Jıynǵa qatysýshylarǵa arnalǵan sózinde Elbasy bıyl búkil elimiz boıynsha 140 myńnan astam stýdent joǵary oqý ornyn bitirip, dıplom alatynyn atap ótti. Jalpy, atalmysh joǵary oqý ornyn bıyl bakalavrıat, magıstratýra jáne RHD baǵdarlamalary boıynsha 811 stýdent bitirdi. Onyń ishinde bakalavrıat baǵdarlamasy boıynsha 506 stýdent, magıstratýra boıynsha 302 túlek jáne doktorantýra dárejesi boıynsha 3 stýdent dıplom aldy. Dıplom alǵandardyń qatarynda qazaqstandyq jastardan bólek, Reseı, Qytaı, Tájikstan, Qyrǵyzstan jáne О́zbekstannan kelgen
8 sheteldik azamat bar.
Aıta ketý kerek, bıyl ýnıversıtettiń Medısına mektebi alǵashqy 25 túlegine dıplom berdi. Olar endi medısına doktorlarynyń, ǵylymı zertteýshiler men akademııalyq klınısısterdiń birinshi sanatyn tolyqtyrady.
– Búgin biz Qazaqstannyń eń úzdik oqý ornynyń túlekterine aq jol tileý úshin jınalyp otyrmyz. Nazarbaev Ýnıversıtettiń tórtinshi jylǵy bitirýshilerin jáne elimizdegi barlyq oqý oryndarynyń túlekterin shyn júrekten quttyqtaımyn! – dedi Qazaqstan Prezıdenti.
Nursultan Nazarbaev bilim ekonomıkasy men ınnovasııalyq damýdy qalyptastyrý isindegi zertteý ýnıversıtetteriniń róli men mańyzyn erekshe atap ótti. Sondaı-aq qysqa merzim ishinde Ýnıversıtet jańarýdyń sımvolyna jáne elimizdiń ǵylymı-zertteý, ınnovasııalyq jáne kadrlyq áleýetiniń ósý ortalyǵyna aınalǵanyn aıtty.
– Nazarbaev Ýnıversıtetiniń ǵalymdary halyqaralyq reıtıngi joǵary basylymdarda 1700-den astam maqala jarııalady, 36 patent alyndy. Korporatıvti demeýshiler ǵylymı zertteýlerge 40-tan astam grant bóldi. Ýnıversıtet ınnovasııalyq klasterdi tabysty qalyptastyrýdyń negizi boldy. Ǵylymı-tehnıkalyq qyzmet nátıjelerin kommersııalandyrý aıasynda 21 joba qoldaýǵa ıe boldy, – dedi Qazaqstan Prezıdenti.
Saltanatty rásimde ýnıversıtet basshysy Shıgeo Katsý myrza da Nazarbaev Ýnıversıtettiń túlekteri óz Otanynda da, sondaı-aq shetelderde de suranysqa ıe básekege qabiletti maman ekendigin aıtyp ótti. Alǵashqy doktorant túlekterdi qosa alǵanda, buǵan deıingi úsh jyldyń túlekteri, ıaǵnı 1800-ge jýyq stýdent ótken jyly ártúrli kompanııalarǵa tabysty jumysqa ornalasqan. «Túlekterdiń jartysynan kóbi birden jumysqa ornalasady. Olar qarjy qyzmetterin kórsetý, ınjenerııa, robot tehnıkasy sektorlarynda jumys isteıdi, iri konsaltıngtik kompanııalarǵa shaqyrtý alady. Biz kópshiliginiń óz bıznesin ashý úrdisin kórip qýanamyz. Bizdiń stýdentterimiz negizinen Qazaqstan aýmaǵynda jumys isteıdi, al syrtqa ketkender óz bilimderin ári qaraı jalǵastyrýdy kózdeıdi. Stýdentterdiń bir bóligi halyqaralyq kompanııalarǵa tabysty jumysqa ornalasady. Burnaǵy jyldary 30-dan astam túlek Eýropanyń, Soltústik Amerıkanyń jáne Azııanyń eńbek naryǵynda óz oryndaryn tapqan. Olardyń arasynda Google jáne Microsoft sııaqty jetekshi IT kompanııalarda, sondaı-aq Sılıkon alabynda jumysqa ornalasqan túlekter bar», deıdi Sh.Katsý.
Memleket basshysy ýnıversıtettiń odan ári tabysty damýy elimizdiń adamı kapıtalynyń artýyna septigin tıgizip, Qazaqstanda búkil Ortalyq Azııa óńiri aýqymyndaǵy tolyqqandy bilim berý habyn qalyptastyrýǵa múmkindik beretinin aıtty.
Nursultan Nazarbaev alǵa qoıylǵan mindetterdi iske asyrý úshin osy joǵary oqý ornyna aldyńǵy qatarly zııatkerlik jáne ǵylymı resýrstardy jumyldyrý, óndiris pen kásipkerliktiń ınnovasııalyq mádenıetine baǵyttalǵan oqý baǵdarlamalaryna bet burý, sondaı-aq qashyqtyqtan bilim berý platformasyn damytý arqyly Ýnıversıtet jumysyn jandandyrýdy tapsyrdy.
Shynymen de kelesi on jyldyń ishinde kóptegen jumys oryndary aıtarlyqtaı ózgeredi nemese tipti revolıýsııalyq tehnologııalardyń saldarynan joıylyp ketýi de múmkin. Keleshekte adamdarǵa qaraǵanda robottar men avtomattandyrylǵan prosester jaqsyraq jumys jasaıtynyn júırik ýaqyt ózi dáleldep kele jatyr. Demek, bolashaqta jasandy ıntellektimen yntymaqtasý, osy túlekterdiń enshisinde bolmaq.
– Ýnıversıtet elimizdiń ǵana emes, sondaı-aq alys jáne jaqyn shetelderdiń oqymystylaryn tartatyn ortalyqqa, jastardyń jobalaryn birlese júzege asyratyn orynǵa jáne Garvard, Korser, Han akademııasynyń onlaın-kýrstary úlgisimen bilim berýdiń ınternet-platformasyna aınalýǵa tıis, – dedi Qazaqstan Prezıdenti.
Sonymen qatar saltanatty sharada Nursultan Nazarbaev Astana ekonomıkalyq forýmynda kóterilgen jahandyq ózgeristerdiń bes megatrendi týraly aıtyp, eldiń aýqymdy ekonomıkalyq, saıası jáne rýhanı jańǵyrýyn júzege asyrý isindegi óskeleń urpaqtyń róline basa nazar aýdardy.
Ony aıtýdaǵy sebep, jańarǵan Qazaqstannyń kelbeti de, jańa formasııanyń urpaǵy da jáne muny ómirde iske asyratyn da búgingi túlekter ekeni daýsyz.
Aıta keteıik, túlekterdiń kópshiligi, atap aıtqanda 195 túlek Ǵylym jáne tehnologııalar mektebi boıynsha joǵary oqý ornyn támamdap otyr. Al 156 túlek Injenerııa mektebiniń, 155 túlek gýmanıtarlyq jáne áleýmettik ǵylymdar mektebiniń túlegi sanalmaq. Sondaı-aq magıstrlik baǵdarlamalar boıynsha Joǵary bıznes mektebinde 64 túlek, Joǵary bilim berý mektebinde 46 túlek, Joǵary memlekettik saıasat mektebinde 48 túlek, Gýmanıtarlyq jáne áleýmettik ǵylymdar mektebinde 33 túlek, Ǵylym jáne tehnologııalar mektebinde 23 túlek, Injenerııa mektebinde 63 túlek irgeli ýnıversıtet qabyrǵasynan úlken ómirge qanat qaqty.
Saltanatty rásimde Elbasy qolynan dıplom alǵandardyń biri Joǵary bilim berý mektebiniń kóp tildi bilim berý magıstri – Ásem Amantaı. Ol osyǵan deıin «Bolashaq» baǵdarlamasy boıynsha 2006-2009 jyldar aralyǵynda Mıchıgan memlekettik ýnıversıtetinde bakalavrıat boıynsha bilim alǵan. Bolashaqta úsh tildi bilim beretin ortalyq ashýdy armandaıdy.
Bilimimen ozǵandardy sanamalasaq, olardyń qatary jyldan jylǵa artyp kele jatqandyǵy qýantady. Elbasy tapsyrmasyna sáıkes, ýnıversıtet 2025 jylǵa deıin stýdentter sanyn eki esege kóbeıtip, bakalavrlardy 5 jarym myńǵa deıin jetkizýdi kózdeıdi. Ǵylymı jumysty qarqyndy damytý úshin RhD doktor sanyn da arttyrý kózdelgen. Oǵan Elbasy ustazdar qaýymynyń qajyrly eńbegi men baı tájirıbesiniń únemi qajet bolatynyn atap ótti.
– Jańarǵan Qazaqstannyń kelbeti de, jańa formasııanyń urpaǵy da jáne muny ómirde iske asyratyn da sizder bolasyzdar. Sizderdiń kúsh-qýattaryńyz, bastamashyldyqtaryńyz, aqyl-oılaryńyz ben kreatıvti ustanymdaryńyz Otanymyzdyń tabysty damýynyń kepili sanalady. Sizder ózderińizdiń qaıtalanbas ómir joldaryńyzdy júrip ótkeli tursyzdar. Men sizderdiń árqaısysyńyzdy maqtan tutamyn, – dedi Qazaqstan Prezıdenti.
Shara sońynda Memleket basshysy úzdik dıplomdardy tapsyrý sátinde Nazarbaev Ýnıversıtettiń oqytýshy-professorlar quramyn jáne túlekterdi taǵy da quttyqtap, olardyń óz ıdeıalaryn jemisti júzege asyrýyna tilektestik bildirdi.
Mıras ASAN,
«Egemen Qazaqstan»
