Aýyzasharǵa Mańǵystaý oblysy ákiminiń orynbasary M.Sqaqov qatysyp, qýǵyn-súrgin qurbandary qalaı qurmetteýge de laıyq ekendigin aıtyp, aýyzashardy uıymdastyrýshylarǵa alǵys aıtty.
О́ńirdiń belgili aqsaqaldary, zııaly qaýym ókilderi, memlekettik qyzmetkerler men BAQ ókilderi, sondaı-aq qala turǵyndary qatysqan aýyzasharda Mańǵystaý oblysynyń Bas ımamy Smaıyl qajy Seıitbekov ımandylyq, adamgershilik baǵytynda ýaǵyz aıtyp, oraza tutýdyń erekshelikteri týraly baıandady.
Belgili dinbasy, qyzyl ımperııanyń qylyshynan qan tamyp turǵan keziniń ózinde ómirine talaı qaýip tónse de dinı ustanymyn tárk etpeı, dinine berik, antyna adal, halqyna qamqor bolǵan Erjan haziret esimi – mańǵystaýlyqtar úshin qasterli esim. Jýyrda ishinde halqymyzdyń dástúrli dinı joly baıandalǵan qos qoljazbasy tabylyp, tyń jańalyq retinde jurtymen jamyraı tabysqan bolatyn. Dertti qoǵamǵa kezi kelgende berilgen dárideı saf jol, naq ustanymdy kórsetken qos qoljazba din ókilderi men dintanýshylar tarapynan joǵary baǵalanyp, adasqan urpaqty aq jolǵa bastar baǵdarsham retinde tanylýda. Qazirgi tańda Erjan haziret Tólegenulynyń ekinshi kitaby aýdarylý ústinde. Jańa kitap qoldanysqa berilgen sátte halyqtyń taǵy bir jaǵymdy jańalyqpen júzdeseri, kópten kútken taǵylymdy baǵytty tanyry anyq. Demek, haziretti taný, onyń taǵylymdy isin jalǵastyrý, ultjandy, halqymyzdyń dástúr men dindi sabaqtastyrǵan saf jolyn jalǵastyrar býyn qalyptastyrý baǵytyndaǵy jumystar bolashaqta keń arnaǵa túsip, qanat jaıa beretin bolady.
Aldyna súbeli jumystar men mańyzdy mindetter qoıyp otyrǵan «Erjan haziret Tólegenulynyń isi men eńbegin este qaldyrý» qoǵamdyq qorynyń qasiret qurbandarynyń rýhyna jáne aýzy berik jurtshylyqqa arnap aýyzashar berýi - qordyń taǵylymdy, ulaǵatty isteriniń biri ǵana.
Aýyzasharda Erjan hazirettiń kózin kórgen azamat, búginde 80-niń seńgirindegi el aǵasy - T. Kóshekov haziret týraly estelik áńgimelerin aıtsa, D.Áripov, Q.Erejepov syndy azamattar jaqsy iske qatysty oı-pikirlerin ortaǵa saldy.
Sondaı-aq, ertesine qor tóraǵasy B.Nurjigituly bastaǵan azamattar izgi isti Erjan haziret máńgilik meken etken Shaqpaq ata qaýymyna baryp jalǵastyryp, aýyzashar berip, ári árýaqtar qurmetine sadaqa shalyp, Quran baǵyshtap, elimizdiń amandyǵy, jerimizdiń tynyshtyǵy úshin tilek tilep, duǵa jasady.
Gúlaıym ShYNTEMIRQYZY,
«Egemen Qazaqstan»
