Berekeli otbasy – myqty memlekettiń irgetasy ekenin de osy zalǵa jınalǵan jurt biledi, soǵan umtylady. «Mereıli otbasy-2018» baıqaýyna qatysýshylar men jınalǵandardy oblys ákimi Arhımed Muhambetov quttyqtady.
– Urpaqtan urpaqqa berilip otyratyn adamgershilik, eńbekqorlyq, toleranttyq, úlkenge qurmet, kishige izet sekildi izgi qasıetterdiń barlyǵy da otbasynda qalyptasady. Bizdiń elimizde otbasyǵa jan-jaqty qamqorlyq kórsetiledi. Elbasy Nursultan Nazarbaevtyń «Prezıdenttiń bes bastamasy» atty Úndeýinde qoljetimdi turǵyn úı, balalardyń jataqhanasy men bilim granty, salyq jeńildigi sııaqty máselelerdiń barlyǵy da aldymen otbasyna qamqorlyq nıetinen týǵan. Mysaly, bıyl oblysta 300 myń sharshy metr turǵyn úı paıdalanýǵa beriledi. Bul ótken jyldan 10 paıyzǵa kóp. Qanshama otbasy qonys toıyn toılaıdy, turmysyn túzeıdi. Osy baıqaý nuryn tasytqan mereıli otbasylardyń barlyǵy da elimizdiń, ultymyzdyń baılyǵy, – dedi oblys basshysy.
Ulttyq baıqaý dástúrge engen bes jyldan beri oǵan oblystan 500 otbasy qatysqan eken. Al bıyl baıqaýdyń aýdandyq jáne qalalyq satysyna 92 otbasy qatysty, oblystyq deńgeıge 36 otbasy shyqty. Onyń saltanatty marapattaý sharasyna 20 otbasy keldi. Jyl saıyn baıqaý úsh atalymmen ótedi. Bıyl «О́negeli otbasy» atalymy boıynsha sahnaǵa shyqqan otbasylarynyń árqaısysy óz dástúrimen qyzyqty, baqytty. Degenmen baıqaýdyń aty – baıqaý, jeńimpazdyń aty atalý kerek. Qostanaı qalasynan Qarjaýovtar «О́negeli otbasynyń» jeńimpazy atandy. Qadyr men Maıra – oblysqa belgili ánshiler. Olar tárbıelegen ul men qyz da ata-ananyń izin qýdy. Endi bul otbasynda úshinshi urpaq, ıaǵnı Qadyr men Maıranyń bes nemeresi de sahnadan kórine bastady. О́negeli otbasyna dıplom men 150 myń teńgeniń sertıfıkaty tapsyryldy.
«Parasatty otbasy» atalymy boıynsha Taran aýdanynan kelgen Aleksandr men Lıýbov Semgınder otbasy jeńimpaz dep tanyldy. Otaǵasy temirjolshy bolyp eńbek etedi. Uldary Sergeı men Evgenıı áke jolyn qýyp, temirjolshy mamandyǵyn tańdady. Temirjolshylar áýleti atalatyn otbasy sporttan da quralaqan emes. Olarǵa dıplom men 150 myń teńgeniń sertıfıkaty tabys etildi.
«Mereıli otbasy» atalymynyń bas júldesi biraýyzdan Arqalyq qalasynan kelgen Almatovtar otbasyna laıyqtaldy. Jasy seksenniń seńgirine ketken Oreken aǵaı men Gúljıan apaı 8 bala tárbıelep ósirdi, olardyń barlyǵy da joǵary bilim alǵan maman. Balalarynan 16 nemere, 5 shóbere súıip otyr.
– Ulttyq tárbıeniń arqasynda Gúljıan ekeýmiz 58 jyl baqytty, berekeli ómir súrdik. Allanyń bergen balalaryn ósirdik. Gúljıan 80-ge kelgen anamdy, 90-ǵa kelgen ákemdi baǵyp-qaǵyp, jóneltti. Otbasyndaǵy berekeniń basty quraly – syılastyq, aǵaıyn-týysty qadirleý, dos-jarandy baǵalaý boldy. Meniń aıtar ósıetim, Qazaqstandaǵy ár otbasynda 5-6 bala bolýy kerek. Basty baılyq, eldiń quty, memlekettiń myqtylyǵy osynda, – dedi «Mereıli otbasy-2018» oblystyq baıqaýynyń jeńimpazy bolǵan otbasynyń atasy Oreken aǵaı.
Mereıli otbasyna oblys ákimi dıplom men 300 myń teńgeniń sertıfıkatyn tabys etti.
Endi Almatovtar otbasy respýblıkalyq «Mereıli otbasy-2018» baıqaýyna Qostanaı oblysynyń atynan qatysatyn bolady.
Názıra JÁRIMBET,
«Egemen Qazaqstan»
Qostanaı oblysy
