Oqıǵa jýyrda Túpqaraǵan aýdany Saıyn Shapaǵatov aýylynda bolǵan. Sol túni ákesi jumysqa ketken otbasynyń anasy da balabaqshaǵa túngi kezekshilikte bolady. Ata-ana kishisi 3 jastaǵy balalarǵa bas-kóz bolýdy tuńǵyshy Darhanǵa tapsyrady.
– Túngi mezgilde úıdiń ishin qaıta-qaıta aralap, quddy bir tótenshe jaǵdaı oryn alatynyn júregim sezgendeı boldy, biraq uıyqtap ketippin. Túsimde tilsiz jaýmen arpalysyp jatyr ekenmin. Oıanyp kettim. Rasynda kóz aldym tútinnen baılanyp qaldy, úıdiń ishi tumandanyp ketken. Dereý inim men úsh qaryndasymdy úıden alyp shyǵyp, kórshiniń úıine aparyp tastaǵan soń, órt sóndirý qyzmetine habarlastym, deıdi batyr bala Darhan Ámirhan.
О́rt sóndirýshilerden belgili bolǵandaı, shaqyrtý 02:12 ýaqytynda túsken. Mamandar tilsiz jaýdy tez arada aýyzdyqtaǵan. Al órttiń sebebi naqty neden ekendigi ázirge belgisiz. Mańǵystaý oblysy tótenshe jaǵdaılar departamentiniń órt sóndirý jáne avarııalyq qutqarý qyzmeti memlekettik mekemesiniń basshysy Erlan Máýlenov bolsa, órt toqtyń qysqasha tuıyqtalýy sebebinen paıda bolǵan degen aldyn ala boljam jasap otyr. Sonymen qatar órt saldarynan keltirilgen materıaldyq shyǵyn mólsheri de jaqyn kúnderi belgili bolmaq. «Nur Otan» partııasy Mańǵystaý oblystyq fılıaly tóraǵasynyń birinshi orynbasary Nurı Týmyshev batyr balanyń ákesi Baqytjan Bolatovqa Alǵys hat tapsyrdy. Darhanǵa tótenshe jaǵdaılar departamenti basshysynyń atynan Alǵys hat, velosıped, baǵaly syılyqtar berildi.
– Aldymen Alla, sodan soń balama rızamyn. Kim biledi, ol qaısarlyq tanytpaǵanda, bes balamnan aıyrylyp qalýym múmkin edi. О́zge zattardyń bireýi de paıdaǵa aspaıtyn dárejede órtke oranǵan úıdiń ishinen tek Quran kitaptyń janbaı qalýy asyl dinimizge degen senim-qurmetimizdi nyǵaıtyp, kóńilimizdi qýanyshqa bóleıdi. Bizdi Qudaı, Quran qutqardy, – deıdi Darhannyń ákesi Baqytjan.
Qazirgi tańda otaǵasy jańa úı salýdyń qamyna kirisken.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
