstan Pre­zıdenti jańa jobalardy tıimdi júzege asyrýdyń jáne Úkimet pen «Nur Otan» partııasynyń aldyna qoıylǵan mindetterdiń mańyzdylyǵy jóninde aıtty.

– El ishinde qolaıly áleý­met­tik jaǵdaı bolǵanda ǵana memleket tabysty jumys isteıdi. Bul – Úkimettiń basty mindeti. Mem­leket tarapynan atqarylyp jat­qan jumystyń bári halyqqa arnal­ǵan, – dedi Nursultan Nazarbaev.

Saıası keńes otyrysynyń qorytyndysy boıynsha qaralǵan máselelerge baılanysty arnaıy qaýlylar qabyldandy.

Serik ÁBDIBEK,
«Egemen Qazaqstan»