Atalǵan eki demalys aımaǵynda aldaǵy jaz aılarynda 59 myń 446 oqýshy kezeń-kezeńimen demalatyn bolady. Osy maqsatqa aýdan ákimi Jamantaı Beısenbaevtyń bastamasymen jergilikti bıýdjetten 37 mln 986 myń teńge bólinip otyr. Bul týraly 1-maýsym Halyqaralyq balalar quqyǵyn qorǵaý kúnine oraı "Tolaǵaı" jáne "Erkejan" jazǵy saýyqtyrý lagerleriniń maýsymdyq ashylýy saltanatynda málim boldy.
"Tolaǵaı" qala syrtyndaǵy jazǵy saýyqtyrý lageriniń dırektory Ǵ.Boranbaevtyń aıtýynsha, lager bir mezette 100 balany qabyldasa, jaz boıy on maýsymda 1000 balany demaldyrýǵa múmkindigi bar. Munda balalardyń qaýipsizdigi qatań baqylaýǵa alynyp, tárbıeshilerge úlken jaýapkershik artylyp otyr. Osy maqsatta balalarǵa lagerde túngi kezekshilik uıymdastyrylyp, elektr, órt, jolda júrý, basseınge shomylý, sport alańyndaryndaǵy qaýipsizdik týraly nusqaýlyqtar tanystyrylyp, kún saıyn eskertip otyrady.
Lagerdiń tárbıelenýshilerine emdeý-profılaktıkalyq, saýyqtyrý is-sharalaryn júrgizý maqsatynda as máziri men daıyndaý sapasy qatań tekseriletin bolady. Oqýshylar 5 mezgil tamaqpen qamtamasyz etiledi. Sondaı-aq, balalardyń kelgendegi jáne ketkendegi salmaǵy men boıyn ólsheý, densaýlyǵyn qadaǵalap otyrý, syrqattanǵan jaǵdaıda alǵashqy dárigerlik kómek kórsetý úshin medbıkeler qyzmet etedi. Balanyń jeke basynyń gıgenasyn, tósek orynnyń tazalyǵyn saqtaýdy qadaǵalaý tárbıeshilerge júkteledi. Balalardyń dene bitimin durys jetildirý maqsatynda túrli sporttyq sharalar uıymdastyrylmaq.
Demalýshy balalardyń aqyl-oı, sana-sezimin jetildirý boıynsha da túrli ádebı-sazdy keshter, mádenı is-sharalar, tanymdyq oıyndar, baıqaýlar men saıystar ótkiziledi. Budan bólek, balalardyń boıyn sergitý úshin taza aýada arnaıy serýender uıymdastyrylady. Sondaı-aq, lagerde kún saıyn bı keshteri ótkizilmek.
Aıta keteıik, "Tolaǵaı"- dan bólek, "Erkejan" qala syrtyndaǵy jazǵy saýyqtyrý lageri de jaz boıy 800-ge jýyq balany qabyldaýǵa qaýqarly. Aýdan boıynsha jaz mezgilindegi barlyq saýyqtyrý jáne demalys sharalarynyń túrlerimen 60 myńǵa jýyq balany qamtý josparlanýda. Bul kórsetkish mektep oqýshylarynyń 97 paıyzyn quraıdy.
