El bıliginiń aıtýynsha, áskerı ushaqtar Hamas uıymy ornalasqan 35-ten astam nysanany atqylaǵan kórinedi. Sonymen qatar Izraıl tarapy palestınalyqtar shabýyl jasady degen ýáj aıtýda.
Al Jazeera arnasynyń habarlaýynsha, atalǵan shabýyldy Hamas uıymy qatań synǵa alǵan. Uıym «áskerı aımaqtardy raketamen atqylaý keshirilmeıtin qylmys» dep resmı málimdeme jasady. Sondaı-aq Gazadaǵy birqatar brıgadalar áskerı is-qımyldy Palestına halqyna kúsh kórsetý áreketine teńep, beıbit turǵyndarǵa jasalyp jatqan Izraıl tarapynyń qysymyna álem nazaryn aýdarý qajet dep esepteıtinin jetkizgen.
Al Jazeera arnasyna suhbat bergen Hamas uıymynyń ókili Ismaıl Radvan daý-janjalǵa Izraıl bıligin kinálady. «Jaǵdaıdyń ýshyǵýy sıonıstik basyp alý bolǵandyqtan qaýipti jáne oqıǵanyń osylaı órbýine de sol kináli» deıdi ol.
Degenmen Izraıl tarapynyń óz aıtary bar. Syrtqy ister mınıstriniń hatshysy Emmanýel Nahshon týıtterdegi paraqshasyna «qarapaıym halyqqa jasalǵan qysymǵa eshqandaı memleket kónbeıdi de, qabyldamaıdy da. Biz de sóıtemiz» dep jazǵan.
Jalpy, 30 naýryzdan beri qarýsyz 121 palestınalyq Izraıl qarýly kúshteri tarapynan qaza tapty. Olar óz úıleri men jerine qaıtarýdy surap sherýge shyqqan bolatyn.
Al Jazeera arnasynyń málimetine saı, ázirge áýe shabýylynan keıin qaza tapqandar týraly málimet joq. Áıtse de, Izraıl áskeri úsh sarbazy jaraqat alǵanyn habarlaǵan.
Kelissózder qaıta jalǵasty
AQSh memlekettik hatshysy Maık Pompeo 12 maýsymda ótýi tıis Aq úı basshysy Donald Tramp pen Soltústik Koreıa prezıdenti Kım Chen Yn arasyndaǵy sammıttiń taǵdyry qyl ústinde turǵanyn málimdedi.
M.Pompeo Nıý-Iorkta eki ret KHDR-dan kelgen ókildermen kezdesti. Onyń aıtýynsha, kelissózder sátti júrgen, alaıda áli de keıbir máseleler tolyqqandy sheshilmegen kórinedi. Áıtse de, memlekettik hatshy qazirgi kezeń eki memleket úshin mańyzdy sát ekenin jetkizgen.
Esterińizde bolsa, AQSh prezıdenti Donald Tramp pen KHDR basshysy Kım Chen Yn 12 maýsymda Sıngapýrde ekijaqty sammıt ótkizýi tıis bolatyn. Biraq D.Tramp taıaýda jıynǵa qatyspaıtynyn málimdegen. Sıngapýrdegi sammıtten úlken úmit kútip otyrǵan halyqaralyq qoǵamdastyq Aq úı basshysynyń bul sheshimin narazylyqpen qabyldady. Aqyry AQSh-KHDR kelissózderi qaıta jalǵasatyn boldy.
CNN agenttiginiń habarlaýynsha, Soltústik Koreıa men Reseı eki el arasyndaǵy dıplomatııalyq baılanystyń ornaýyna 70 jyl tolýyna oraı ekijaqty jıyn ótkizbek. Seısenbi kúni Phenıanda ótken Reseı syrtqy ister mınıstri Sergeı Lavrov pen Kım Chen Yn arasyndaǵy kezdesýde osyndaı sheshim qabyldanǵan.
Qytaı ShYU-nyń sammıtine saqadaı saı
Maýsymnyń 9-10 kúnderi Sındao qalasynda Shanhaı yntymaqtastyq uıymynyń 17-shi sammıti ótedi. Jıyndy uıymdastyratyn Qytaı sońǵy ázirlikterin pysyqtap, sharaǵa tas-túıin daıyn otyr.
Xinhua agenttiginiń habarlaýynsha, sammıtti uıymdastyrýǵa 2000-nan astam erikti jumyldyrylǵan kórinedi. Qytaıdyń syrtqy ister mınıstri Van I jıynǵa el prezıdenti Sı Szınpın tóraǵalyq etetinin málimdedi.
Van I sammıt jumysy kezinde ShYU-nyń qazirgi jaǵdaıy jáne keleshektegi damýy talqylanyp, aımaqqa qatysty halyqaralyq jáne óńirlik mańyzdy máseleler sóz bolatynyn jetkizdi. Sondaı-aq sammıt barysynda Sındao deklarasııasy bekitilip, qaýipsizdik pen ekonomıkalyq yntymaqtastyqqa qatysty birqatar qujattarǵa qol qoıylady dep kútilip otyr.
Budan bólek, Xinhua agenttigi Qazaqstan Prezıdenti Nursultan Nazarbaevtyń Qytaıǵa memlekettik saparmen keletinin de aıtqan. Onda birqatar máseleler talqylanyp, ekijaqty kezdesýler ótkiziledi.
Agenttiktiń málimetine saı, Shanhaı yntymaqtastyq uıymy qurylǵaly múshe memleketter arasyndaǵy ekonomıkalyq áriptestiktiń jemisti bolyp, saýda aınalymy, ınvestısııa, kóptegen ortaq jobalar tıimdi júzege asyrylyp keledi. Máselen, ShYU men Qytaı arasyndaǵy saýda aınalymy bıyl 20,7 paıyzǵa ósip, 217,6 mıllıard dollarǵa jetken.
Jalpy, bul – ShYU keńeıtilgennen keıingi alǵashqy sammıt. Byltyr 2017 jyly Astanada ótken jıynda uıym quramyna Úndistan men Pákistan tolyqtaı múshelikke qabyldanǵan bolatyn.
Sholýdy daıyndaǵan
Abaı ASANKELDIULY,
«Egemen Qazaqstan»
