Memlekettik rámizder máselesi qaraldy

Otyrysty ashqan Memlekettik hatshy G.Ábdiqalyqova sharanyń Memlekettik rámizder kúnimen tuspa-tus kelgenin atap ótip, qatysý­shylardy merekemen quttyqtady. Sony­men qatar bıyl meı­ram­nyń Astananyń 20 jyl­dyq mereıtoıy belesimen qatar kelýiniń sım­voldyq máni zor ekendigin atap ótti. «Rámiz­derimizdiń qoǵamdyq ómirde alar orny erekshe. Ol halqymyzdyń birligi men pat­rıot­tyq sezimin bildirýde asa mańyzdy ról at­qarady. Sondyqtan onyń mán-mańy­zyn nası­hattaý men qoldanylýyn rettep otyrý – barshamyzdyń ortaq mindetimiz», dedi ol. Memlekettik hatshy memlekettik nyshan­dardyń jekelegen ortalyq jáne jergilikti atqarý organdaryndaǵy qoldanysy men olardy dáripteý jumysy zerttelgenin aıta kelip, Aqparat jáne kommýnıkasııalar mınıstri D.Abaevtyń, Astana qalasy ákiminiń orynbasary E.Amanshaevtyń, Qyzylorda jáne Aqtóbe oblystarynyń ákimderi Q.Kósherbaev pen B.Saparbaevtyń esebin tyńdady. Qyzylorda oblysynyń ákimi Qyrymbek Kósherbaev Syr óńirin­de memlekettik rámizderge degen qur­metti qalyptastyrý, jas urpaqtyń sanasyna sińirý basty mindet ekenin atap ótti. Ákim bul baǵytta oblysta aýqymdy jumystar atqarylyp jatqanyn, atap aıtqanda 2016 jyly bıiktigi 60 metr bolatyn tý tuǵyrynyń, jalpy kólemi 3 gektardy quraıtyn Memle­ket­tik rámizder alleıasy paıdalanýǵa beril­genin jetkizdi. Sondaı-aq oblys ákimdiginiń janyndaǵy arnaıy komıssııanyń sheshimimen endigi kezekte barlyq aýdan ortalyqtary men 46 eldi mekende osyndaı alleıalar ashyl­maq. Onyń aıtýynsha, oblystaǵy barlyq mem­lekettik mekemelerde, bilim berý uıym­darynda memlekettik nyshandar talapqa saı ornatyl­ǵan. Degenmen, Q. Kósherbaev bul salada problema bar ekenin aıtyp, ony sheshý maqsatynda komıssııa qaraýyna óz usynysyn bildirdi. «Memlekettik rámizderdi daıyndaıtyn lısenzııasy men sertıfıkattary bar jeke seriktestik mekemeler Memlekettik rámiz­der týraly Konstıtýsııalyq zańǵa sáı­kes kelmeıtin memlekettik rámizderdi paıda­lanýǵa berýde. Bul jaǵdaılar Qaraǵandy qalasyn­da ornalasqan «Aq bastaý KZ» JShS jáne Astana qalasynda ornalasqan «Zým» jarnama agenttigi» JShS-da kezdesti. Bul jóninde tehnıkalyq retteý jáne metrologııa komıtetine tıisti usynys berildi», dedi ol.

Budan soń sóz alǵan Aqtóbe oblysynyń ákimi B.Saparbaev osy oblystaǵy memle­kettik nyshandar jaǵdaıynan tolyq máli­met bere kelip, qyzylordalyq árip­tesi­men tolyq kelise­tinin aıtyp, usynysty qol­daı­tynyn jetkiz­di. «Qazirgi tańda Týdy, Eltańbany daıyn­daı­tyn mekemeler kóp. Olardyń árqaısysy ártúrli daıyndaıdy. Eshqandaı jaýap­ker­shilik joq. Sondyq­tan, olardyń jaýa­pker­shi­ligin arttyrýdy usynamyz. Ekinshi­den, olardan daıyn­daıtyn memlekettik rámiz­der memlekettik standarttarǵa sáıkes bolýy kerek­tigin talap etý qajet. Eger olardyń lısenzııa­sy bolsa, sonda kórsetilgen talaptardy toly­ǵymen oryndaýy tıis. Sol kezde eshqandaı kemshilikter bolmaıdy dep oılaımyz»,  dedi ol.

Komıssııa jumysynyń qorytyn­dysy boıynsha Memlekettik hatshy G.Ábdiqalyqova memlekettik organdar basshylaryna memle­kettik rámizderdi paıdalaný jáne nasıhattaý máseleleri, sonymen qatar osy saladaǵy zańnamalardy saqtaý jóninde birqatar naqty tapsyrmalar berdi.

Venera TÚGELBAI,
«Egemen Qazaqstan»