Búgin astanada osy maýsymda birinshi ret dreg-reısıngten jarys ótedi. Munda Qazaqstannyń barlyq avtopılottary ózderiniń sheberlikterin kórsetýge keldi. Barlyǵy – 30-dan astam qatysýshy boldy.
«Qatysýshylar budan da kóp bolýy kerek edi, aýa raıyna baılanysty birazy kelmeı qaldy. Búgin 5 klass bolady, ólshemi – ýaqytsha dáliz boıynsha. Aldaǵy ýaqytta barlyq jazǵy maýsymda budan da qyzyqty orasan jarystar ótkizemiz», – dedi jarys máresin uıymdastyrýshy Anatolıı Bondar.
Jyldamdyqqa ójet áýesqoılar arasynda bir ǵana avtopılotshy qyz bar, ol – 25 jasar Lına Golovına. Mamandyǵy boıynsha telearna rejısseri, al jan-dúnıesi ekstremal Lına tipti er azamattar ajyrata berýge qınalatyn avtonyń túr-túrin, motordyń qaısysy maıdy jemeıtini týraly jilik-jiligin shaǵady. Jarysqa kóliktiń tek tehnıkalyq sapasy ǵana emes, oǵan mashyq kerektigin, tez áreket ete biletin pılottyq jyldamdyq pen minip kele jatqan kóligińniń barlyq múmkindigin meńgere bilýiń tıis deıdi. Kóliktiń rýline otyryp kórgeni sol, birden mahabbaty ekenin túsingen ol, qazir draıvsyz ómirin elestete almaıdy.
«Árıne keıde qorqasyń, joǵary jyldamdyq, tehnıka, biraq draıv kezinde adam aıtyp jetkizgisiz bir kúıge enesiń. Erlermen jarysqa túsý qıyn emes, sebebi birinshi kezekte barlyǵymyzdyń hobbıimiz bir jáne toptasqan úlken komandamyz», – deıdi L. Golovına.
Aıta keteıik, dreg-reısıngten ótken qala kýbogy «Biz joldardaǵy qaýipsizdik úshin», «Astana – esirtkisiz qala» aksııasy jáne Astananyń 20 jyldyǵy sheńberinde ótkizilip jatyr.
