Dóńgelek ústel jumysy Ánuran aıtýdan bastalyp, memlekettik rámizder tarıhyna qatysty beınefılm kórsetýmen jalǵasyn tapty. Is-sharany Almaty qalasy ákimi apparatynyń «Qoǵamdyq kelisim» KMM dırektory J.Sh.Murynova júrgizip, aıtýly kúnge qatysty quttyqtaý lebizin bildirdi. Almaty qalasy Qazaqstan halqy Assambleıa Hatshylyǵynyń meńgerýshisi N.A.Balǵymbaev quttyqtaý sózinen keıin memlekettik rámizderdiń qabyldaný tarıhyna toqtaldy.
«Búginde Táýelsiz Qazaqstannyń rámizderimen qatar Ata zańy, ulttyq valıýtasy elimiz tarıhy úshin kıeli de qasterli uǵym retinde tarıhymyzdyń, mádenıetimiz ben dástúrimizdiń habarshysy retinde ultymyzdyń maqtanyshyna aınalǵan. Sondaı-aq Memleket basshysynyń «Rýhanı jańǵarý: bolashaqqqa baǵdar» baǵdarlamasynda kórsetilgen qundylyqtarymyzdy álemdik deńgeıde dáripteýge, qadirlep-qasterleýge úndeıtin basty uranymyz ispetti. Búginde elimizdiń damýyna, álemniń ozyq elderiniń qataryna qosylýynda, ulttyq qundylyqtarymyzdy dáripteýde jigerli jastardyń jaýapkershiligi joǵary. Memlekettik basshysynyń tapsyrmasyna oraı Almaty qalasynda jastarǵa baǵyttalǵan keshendi baǵdarlamalar júzege asyp keledi. Sonyń dálelindeı ótken jyl jastar jyly retinde qabyldanǵan bolatyn. Memlekettik rámizderge degen qurmet jastar boıynda otansúıgishtik qasıetterdiń damýyna yqpal etedi. Al boıynda eli men jerine degen súıispenshiligi joǵary jastardyń kelesheginen kúter úmitimiz zor» dep atap ótti. Al Indýstrııa jáne jańa tehnologııalar mınıstrliginiń Almaty qalasy boıynsha Tehnıkalyq retteý jáne metrologııa komıteti departamentiniń bas mamany Q.B.Qyzǵarın «QR memlekettik rámizderin qoldaný boıynsha ulttyq standarttar» taqyrybyna baıandama jasap, rámizderdi qoldaný tártibine, erejesine qatysty naqty málimettermen bólisti. Osyǵan oraı «Almaty qalasynda jaýyn-shashynnyń jıi bolatyndyǵyn eskersek, rámizderdiń ońyp, jyrtylyp ketpeı, qalpynyń durys saqtalýyna tıisti mekemeler basshylary aıryqsha baqylaý jasap otyrýy qajet»,-dedi J.Sh.Murynova.
Kelesi baıandamashy D.A.Qonaev atyndaǵy Eýrazııalyq zań akademııasy Qoǵamdyq pánder jáne Qazaqstan halqy Assambleıasy kafedrasynyń meńgerýshisi B.Z.Battalhanov rámizder tarıhyna sholý jasady. Búginde atalǵan akademııada rámizderge baılanysty arnaıy leksııalar oqylyp, stýdentterdiń tolyqqandy aqparat alýyna múmkindikter qarastyrylǵan.
Egemendik jáne memlekettik atrıbýttar arqyly otansúıgishtikti qalyptastyrý, áskerı qyzmetkerler men jastar sanasyn qalyptastyrýdaǵy memlekettik rámizderdiń róli, t.b. taqyryptarǵa baıandama jasaǵan M.O.Áýezov atyndaǵy Ádebıet jáne óner ınstıtýtynyń Syrtqy baılanystar bóliminiń meńgerýshisi S.V. Ananeva, T.Júrgenov atyndaǵy Qazaq ulttyq óner akademııasynyń professory M.J.Shaımerdenova, QR Ulttyq qaýipsizdik komıtetiniń Shekaralyq qyzmet akademııasynyń bas oqytýshysy D. Q.Belǵojaev, «Jas qadam» jastar qoǵamdyq uıymynyń tóraǵasy M.A.Ahmetov qoǵamnyń árbir múshesi qasterleýge tıis memlekettik rámizder – qazaq eliniń ótkeni men búgini, dep atap ótti.
Elvıra SERIKQYZY,
«Egemen Qazaqstan»
