Aqtaýdaǵy «Kaspıı» fýtbol klýby óner kórsetetin stadıonda qazir jóndeý jumystary bastalyp, is alǵa jyljydy. Jaqyn arada jergilikti jankúıer bir jarym jyl ýaqyt salyp súıikti komandasymen qaıta qaýyshýy yqtımal. Al «Atyraý» komandasy negizgi mekeni «Munaıshyda» óz oıyndaryn ótkize almaı, qala mańyndaǵy «Tomarly» degen stadıondy jaǵalap júr. Talaı márte minbelerde sóz bolǵan bul másele sheshimin taba alar emes. «Atyraý» komandasy elimizdiń 4 dúrkin chempıony – «Astanamen» bolatyn oıyndy osy «Munaıshyda» ótkizýi kerek bolǵan. Alaıda Qazaqstan fýtbol federasııasynyń tehnıkalyq komıteti mundaı sapasyz alańda fýtbol oınaýǵa ruqsat bermegen. Sodan beri jankúıerler qaýymy dabyl qaqty.
1950 jyly paıdalanýǵa berilgen «Munaıshy» stadıony Qazaqstandaǵy eń «ardager» sport kesheni desek artyq emes. Munaıly ólke Atyraýda qanshama sporttyq jarystarǵa pana bolǵan, qutty meken halyqqa armansyz qyzmet qyldy. 1999 jyly qaıta jóndeýden ótip, sál de bolsa reńi kirip qalǵan edi. Odan keıin 2014 jyly taǵy bir kosmetıkalyq jumystar júrgizilipti. Degenmen stadıonnyń qazirgi jaǵdaıyn kórseńiz, tozyǵy jetkenine esh shúbá keltirmeısiz. «Atyraý» komandasy qazir óziniń ekinshi stadıony «Sýdoremontnıkte» de emes, qala mańyndaǵy «Tomarly» stadıonynda oınap júr. Sebebi «Sýdoremontnıktiń» ózi talaptarǵa saı emes. Bul jaǵdaıǵa qarap Atyraý qalasyna jańadan salynǵan jaqsy bir stadıon kerektigin anyq uǵasyz. Jankúıerlerdiń de talaby osy.
Qurmanǵazy JARMUHABETOV, jankúıer:
– «Munaıshy» stadıonynda fýtbol oınaý bylaı tursyn, ony tamashalaýdyń ózi óte qıyn. Eshqandaı jaǵdaı qarastyrylmaǵan. Otyratyn oryndyqtar synǵan, sanıtarlyq tazalyq syn kótermeıdi. Jasyl alań shurq tesik. Fýtbolshylar kıim sheshetin bólme men dárethana jaıly sóz qozǵamaı-aq ta qoıaıyn. Bir mysal, ótkende Samat Smaqov «Atyraýdaǵy stadıon Qazaqstandaǵy eń nashar stadıon» dep aıtty. Bir jaǵynan namysymyzǵa da tıetin sóz, alaıda aýrýyn jasyrǵan óledi. Qalamyzda neshe túrli iri munaı kompanııalary bar. Solardy demeýshilikke tartsa da oblys ákimdigi bir stadıon qurylysyn bastasa eken dep tilep otyrmyz.
«Atyraýdyń» mundaı oqıǵaǵa tap bolýy birinshi márte emes. 2012 jyly Qazaqstan fýtbol federasııasynyń sheshimimen «Munaıshy» stadıonynda fýtbol oıyndaryn ótkizýge tyıym salyndy. Odan keıin 2014 jyly qaıta jóndeýden ótipti. Endi qurylys tártibi boıynsha arada 5 jyl ótpese stadıon jóndelýine qarjy bólinbeıdi eken. Iаǵnı muńy kóp «Munaıshy» 2019 jyldy kútedi.
Azamat BEKET, Atyraý oblysy sport basqarmasynyń basshysy:
– 2014 jyly qaıta jóndeý jumystary júrgen joq. Tek jasyl alań ǵana jańartyldy. Biraq qazir alańnyń qos qaqpasynyń aldy oıylyp qalǵan. Biz sol jerge ózimiz jasyl shóp ósirip jatyrmyz. Bir qaqpanyń aldy ǵana durys kelińkiremeı, shóbi jatyq bolmaı tur. Bul sál ýaqytty talap etetin jaǵdaı. Jaqyn arada «Atyraý» klýby óz alańyndaǵy oıyndaryn «Munaıshy» stadıonynda ótkize bastaıdy. Al stadıonnyń túgel jóndeý jumystary tek keler jyly ǵana iske asady. Biz bul jaǵdaıdy jankúıerlerge túsindirip aıttyq.
О́tken apta sońynda jankúıerler alqasy oblystaǵy sport basqarmasy men klýb basshylarymen kezdesý ótkizipti. Talap qoıǵan jankúıerler suraqtaryna tolyqqandy jaýap ala almaı kúpti kóńilmen qaıtqan. Komandanyń deni – legıonerler jyl basynan beri mardymdy nátıje kórsetpeı júr eken. Mysaly, Sıkımıch pen Babatýnde sekildi sheteldik shabýylshylar maýsym bastalǵaly beri 1 goldan ǵana soqqan. Osyǵan baılanysty klýb basshysy Tımýr Negımovke habarlasyp mán-jaıdy bildik.
Tımýr NEGIMOV, FK «Atyraý» dırektory:
– Legıonerlerdi bapkerler alady. Men tek solarǵa qarjy taýyp berýmen ǵana aınalysamyn. Sıkımıchti ótken jyldan beri qaldyryp, komandada ustaýymyzdyń sebebi bar. Sonyń arqasynda ótken jyly 4 oıynda jeńiske jettik. Babatýnde keshe ǵana gol soqty. Jaqyn arada ashylyp oınap ketedi dep otyrmyz. Al stadıonǵa keletin bolsaq, biz «Munaıshyda» oınaýǵa ruqsat aldyq. 17 maýsym kúni «Tobylǵa» qarsy matchymyz sonda ótedi.
Toqsan aýyz sózdiń tobyqtaı túıini Atyraýda jańa stadıon salyný jaıly jospar joq. Tek 3000 adamǵa arnalǵan jabyq manej salynady. Odan bólek «Munaıshy» men «Sýdoremontnık» stadıondary kúrdeli jóndeýden ótedi eken. Bul endi, árıne buryn da aıtylyp kele jatqan áńgimeler men josparlar. Jyl saıyn qaıtalanatyn jaǵdaı túbi sheshimin tapsa eken deımiz. Qurǵaq ýádemen aldarqatyp otyrǵan basshylardyń isin jankúıerler bilmeıdi emes, bilip otyr. Amal qansha?!
Aıtpaqshy, «Qaıratqa» qarsy ótken oıynda 3:1 esebimen jeńilgen «Atyraý» jankúıerlerdiń erekshe «alǵysyn» aldy. Kórermender jasyl alańǵa dárethana qaǵazyn laqtyrdy.
Ermuhamed MÁÝLEN,
«Egemen Qazaqstan»
