Kasılıassyz da kúshi myǵym Ispanııa

Irikteýden irkilmegen «Qyzyl fýrııa»

Ispanııa quramasy úshin 2018 jylǵy álem chempıonatynyń irikteý kezeńi sátti ótti. Hýlen Lo­petegı shákirtteri «G» tobyn­da sózsiz kósh bastady. Irikteý ke­zeńi aldynda mamandar Is­panııaǵa osy topta ekinshi orynda qalǵan Italııa quramasy qar­sylyq kórsetedi degen boljam jasaǵan-dy. Alaıda Pırıneı túbeginiń fýtbolshylary fýtbol mamandary sáýegeılikteriniń byt-shytyn shyǵardy. On kezdesýdiń toǵyzynda jeńiske jetken ıspandar tek túzde ǵana ıtalııalyqtarmen teń oınady.

Búginde Ispanııa quramasynyń asyǵy alshysynan túsip tur. Sebebi komandada álemdik deń­geı­de óner kórsete alatyn Inesta, Ramos, Sılva, Pıke sekildi ardager oıynshylar bar. Bulardyń kez kelgeni óz sheberlikteriniń arqasynda oıyn taǵdyryn sheshe alady. Buǵan dálel 2008 jáne 2012 jyly Eýropa chempıonatynda, 2010 jyly álem chempıonatynda jeńiske jetkende naq osy jigitter komandasyn alǵa jeteledi. Al bulardyń qataryna Is­ko, Kos­ta, Vaskes, qaqpashy De Heanyń qosyl­ǵanyn eskersek, qurama deıgeıi anaǵurlym joǵa­ry ekenin ańǵarý qıyn emes. Onyń ústine bıylǵy jylǵy naýryzdyń 27-sinde Ispa­nııa Argentına fýtbolshylaryn 6:1 esebimen oısyrata jeńip, álem chempıonatyna tek altyn úshin baratyndyqtaryn ańǵartqandaı boldy.

Ispanııa álem chempıonatynyń toptyq kezeńinde tájirıbeli Por­týgalııa, tisqaqqan Iran jáne Marokko quramalarymen ózara myqtyny anyqtaıdy. «Chelsı» komandasynyń bas bapkeri Joze Moýrınıýnyń pikirinshe, Ispanııa men Portýgalııa tek «V» tobynda ǵana emes, jalpy álem chempıona­tynda bas­ty fa­vorıtterdiń biri. Alaıda Is­pa­­nııanyń bas jattyq­ty­rý­shy­sy Lopetegı mundaı pikirmen kelis­peıtinin aıtty. «Biz­diń top­taǵy komandalardyń osaly joq. Portýgalııa Eýro-2016 chempıony, Marokko Afrı­ka qurlyǵyndaǵy úzdik komanda­lary­nyń biri. Iran bolsa, Azııa­daǵy myqty ári irik­teý kezeńinde eń az gol ji­ber­gen qurama. Bul top­ta kút­pegen esep tirkelýi ábden múmkin».

Árıne bul jerde Lopetegı bapker «aryq sóılep, semiz shyq­qysy» keletin sııaqty. Áıtpese kezinde oıynshy retinde «Real» men «Barselonanyń» jeıdesin kı­gen bul bapker 2011, 2012 jyldary 19 jasqa deıingi Ispanııa quramasymen Eýropa chempıona­tynda eki márte, 2013 jyly Is­pa­nııa jastar komandasymen de kári qurlyqtyń basty dodasynda jeńiske jetpes edi ǵoı. Áliptiń artyn baǵaıyq.

Sondaı-aq 21 mamyrda bas bap­ker álem chempıonatynda dop tebetin 23 negizgi fýtbolshynyń tizi­min jarııalady. Kóptegen beldi basylymǵa quramaǵa sha­qyr­tylǵan 23 fýtbolshy emes, oǵan enbeı qalǵandardyń tizimi qyzyq boldy. Sebebi ÁCh-2018 bar­maıtyn ıspandyq aıaqdop sheberlerin tizbektep shyqsańyz, «ah» urasyz. Kasılıas, Fab­regas, Mata, Torres, Vılıa... jal­­ǵasyp kete beredi. Osy fýtbol­shy­lardyń ózi birinshilikte óner kór­setetin kóptegen qurama oıyn­shy­larynyń deńgeıinen asyp túseri anyq. Áıtkenmen, chempıon­dyqtan dámeli komandanyń qo­sal­qy qu­ra­my da uzyn-sonar bolatyny bel­gili. Solaı bolý kerek te.

Ár fýtbolshyǵa – 800 myń eýrodan

Sóz reti kelgende osymen on be­sinshi márte álemdik dodada syn­ǵa túsetin Ispanııanyń ishki chem­pıonaty – La Lıgany da aıta ketsek. Álemdegi eń myqty chem­pıonattyń biri La Lıgada kezinde talaı tanymal fýtbolshylar – Ronaldo, Rıvaldo, Zıdan, Kannavaro, Fıgý dop tepkeni belgili. Búginde FIFA-nyń «Eń úzdik fýtbolshysy» ataǵyn on jyl boıy ózara bólisip kele jatqan Krıshtaný Ronaldý men Lıonel Messı de osy elde óner kórsetetini belgili.

Bıyl Chempıondar lıgasynda «Real», Eýropa lıgasynda «At­letıko» komandalary jeńimpaz bolǵannan keıin, Ispanııa Koroldik fýtbol federasııasy «het-trık» jasaý­dan úmitti ekenin ańǵartty. Iаǵnı álem chempıonatynda jeńiske jetkisi keledi. Ol úshin federasııa fýtbolshylarǵa qomaqty syıaqy taǵaıyndaǵan.

«Marca» basylymynyń jazýyn­sha, eger de Ispanııa oıynshylary sátti óner kórsetip, álem chempıonatynyń kýbogyn basyna kóterse, onda árbir oıynshy 800 myń eýro syıaqy alady.

Ispanııa alǵashqy oıynyn 15 maýsymda Portýgalııaǵa qarsy ótkizedi. Eger de jeńiske jetip jatsa, onda chempıonattyń 1/8 fınalyna bir taban jaqyndaı túsedi. Al olardy «A» tobynyń úzdikteri kútip alady.

Ispanııa quramasynyń tizimi:

Qaqpashylar: Davıd De Hea (Manchester Iýnaıted, Anglııa), Kepa Arrı­sabalaga (Atletık), Pepe Reına (Napolı, Italııa);

Qorǵaýshylar: Jordı Alba (Barselona), Sesar Aspılıkýeta (Chelsı, Anglııa), Danıel Kar­vahal (Real), Nacho Monreal (Ar­senal, Anglııa), Fernandes Ig­lesıas Nacho (Real), Alvaro Od­rıosola (Real Sosedad), Je­rar Pıke (Barselona​), Serhıo Ramos (Real​);

Jartylaı qorǵaýshylar: Isko (Real​), Tıagý Alkantara (Ba­varııa, Germanııa), Serhıo Býs­kets (Barselona), Davıd Sılva (Manchester Sıtı, Anglııa), An­dres Inesta (Barselona​), Nı­ges Saýl (Atletıko), Koke (Atle­tıko);

Shabýylshylar: Asensıo (Real), Iаgo Aspas (Selta), Dıe­gý Kosta (Atletıko), Moreno Rod­rıgo (Valensııa), Lýkas Vaskes (Real​).

Almas MANAP,
«Egemen Qazaqstan»