Ú.Ybyraı atyndaǵy Aqmola oblystyq fılarmonııasynyń sahnasynda «Elordadan elge sálem» konserttik baǵdarlamasymen «Astana» estradalyq-sımfonııalyq orkestri óner kórsetti. 20 jyl buryn elorda ákimdiginiń bastamasymen qurylǵan orkestrge QR eńbek sińirgen qaıratkeri Aleksandr Abylaev jetekshilik etedi. Ujymnyń repertýary tanymal otandyq jáne sheteldik kompozıtorlar jazǵan túrli janrdaǵy shyǵarmalardan turady. Jınalǵan qaýym klassıkadan djazǵa deıin túrli shyǵarmalardy tyńdaǵan bolatyn. Al «Gorod moı» kompozısııasynda Astana týraly áýender de oryndaldy.
Sonymen qatar, «Kókshetaý» oblystyq mádenıet saraıynda Astana qalasynyń Memlekettik akademııalyq fılarmonııasy artısteriniń – Kameralyq horynyń, «Qorqyt» dástúrli mýzyka tobynyń, halyq ánderi bóliminiń solısteriniń qatysýymen «Aıbozym» konserti ótti. Shyǵarmashylyq kesh barysynda Birjan saldyń mahabbat, áleýmettik teńsizdik pen fılosofııalyq oı-tolǵaýlary taqyryptan ashatyn ólmes týyndylary oryndaldy. Sahna tórinde mýzykanttarmen birge QR eńbek sińirgen ártisi Qapash Qulysheva da án shyrqady.
Birjan sal atyndaǵy Mýzykalyq kolledjde Ǵazıza Jubanova atyndaǵy ishekti aspaptar kvarteti «Uly dala áýenderi» atty konserttik baǵdarlamany kópshilik nazaryna usyndy. Elimizdegi jalǵyz kásibı kvartet Shýberttiń, Gaıdnnyń, Borodınniń, Jubanovanyń, Jaıymovtyń, Mahambettiń, Jeldibaevtyń, Táttimbet pen Qurmanǵazynyń shyǵarmalaryn oryndady.
Fılarmonııa artısterimen birge Kókshetaýǵa elordalyq Qýyrshaq teatrynyń trýppasy da attandy. Sh.Qusaıynov atyndaǵy oblystyq qazaq mýzykalyq drama teatrynyń sahnasynda atalmysh ujym óziniń úzdik qoıylymdarynyń biri – «Máńgilik Bala beıne» spektaklin qoıǵan bolatyn. Shyǵarmanyń avtory – QR eńbek sińirgen qaıratkeri, jazýshy-dramatýrg Roza Muqanova.
Eki kúndik gastrol aıasynda «Kókshetaý» oblystyq mádenıet saraıynda tańǵy «Aq tilekpen Astana!» atty kórme jumys istedi. Ekspozısııada elimizdiń tanymal 50 sýretshisiniń 100 eńbegi qoıylǵan. Toptamany Táýelsizdik saraıynyń ujymy usyndy.
Elordanyń Aqmola oblysyndaǵy mádenı kúnderi aıasynda sporttyq sharalar da uıymdastyryldy. «Býrabaı» sport saraıynda Kókshetaý men Astananyń qurama komandalarynyń arasynda júzýden matchtyq jarys ótti. Eki kún boıy sportshylar erkin stılde 100 metrge júzip, 50 metrden 4 ret quramdastyrylǵan mıks estafetada, 200 metrge keshendi júzýde jáne «Kóńildi starttar» estafetasynda baq talastyrdy.
Al «Batyr» Stepnogor sport kesheninde gir kóterýden qalalyq týrnır ótti. Munymen qosa, sport ardageri, QR eńbek sińirgen jattyqtyrýshysy, ardagerler arasynda 10 dúrkin álem chempıony, gir kóterý sportynan Halyqaralyq Odaq Federasııasynyń vıse-prezıdenti Serik Abdahınmen kezdesý uıymdastyryldy.
